އިސްރަށްވެހިންގެ ނާދީތަކަކީ އިސްރަށްވެހިންނަށް އުފާވެރިކަން ގެނެސްދޭ މަރުކަޒުތަކެއް: ސްޓޭޓް މިނިސްޓަރ

އިސްރަށްވެހިންގެ ނާދީތަކަކީ އިސްރަށްވެހިންގެ ޖިސްމާނީ، ނަފްސާނީ އަދި އިޖުތިމާޢީ ދުޅަހެޔޮކަން ކަށަވަރުކުރުމަށް ތަފާތު ބާވަތްތަކުގެ ހަރަކާތްތައް ހިންގައި، އެމީހުންނަށް އުފާވެރިކަން ގެނެސްދޭ މަރުކަޒުތަކެއްކަމަށް އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާގެ ސްޓޭޓް މިނިސްޓަރ ޢާޢިޝަތު ޒުހުރުބާން ވިދާޅުވެއްޖެއެވެ.

އިސްރަށްވެހިންގެ ނާދީގައި ހިންގޭ ޙާއްޞަ ހަރަކާތްތަކާއި ގުޅޭ މަޢުލޫމާތު ހިއްސާކުރުމަން ސްޓޭޓް މިނިސްޓަރ ވިދާޅުވީ، މާލެ އިސްރަށްވެހިންގެ ނާދީއަކީ އިސްރަށްވެހިން ޝަރަފުވެރިކަމާއި ގަދަރުވެރިކަމާއެކު މުޖުތަމަޢުގައި ހަރަކާތްތެރިވެ އުޅޭ ބައެއްކަން ކަށަވަރުކުރުމަށް، އިސްރަށްވެހިންނަށް އަމާޒުކޮށްގެން އިންތިޒާމުކޮށްގެން ހަރަކާތްތައް ހިންގުމަށް ރާއްޖޭގެ އެކި ސަރަހައްދުތަކުގައި މަރުކަޒުތަކެއް ޤާއިމުކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެލެއްވި ވައުދުފުޅާއި އެއްގޮތްވާ ގޮތުގެ މަތިން ޤާއިމުކުރެވުނު ފުރަތަމަ މަރުކަޒުކަމަށެވެ.

އެގޮތުން، ނާދީގައި ހިންގޭ ހަރަކާތްތަކުގެ ތެރޭގައި ޞިއްޙީ ދުޅަހެޔޮކަން ކަށަވަރުކުރުމަށް އިސްރަށްވެހިންނަށް އަމާޒުކޮށްގެން ލުއި ކަސްރަތު ޕްރޮގްރާމް ފަދަ ހަރަކާތްތައް ކުރިއަށްގެންދިއުމާއި، އިސްރަށްވެހިންނަށް ޞިއްޙަތާއި ބެހޭ މުހިންމު މަޢުލޫމާތު ފޯރުކޮށްދިނުމާއި އިސްރަށްވެހިންގެ ޞިއްޙީ ދުޅަހެޔޮކަން ކަށަވަރުކުރުމަށް ޞިއްޙީ މާހިރުންނާއި ގުޅިގެން ޚާއްޞަ މަޢުލޫމާތު ސެޝަންތައް ކުއިއަށްގެންދެވޭ ކަމުގައި ވެސް ޒުހުރުބާން ވަނީ ވިދާޅުވެފައެވެ. ހަމަ އެއާއެކު، ނާދީއަށް ޒިޔާރަތްކުރައްވާ އިސްރަށްވެހިންނަށް އެބޭފުޅުންގެ ދިރިއުޅުމުގެ ތަޖުތިބާތައް ހިއްސާކުރުމާއި އުފާވެރި ވަގުތުކޮޅެއް ހޭދަކުރުމުގެ ފުރުސަތުތައް ނާދީއިން ފަހިވެގެންދާކަމުގައި ސްޓޭޓް މިނިސްޓަރ ވިދާޅުވިއެވެ.

މީގެކުރިން އިސްރަށްވެހިންނަށް ޚާއްޞަ ހަރަކާތްތައް ހިންގާނެ ވަކި ސަރަހައްދެއް ކަނޑައެޅިގެންނެއް ނުދޭ. އެހެންނަމަވެސް، މިހާރު އެބޭފުޅުންނަށް އެބޭފުޅުންގެ ޚާއްޞަ ތަނެއް، ޚާއްޞަ ސަރަހައްދެއް އެބޭފުޅުންގެ ހިތުގައި ހުރި އުދާސްތައް ބޭރުކޮށްލެވޭނެ ފަދަ މާހައުލެއް ޤާއިމުކުރެވިގެން ގޮސްފައި މިވަނީ. އޭގެއިތުރަށް މިފާހަގަކޮށްލެވެނީ، އެބޭފުޅުންގެ ޢިޖުތިމާޢީ ދުޅަހެޔޮކަން ހޭލުންތެރިކުރުމާއި ރައްކާތެރިކަން ކަށަވަރުކުރުމަށް ހިންގޭ ތަފާތު އެކި ހަރަކާތްތައް މި ނާދީގެ ތެރޭގައި ކުރިއަށް ގެންދެވޭކަން.

ސްޓޭޓް މިނިސްޓަރ ޢާޢިޝަތު ޒުހުރުބާން ވިދާޅުވިއެވެ.

ސްޓޭޓް މިނިސްޓަރ އިތުރަށް ވިދާޅުވީ، އިސްރަށްވެހިންގެ ނާދީތަކަކީ ވަރަށް އުފާވެރި މާހައުލެއް ކަމަށާއި، ނާދީތަކަށް ގޮސް އެކަކު އަނެކަކާއެކު ވަގުތުތައް ހޭދަކޮށްލާ، ނާދީން ކުރިއަށް ގެންދާ އެކިއެކި ހަރަކާތްތަކުގައި ބައިވެރިވުމުގެ ސަބަބުން އެ އެކަނިވެރިކަމުން އިސްރަށްވެހީން ދުރުވެ، ދުޅަހެޔޮ ޞިއްޙަތެއްގައި ހުންނަން ވަރަށް ބޮޑު އެހީތެރިކަމެއް ފޯރުކޮށްދެވޭ ކަމަށެވެ.

އިސްރަށްވެހިންގެ ރައްކާތެރިކަމާއި ދުޅަހެޔޮކަމަށް އަމާޒުކޮށްގެން ތަފާތު ގިނަ ހަރަކާތްތައް ކޮންމެ ހަފުތާއަކުވެސް އިސްރަށްވެހިންގެ ނާދީގައި ކުރިއަށް ގެންދާކަން ފާހަގަކޮށްލެވެއެވެ.