އަތޮޅުތެރޭގެ 27 ރަށަކަށް އެމްބިއުލެންސް ހަވާލުކޮށްފި

އެމްބިއުލާންސްގެ ޚިދުމަތް ދެމެހެއްޓެނިވި ގޮތެއްގައި ހުރިހާ ރަށަކަށް ފޯރުކޮށްދިނުމަށް ސަރުކާރުން ފަށާފައިވާ މަސައްކަތުގެ ތެރެއިން 27 ރަށަކަށް ބޭނުންވާ އެމްބިއުލާންސް މިހާތަނަށް ހަވާލުކޮށްފިއެވެ.

ރަށްރަށަށް އެމްބިއުލެންސް ފޮނުވުމުގެ މަސައްކަތް ސަރުކާރުން ހަވާލުކޮށްފައި ވަނީ މޯލްޑިވްސް ޕޯޓްސް ލިމިޓް (އެމްޕީއެލް)އާއެވެ. މި މަޝްރޫޢުގެ ދަށުން ޞިއްޙީ ވުޒާރާއިން މަސައްކަތްކުރަމުންދަނީ 56 ރަށަކަށް އެމްބިއުލެންސް ފޮނުވުމަށެވެ.

އެމްޕީއެލްއިން ހާމަކޮށްފައިވާ ގޮތުގައި، މި މަސައްކަތް މި މަހުގެ 19ވަނަ ދުވަހު ފަށާފައިވާއިރު، މިހާތަނަށް 27 ރަށަކަށް ބޭނުންވާ އެމްބިއުލާންސް ފޮނުވައި އެ ރަށްރަށުގެ ޞިއްޙީ މަރުކަޒު/ހޮސްޕިޓަލްތަކާ ވަނީ ހަވާލުކޮށްފައެވެ. އަދި ބާކީ ހުރި އެމްބިއުލާންސްތައް ވެސް ފޮނުވަންޖެހޭ ރަށްރަށަށް، ކައިރި މުސްތަޤުބަލެއްގައި ފޯރުކޮށްދިނުމަށް އެ ކުންފުނިން މަސައްކަތްކުރަމުން އަންނަ ކަމަށް ވަނީ ހާމަކޮށްފައެވެ. 

މިނިސްޓްރީ އޮފް ހެލްތުން އެމްޕީއެލްއާ ހަވާލުކޮށްގެން ރާއްޖެ ގެނެސްފައިވާ 56 އެމްބިއުލަންސްގެ ތެރެއިން 27 ރަށަކަށް މިކުންފުނިން މިހާރު ވަނީ އެމްބިއުލަންސް ފޯރޫކޮށްދީފައެވެ. ބާކީ ހުރި އެމްބިއުލަންސްތައް ވެސް ލިބެންޖެހޭ ރަށްތަކަށް، ކައިރި މުސްތަޤުބަލެއްގައި ފޯރުކޮށްދިނުމުގެ… pic.twitter.com/2tVRfTsHAe

— Maldives Ports Limited (@Portmv) January 27, 2026

ދެމެހެއްޓެނިވި ގޮތެއްގައި ހުރިހާ ރަށަކަށް އެމްބިއުލާންސް ފޯރުކޮށްދިނުމުގެ މަސައްކަތަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަތޮޅުތަކުގެ މީހުން ދިރިއުޅޭ ރަށްރަށަށް ކުރެއްވި ދަތުރުފުޅުގައި އެކި މުއައްސަސާތަކުގެ ވެރިންނާއި ބައްދަލުކުރައްވާ އެ ރަށްރަށުގައި ހުރި އެކި މައްސަލަތައް ދެނެގަތުމުގެ ތެރެއިން ފެއްޓެވި މަސައްކަތެވެ. އެގޮތުން ޞިއްޙީ ނިޒާމުގައި ހުރި ގޮންޖެހުންތަކުގެ ތެރެއިން ދެމެހެއްޓެނިވި ގޮތެއްގައި އެމްބިއުލާންސްގެ ޚިދުމަތް ނުދެވުމަކީ ހުރިހާ ރަށެއްގެ ޝަކުވާއެއްކަމަށް ސަރުކާރުން ވަނީ ހާމަކޮށްފައެވެ.