ފުރަތަމަ ފަސް ދުވަސް ތެރޭ މާލެ ސަރަޙައްދުގައި 19،000 އަށްވުރެ ގިނަ މަސްދަޅު ކޭސް ބަހައިފި

ރަމަޟާން މަހުގެ ހަދިޔާގެ ގޮތުގައި ސަރުކާރުން ގޭބިސީތަކަށް ބަހާ މަސްދަޅު ކޭސްތަކުގެ ތެރެއިން، ގްރޭޓާ މާލެ ސަރަހައްދުގެ ގޭބިސީތަކަށް ފުރަތަމަ 5 ދުވަހުގެ ތެރޭގައި 19،000 އަށްވުރެ ގިނަ މަސްދަޅު ކޭސް ބަހައިފި އެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާ އެއްގޮތަށް މާލެ ސަރަޙައްދުގައި މަސްދަޅު ކޭސްތައް ބަހަން ފަށާފައި ވަނީ މި ހިނގާ ޖަނަވަރީ މަހުގެ 24 ވަނަ ދުވަހުއެވެ. މި މަސައްކަތް ކުރިއަށް ދަނީ ސިޓީތަކާއި އިދާރީ ދާއިރާތައް ހިންގުމާއި ޢާންމު މަސައްކަތްތަކާ ބެހޭ ވުޒާރާއާއި، ސަރުކާރު ހިއްސާވާ ބައެއް ކުންފުނިތަކުގެ އިތުރުން، ދިވެހި ސިފައިންނާ، ދިވެހި ފުލުހުންގެ ޚިދުމަތުގެ އެހީތެރިކަމާއެކުއެވެ. 

މި މަސައްކަތުގެ އެންމެ ފަހުގެ މަޢުލޫމާތު ހިއްސާކުރައްވުން ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވަޒީރު އާދަމް ޝަރީފް ޢުމަރު ވިދާޅުވީ، މާލޭގައި ރޯދަ ހަދިޔާ ބަހަން ފެށިފަހުން މިވީ 5 ދުވަހުގެ ތެރޭގައި 19،468 މަސްދަޅު ކޭސް ބަހާފައިވާ ކަމަށެވެ. ހަމަ އެހެންމެ، ގޭބީސީތަކަށް މަސްދަޅު ކޭސް ބެހުމުގެ މި މަސައްކަތުގައި އުޅުއްވާ ހުރިހާ ބޭފުޅުންނަށް ވަޒީރު ވަނީ ޝުކުރު ދަންނަވާފަ އެވެ.

މާލެ އާއި ހުޅުމާލެ އަދި ވިލިމާލޭގައި މަސްދަޅު ދޫކުރުމަށް ގިނަ މަރުކަޒުތަކެއް ވަނީ ޤާއިމްކޮށްފައެވެ. އެގޮތުން މާލޭގައި މިފްކޯ މަރުކަޒު، ސޯޝަލް ސެންޓަރު، އެމްޓީސީސީ ސޯމިލު، ހެންވޭރު ބޯޅަދަނޑު އަދި ގަލޮޅު ދަނޑުން މަސްދަޅު ދޫކުރަމުންދެއެވެ. ހުޅުމާލެ ފޭސް 1 ގައި އުމަރު ޒާހިރު ބިލްޑިންގ، ޕޮލްކޯ ޓަވަރު އަދި މުހައްމަދު ގާސިމް ޕްރީސްކޫލުން މަސްދަޅު ދޫކުރާއިރު، ފޭސް 2 ގައި މަސްދަޅު ދޫކުރަނީ ކާމިލްދީދީ ސްކޫލް، ހިޔާ ޓަވަރު 10 އަދި އެމްޕީއެލް ޓަވަރު ޕީ އިންނެވެ. ވިލިމާލޭގައި މަސްދަޅު ދޫކުރުމުގެ މަސައްކަތް ކުރިއަށްދަނީ ވެމްކޯ ސައިޓުގައެވެ.

ސިޓީތަކާއި އިދާރީ ދާއިރާތައް ހިންގުމާއި ޢާންމު މަސައްކަތްތަކާ ބެހޭ ވުޒާރާއިން ވިދާޅުވީ، ރަށްތަކުގައި ރޯދަ ހަދިޔާ ބެހުމުގެ މަސައްކަތް ކުރިއަށް ގެންދާނީ އެ ރަށެއްގެ ކައުންސިލުގެ ބެލުމުގެ ދަށުން ކަމަށެވެ. އެގޮތުން، މި އަހަރު ރޯދަ ހަދިޔާ ބެހުމަށް އެކުލަވައިލި ގޭބިސީ ލިސްޓުގައިވާ ގޮތުން ރަށްރަށާއި ސިޓީތަކުގެ ގޭބިސީގެ ޖުމުލަ ޢަދަދަކީ 56،918 އެވެ. އަދި ޑޮމެސްޓިކް މީޓަރގެ ޢަދަދަކީ 61،755 އެވެ. 

މިއާއެކު، މި އަހަރުގެ ރޯދަ ހަދިޔާގެ ގޮތުގައި ޖުމުލަ 118،673 މަސްދަޅު ކޭސް ބެހުމަށް ހަމަޖެހިފައިވާކަމަށް ސިޓީތަކާއި ބެހޭ ވުޒާރާއިން މަޢުލޫމާތުދެއެވެ.