ރައީސުލްޖުމްހޫރިއްޔާ، އައިލާ ސަސްޓެއިނެބަލް ޓައުންޝިޕް މަޝްރޫޢުގެ ޢަމަލީ މަސައްކަތް ފައްޓަވައިދެއްވައިފި

މިހާތަނަށް ރާއްޖޭގެ ތާރީޙުގައި ކުރިޔަށްގެންދާ އެންމެ ބޮޑު އިންވެސްޓްމެންޓް، 'އައިލާ ސަސްޓެއިނަބަލް ޓައުންޝިޕް ' މަޝްރޫޢުގެ ޢަމަލީ މަސައްކަތް، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ފައްޓަވައިދެއްވައިފިއެވެ.

މިއީ ރާއްޖޭގެ ސްޕެޝަލް އިކޮނިމިކް ޒޯން، އެސްއީޒެޑްގެ ދަށުން ހިންގާ ފުރަތަމަ ބޮޑު މަޝްރޫޢެވެ. 

ކްރިސްޓަލް ހޯލްޑިންގްސް ޕްރައިވެޓް ލިމިޓެޑާ ހަވާލުކޮށްގެން ކުރިއަށްގެންދާ މި މަޝްރޫޢަކީ ޖުމްލަ 790 މިލިޔަން އެމެރިކާ ޑޮލަރު ނުވަތަ 12.2 ބިލިޔަން ރުފިޔާގެ އިންވެސްޓްމެންޓެކެވެ.

މި މަޝްރޫޢުގެ މަސައްކަތް ރަސްމީކޮށް ފައްޓަވާދެއްވުމަށްފަހު ރައީސުލްޖުމްހޫރިއްޔާ ވަނީ އެ ޕްރޮޖެކްޓު ކުރިޔަށްދާ ބިޔަ ސަރަޙައްދު، ރައީސުލްޖުމްހޫރިއްޔާގެ ލޯންޗުކޮޅުގައި ބައްލަވާލައްވާފައެވެ. 

މި ޓައުންޝިޕް މަޝްރޫއަކީ ރާއްޖޭގެ ސްޕެޝަލް އިކޮނިމިކް ޒޯން، އެސްއީޒެޑްގެ ދަށުން ހިންގާ ފުރަތަމަ ބޮޑު މަޝްރޫޢުގެ ގޮތުގައި ކަނޑައަޅައި،  ސަރުކާރުން މި މަޝްރޫޢުގެ ހުއްދަ ރަސްމީކޮށް ހަވާލުކުރީ މިދިޔަ އަހަރުގެ ޑިސެމްބަރު 11 ގައެވެ. 

މި ޓައުންޝިޕް މަޝްރޫޢުގެ ރަށްތަކުގެ ބިން ހިއްކުމުގެ މަސައްކަތް މިދިޔަ އަހަރުގެ މާރިޗު މަހު ފެށުމަށްފަހު އެ މަސައްކަތް ނިންމާ، މިހާރު ދަނީ އެ ރަށްތައް ވަށައިގެން ބޮޑު ހިލަޖެހުމުގެ މަސައްކަތެވެ. 

މި ޓައުންޝިޕުގައި ދުނިޔޭގެ ފެންވަރުގެ ޞިއްޙީ ޚިދުމަތްދޭ މަރުކަޒަކާއި، ބައިނަލްއަޤްވާމީ ފެންވަރުގެ ޓޫރިޒަމް ސްކޫލެއް ޤާއިމުކުރުމަށް ވަނީ ހަމަޖެހިފައެވެ. އަދި ރާއްޖެއަށް އެތެރެކުރާ ކާބޯތަކެތީގެ ބާވަތްތައް ދެމެހެއްޓެނިވި ގޮތެއްގައި އުފެއްދުމަށްޓަކައި ޒަމާނީ ޓެކްނޮލޮޖީއާއެކު އެކުއަކަލްޗަރ އަދި މެރިކަލްޗަރ ޒޯނެއްވެސް މި މަޝްރޫޢުގެ ދަށުން ތަރައްޤީކުރާނެއެވެ.  އަދި މި ޓައުންޝިޕަށް ބޭނުންވާ ކަރަންޓުގެ 60 އިންސައްތަ އިޔާދަކުރަނިވި ހަކަތައިން އުފެއްދުން ހިމެނެއެވެ.

މި މަޝްރޫޢު ނިމުމުން މިއީ ދުނިޔޭގެ ފެންވަރުގައި ފާހަގަކުރެވޭނެ ދެމެހެއްޓެނިވި ތަރައްޤީގެ ނަމޫނާއަކަށް ވާނެކަމަށް ސަރުކާރުން ހާމަކޮށްފައިވާއިރު، މި މަޝްރޫޢުގެ މަސައްކަތް ބާރު ދުވެލީގައި ދަނީ ކުރިޔަށެވެ. އަދި މި މަޝްރޫޢުގެ ފައިދާ 2028ވަނަ އަހަރުގެ ނިޔަލަށް ހޯދައިދިނުމަށް ދަނީ މަސައްކަތްކުރަމުންނެވެ.