ކާބޯތަކެތީގެ ޚިދުމަތްދޭ ތަންތަނުގެ ރަޖިސްޓްރޭޝަން ފީ %50 އަށް ކުޑަކޮށްފި

ކާބޯތަކެތީގެ ޚިދުމަތްދޭ ތަންތަން ރަޖިސްޓްރީ ކުރުމަށް ނަގަމުން އަންނަ ރަޖިސްޓްރޭޝަން ފީއާއި ކެޓަގަރީ ފީ، މިއަދުން ފެށިގެން ކުރިއަށް އޮތް ދެ އަހަރު ދުވަހުގެ މުއްދަތަކަށް %50 އަށް ކުޑަކުރުމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމް.އެފް.ޑީ.އޭ) އިން ނިންމައިފިއެވެ.

މި ނިންމުމަކީ ކާބޯތަކެތީގެ ޚިދުމަތް ދޭ ފަރާތްތައް ރަޖިސްޓްރީކޮށް ލައިސަންސް ދޫކުރުމުގައި ޢަމަލު ކުރާނެ ގޮތުގެ އިންތިޤާލީ އުޞޫލުގެ ޤަވައިދަށް ގެނެވުނު ބަދަލެކެވެ. މި ބަދަލާއެކު، ކުރިން ހުރިހާ ކެޓަގަރީއަކަށް އެއްފަހަރު ނަގާ ރަޖިސްޓްރޭޝަން ފީއެއްގެ ގޮތުގައި ކަނޑައަޅާފައިވާ 500 ރުފިޔާ، ދެން ދައްކަން ޖެހޭނީ 250 ރުފިޔާއެވެ.

މީގެ އިތުރުން، އެކި ކެޓަގަރީތަކުގެ ތަންތަނުން އަހަރީ ފީގެ ގޮތުގައި ނަގަމުން އައި އަގުތަކަށް ވެސް ވަނީ ބޮޑު ލުޔެއް ދީފައެވެ. އެގޮތުން މިއަދުން ފެށިގެން ކުރިއަށް އޮތް ދެ އަހަރުގައި ދައްކަން ޖެހޭނީ ކުރިން ކަނޑައަޅާފައިވާ އަގުތަކުގެ ދެބައިކުޅަ އެއްބައެވެ.

މި ބަދަލުގެ ދަށުން އަގުތަކަށް އަންނާނެ ބައެއް ބަދަލުތަކަކީ:

• ހޮޓާ، ކެފޭ، ރެސްޓޯރެންޓު: ކުރިން 2،000 ރުފިޔާ ނަގަމުން އައި ނަމަވެސް، ދެން ދައްކަން ޖެހޭނީ 1،000 ރުފިޔާއެވެ.
  
• ކޭޓަރިން، ބޭކަރީ އަދި ޕޭސްޓްރީ ޝޮޕް: ކުރިން 1،000 ރުފިޔާގެ ބަދަލުގައި ދެން ދައްކަން ޖެހޭނީ 500 ރުފިޔާއެވެ.
  
• ބަތްޕާރުސަލް ވިއްކާ ތަންތަނާއި ހެދިކާ ވިއްކާ ތަންތަން: 2،000 ރުފިޔާގެ ބަދަލުގައި ދައްކަން ޖެހޭނީ 1،000 ރުފިޔާއެވެ.
  
• މަގުމަތީގައި ކާނާ ވިއްކާ ގާޑިޔާ ފަދަ ތަންތަން: 500 ރުފިޔާގެ ބަދަލުގައި ދެން ދައްކަން ޖެހޭނީ 250 ރުފިޔާއެވެ.

މި ބަދަލު މި ގެނައީ، 2024 އޯގަސްޓް 23 ގައި "ކާބޯތަކެތީގެ ރައްކާތެރިކަމުގެ ޤާނޫނު" ގެ ދަށުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، އެމް.އެފް.ޑީ.އޭ އަލުން އެކުލަވާލައްވައި، އެ އިދާރާއަށް ޤާނޫނީ ބާރުވެރިކަން ދެއްވުމާ ގުޅިގެންނެވެ.

މި އާ ޤާނޫނުގެ ދަށުން ކާބޯތަކެތީގެ ޚިދުމަތްދޭ ތަންތަން ދަރަޖަކުރުމާއި، ލައިސަންސް ދޫކުރުމުގެ އެންމެހާ މަސައްކަތްތައް ސީދާ ބަލަހައްޓާނީ އެމް.އެފް.ޑީ.އޭ އިންނެވެ. މި ލުޔަކީ ކާބޯތަކެތީގެ ވިޔަފާރިކުރާ ފަރާތްތަކަށް، ޚާއްޞަކޮށް ކުދި އަދި މެދު ފަންތީގެ ވިޔަފާރިތަކަށް ދެވުނު ވަރަށް ބޮޑު އެހީތެރިކަމެއް ކަމަށް ބެލެވެއެވެ.