ކ.ގުރައިދޫ އިސްކޫލުގެ އޮފީހާއި ސްޓާފް ރޫމް ތަރައްގީކުރުމުގެ މަސައްކަތް ނިމިއްޖެ

ކ. ގުރައިދޫ ސްކޫލުގެ އޮފީސް އިމާރާތާއި ސްޓާފް ރޫމް ޒަމާނީ ފެންވަރަށް ތަރައްގީކުރުމަށް އެ ރަށު ކައުންސިލުން ކުރިއަށް ގެންދިޔަ މަސައްކަތްތައް ނިންމާލައިފިއެވެ.

މި މަޝްރޫއަކީ ގުރައިދޫ ސްކޫލުގެ އިދާރީ ހިންގުން ހަރުދަނާކޮށް، މުދައްރިސުންނަށް މަސައްކަތްކުރާނޭ ރަނގަޅު މާހައުލެއް ގާއިމުކޮށްދިނުމުގެ މަގުސަދުގައި އެ ރަށު ކައުންސިލުން އިސްނަގައިގެން ކުރިއަށް ގެންދިޔަ މުހިންމު މަސައްކަތެކެވެ.

މި މަސައްކަތުގެ ތެރެއިން ޕްރިންސިޕަލް ކެބިން އާއި، އޮފީސް އޭރިޔާގެ އިތުރުން ސްޓާފް ރޫމްގެ ޖާގަ ވަނީ ކުރިއަށްވުރެ ބޮޑުކުރެވިފައެވެ. މީގެ އިތުރުން މުޅި ތަނުގެ ސީލިންގް އާއި ފްލޯރިންގް އަލުން އަޅައި، ކަރަންޓު ވައިރުކުރުމާއި ނެޓްވޯކް އެޅުމުގެ މަސައްކަތްތައް ވެސް ވަނީ ފުރިހަމަކޮށްފައެވެ.

ކައުންސިލުން މައުލޫމާތު ދޭ ގޮތުގައި، އިމާރާތަށް ގެނެވުނު ބަދަލުތަކުގެ އިތުރުން، އެ ތަނަށް ބޭނުންވާ ޒަމާނީ ފަރުނީޗަރު ހޯދައި، އޮފީސް ބޭނުންކުރަން ފެށޭނެ އިންތިޒާމުތައް މިހާރު ވަނީ ހަމަޖައްސާފައެވެ.

މި މަޝްރޫއު ނިމުމަކަށް އައުމާއެކު، ގުރައިދޫ ސްކޫލުގެ އިދާރީ މަސައްކަތްތަކަށާއި މުދައްރިސުންގެ މަސައްކަތްތަކަށް ބޮޑެތި ލުއިފަސޭހަތަކެއް ލިބިގެންދާނެއެވެ. މިއީ ރަށުގެ ތައުލީމީ ދާއިރާ ކުރިއެރުވުމަށް ކައުންސިލުން ކުރަމުންދާ މަސައްކަތްތަކުގެ ތެރެއިން ކުރިއަށް ގެންދިޔަ ކާމިޔާބު މަސައްކަތެކެވެ.