ތިލަފުށިން ގެއްލުނު ބިދޭސީ މީހާ މަރުވެފައިވަނީ މިމަހުގެ 26 ވަނަ ދުވަހު: ފުލުހުން

ތިލަފުށީ ސައިޓެއްގައި މަސައްކަތްކުރަމުންދަނިކޮށް ގެއްލުނު ބިދޭސީ މީހާ މަރުވެފައިވަނީ މިމަހުގެ 26 ވަނަ ދުވަހުކަމަށް ދިވެހި ފުލުހުންގެ ޚިދުމަތުން ވިދާޅުވެއްޖެއެވެ.

ފުލުހުންގެ ޚިދުމަތުން ވިދާޅުވީ، ގެއްލިގެން ހޯދަމުން ދަނިކޮށް ނިޔާވެފައި އޮއްވާ ފެނިފައި ވަނީ ބަންގްލަދޭޝް އަށް ނިސްބަތްވާ ރައްޔިތެއް ކަމަށްވާ އަމީން މިއާ (24އ) ކަމަށެވެ. އަދި މިކަމާއި ގުޅިގެން ފުލުހުންގެ ޚިދުމަތުން މިހާތަނަށް ކުރި ތަޙުޤީގުން، އަމީން މިއާ މަރުވެފައިވަނީ މި މަހުގެ 26 ވަނަ ދުވަހުކަން އެނގިފައިވާ ކަމަށް ފުލުހުން ވިދާޅުވިއެވެ. އެ މީހާގެ ހަށިގަނޑު ފެނުނުކަން ހާމަކުރި ނަމަވެސް، މިކަމުގެ އިތުރު ތަފްސީލް ފުލުހުން ހާމަކޮށްފައެއް ނުވެއެވެ.

މި މައްސަލައިގެ ތަޙުޤީގު ކުރިއަށްދާ މިންވަރަކުން ހާމަކުރެވެންހުރި މަޢުލޫމާތު ހާމަކުރަމުންދާނެކަމަށް ދިވެހި ފުލުހުންގެ ޚިދުމަތުން ވަނީ ވިދާޅުވެފައެވެ.

އަމީން މިއާ ގެއްލިފައިވަނީ 2026 ޖެނުއަރީ 26 ވަނަ ދުވަހުއެވެ. ނަމަވެސް، މި މީހާ ގެއްލިގެން ރަސްމީކޮށް ފުލުހުންނަށް ރިޕޯޓްކޮށްފައިވަނީ 2026 ޖެނުއަރީ 28 ވަނަ ދުވަހުއެވެ.