އިސްލާމީ ކަންތައްތަކާ ބެހޭ ވަޒީރު، އަލްޙާފިޡާ އަމަތުއްރަޙްމާން ބިންތި ޢަބްދުﷲ އާއި ބައްދަލުކުރައްވައިފި

އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު، ޙާފިޡްކަމުގެ ސަނަދު އަލަށް ހާސިލްކުރި އުމުރުން 15 އަހަރުގެ އަލްޙާފިޡާ އަމަތުއްރަޙްމާން ބިންތި ޢަބްދުﷲއާއި ބައްދަލުކުރައްވައިފިއެވެ.

މި ބައްދަލުކުރެއްވުން އޮތީ މިއަދު އިސްލާމީ ކަންތައްތަކާ ބެހޭ ވުޒާރާގައެވެ. މި ބައްދަލުކުރެއްވުމުގައި އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވަނީ އަލްޙާފިޡާ އަމަތުއްރަޙްމާން ބިންތި ޢަބްދުﷲ ހޯދެއްވި ކާމިޔާބީއަށް މަރުޙަބާ ދަންނަވާފައެވެ. ހަމަ އެހެންމެ، ޤުރުއާނުގެ ރޮނގުން ކުރިއަށް ދިއުމަށް ވަޒީރު ވަނީ ނަސޭޙަތްތެރިވެލައްވާ، ހިތްވަރު ދެއްވާފައެވެ.

އަލްޙާފިޡާ އަމަތުއްރަޙްމާން ބިންތި ޢަބްދުﷲ ޙާފިޘް ކަމުގެ ސަނަދު ހާސިލްކުރީ 25 ޖަނަވަރީ 2026 ގައެވެ. އަމަތުއްރަޙްމާން ޙާފިޡުކަމުގެ ސަނަދު ހާސިލްކޮށްފައިވަނީ 1 މަސް ދުވަސްތެރޭ ޤުރުއާނާއި ބެހޭ މަރުކަޒުގެ ޙިފްޡު ކޮމިޓީއަށް ކިޔުއްވާ 1 ވަނަ ދަރަޖައިގައި ފާސްވެގެންނެވެ.