މ. ދިއްގަރު ޞިއްޙީ މަރުކަޒުގައި ޤާއިމުކުރި ގައިންގަޔަށް ނާރާ ބަލިތަކުގެ ކްލިނިކް މެޑަމް ސާޖިދާ ހުޅުއްވައިދެއްވައިފި

މ. ދިއްގަރު ސިއްޙީ މަރުކަޒުގައި ޤާއިމުކޮށްފައިވާ އެން.ސީ.ޑީ ނުވަތަ ގައިންގައިން ނާރާ ބަލިތަކަށް ޚާއްސަ ކްލިނިކް ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު މިއަދު ހުޅުއްވައިދެއްވައިފިއެވެ. މިއީ މިއަހަރުގެ ދުނިޔޭގެ ހަކުރު ބަލީގެ ދުވަސް ފާހަގަކުރުމަށްޓަކައި ދިއްގަރަށް ކުރެއްވި ދަތުރުފުޅެއްގައެވެ.

ދިއްގަރަށް ވަޑައިގަތުމުން ރައީސުލްޖުމްހޫރިއްޔާގެ އަނބިކަނބަލުންނަށް ވަރަށް ހޫނު މަރުޙަބާއެއް ކިޔާފައިވެއެވެ. ދަތުރުފުޅުގެ ތެރޭގައި އެންމެ ފުރަތަމަ ދިއްގަރު ސިއްޙީ މަރުކަޒުގައި ތަރައްޤީކޮށްފައިވާ އެންސީޑީ ކްލިނިކް ހުޅުވައިދެއްވުމަށްފަހު، އެތަން ބައްލަވާލައްވާ މެހެމާނުން ސޮއިކުރައްވާ ފޮތުގައި ސޮއިކުރައްވާފައިވެއެވެ.

ދިއްގަރު ޞިއްޙީ މަރުކަޒުން މަޢުލޫމާތު ދެއްވިގޮތުގައި، މި ކްލިނިކް ހުޅުވުމުގެ މައިގަނޑު ބޭނުމަކީ ގައިންގަޔަށް ނާރާ ބަލިތައް އިތުރުވަމުންދާތީ، ދުރާލާ އެކަން ދެނެގަނެ ފަރުވާ ދިނުމެވެ. އެރަށުގައި ހަކުރު ބައްޔާއި ލޭ މައްޗަށް ދިޔުން ފަދަ ބަލިތައް އިތުރުވަމުން އަންނަކަމަށާއި، އަތޮޅުގެ ދެވަނައަށް އެންމެ ގިނައިން މިފަދަ ބަލިތައް ތަހައްމަލު ކުރާ މީހުން ދިރިއުޅެނީ އެރަށުގައިކަން ފާހަގަކުރެވިފައިވެއެވެ.

މި އައު ކްލިނިކްގެ އެހީގައި ގައިންގަޔަށް ނާރާ ބަލިތައް ޖެހިފައި ތިބި މީހުންގެ ހާލަތު ދެނެގަތުމާއި، އެފަދަ ބަލިތަކަށް ޓެސްޓްތައް ހެދުމާއި، ހޭލުންތެރިކުރުމުގެ މަޢުލޫމާތުތައް ބަލި މީހުންނަށް ފޯރުކޮށްދިނުމަށް ހަމަޖެހިފައިވެއެވެ. މި ކްލިނިކް ޤާއިމުކޮށްފައިވަނީ 2023 ވަނަ އަހަރު ހުޅުވި އޮފީސް އިމާރާތުގެ ބައެއްގައެވެ.

2004 ވަނަ އަހަރު ހުޅުވުނު ދިއްގަރު ސިއްޙީ މަރުކަޒަކީ 24 ގަޑިއިރު ޚިދުމަތްދޭ ތަނެއް ކަމަށާއި، 2 ޑޮކްޓަރުންނާއެކު ޚިދުމަތް ދެމުންދާކަމަށް މަޢުލޫމާތު ލިބިފައިވެއެވެ. މި މަރުކަޒަކީ ރަށުގެ ރައްޔިތުންގެ އިތުރުން ކައިރީގައި ހުރި ރިސޯޓުތަކުންވެސް ޞިއްޙީ ޚިދުމަތް ހޯދުމަށް ބަރޯސާވާ ތަނެކެވެ. މި މަރުކަޒުން ލެބޯޓަރީގެ ޚިދުމަތާއި މޯބައިލް ލެބޯޓަރީގެ ޚިދުމަތްވެސް ފޯރުކޮށްދެއެވެ. ދުވާލެއްގެ މައްޗަށް 15 އާއި 20 ދެމެދުގެ މީހުން މި މަރުކަޒުން ޚިދުމަތް ހޯދާކަމަށް ވެސް މަޢުލޫމާތު ލިބިފައިވެއެވެ.