ދެމަހެއްހާ ދުވަސް ތެރޭގައި މަޖީދިއްޔާ ސްކޫލްގެ އައު އިމާރާތުގެ މަސައްކަތް ފެށޭނެ: ވަޒީރު އިސްމާޢިލް ޝަފީޢު

މަޖީދިއްޔާ ސްކޫލުގެ އައު އިމާރާތުގެ ކުރެހުމުގެ މަސައްކަތް ނިމިފައިވާކަމަށާއި، ކުރިއަށް އޮތް ދެ މަހެއްހާ ދުވަހުގެ ތެރޭގައި އަމަލީ މަސައްކަތް ފެށޭނެކަމަށް ތަޢުލީމީ ވަޒީރު ޑރ. އިސްމާޢީލް ޝަފީޢު ވިދާޅުވެއްޖެއެވެ.

މި މަޝްރޫޢަކީ ރާއްޖޭގެ ފުރަތަމަ ސްމާޓް ކްލާސްރޫމްތަކާއެކު ތަރައްޤީކުރާ ޒަމާނީ އިމާރާތެކެވެ.

ވަޒީރު ވިދާޅުވީ މަޖީދިއްޔާ ސްކޫލްގެ އައު އިމާރާތް އެޅުމަށް ހަމަޖެހިފައިވަނީ ކުރީގެ ދަރުމަވަންތަ ސްކޫލު ހުރި ބިމުގައި ކަމަށެވެ. މި މަސައްކަތް ފެށުމަށްޓަކައި ބޭނުންވާ އިންޖިނިއަރިންގެ މަސައްކަތްތަކާއި ކުރެހުމުގެ މަސައްކަތްތައް މިހާރު ވަނީ އެއްކޮށް ފުރިހަމަކޮށްފައެވެ. އަދި މިހާރު ކުރިއަށްދަނީ ދަރުމަވަންތަ ސްކޫލު ހިންގި އިމާރާތް ހުސްކުރުމުގެ މަސައްކަތް ކަމަށްވެސް ވަޒީރު ފާހަގަކުރެއްވިއެވެ.

މާލެ ސަރަހައްދުގައި ކުރިއަށްދާ އެހެން މަޝްރޫޢުތަކަށް އަލިއަޅުއްވާލައްވަމުން ވަޒީރު ވިދާޅުވީ، ސީއެޗްއެސްސީގެ އައު އިމާރާތުގެ މަސައްކަތް ބަޔަކާ ހަވާލުކުރުމުގެ ފަހުގެ މަރުހަލާގައި އޮތްއިރު، ޣާޒީ ސްކޫލަށް 18 ކްލާސްރޫމް އިތުރުކުރުމުގެ މަސައްކަތްވެސް ކުރިއަށްދާ ކަމަށެވެ. މީގެ އިތުރުން މިއަހަރުގެ ފުރަތަމަ ކުއަޓާގެ ތެރޭގައި ހުޅުމާލޭގައި އައު ސްކޫލެއް އިމާރާތް ކުރުމުގެ މަސައްކަތް ފެށުމަށް ތައްޔާރުވަމުންދާކަން ވަޒީރު ހާމަކުރެއްވިއެވެ.

މަޖީދިއްޔާ ސްކޫލުގައި 40 ކްލާސްރޫމްގެ އައު އިމާރާތެއް އެޅުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާން ކުރެއްވީ 2024 ވަނަ އަހަރު ބޭއްވި އެ ސްކޫލުގެ "ސައްތަވީ ބިނާ" އިފްތިތާހުކުރުމުގެ ރަސްމިއްޔާތުގައެވެ. ރައީސް ވިދާޅުވެފައިވަނީ މި އިމާރާތުގައި ހިމެނޭ ބައެއް ކްލާސްތަކަކީ ރާއްޖޭގައި ފުރަތަމަ ފަހަރަށް ގާއިމްކުރެވޭ ސްމާޓް ކްލާސްތަކަށް ވެގެންދާނެ ކަމަށެވެ.

މީގެ އިތުރުން، މަޖީދިއްޔާ ސްކޫލްގެ ތާރީޚީ ދާރުލް އުލޫމަކީ ތައުލީމާ ގުޅުންހުރި ދާރުލްއާސާރަކަށް ހައްދަވައިދެއްވާނެ ކަމަށްވެސް ރައީސް ވަނީ ވައުދުވެވަޑައިގަންނަވާފައެވެ. މަޖީދިއްޔާ ސްކޫލްގެ އައު އިމާރާތުގެ މަސައްކަތް ކުރުމަށް ހަވާލުކޮށްފައިވަނީ ދިވެހި ކުންފުންޏެއް ކަމަށްވާ ފެޑޯ ޕްރައިވެޓް ލިމިޓެޑާއެވެ.