ދުންފުހުގެ ނުރައްކާ ދަނީ އިތުރުވަމުން، ސަމާލުވޭ!

ރާއްޖޭގެ އެކި ސަރަހައްދުތަކަށް ދުންފުހުގެ އަސަރު ކުރަމުންދާތީ، ރައްކާތެރިކަމުގެ ފިޔަވަޅުތައް އެޅުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން އިލްތިމާސްކޮށްފިއެވެ.

 މޫސުމާބެހޭ ޤައުމީ އިދާރާގެ ރެކޯޑުތަކުން ދައްކާގޮތުގައި، ޚާއްސަކޮށް މެދު ރާއްޖެތެރޭގެ އަތޮޅުތަކަށް މިކަމުގެ އަސަރު ވަރަށް ބޮޑަށް ދަނީ ކުރަމުންނެވެ.

އެޗްޕީއޭއިން ވިދާޅުވީ ކުރިއަށް އޮތް ދެ ދުވަހުވެސް ރާއްޖޭގެ ސަރަހައްދުގައި ދުންފުހުގެ އަސަރު ހުންނާނެ ކަމަށް ބެލެވޭ ކަމަށެވެ. އެހެންކަމުން، އާންމު ސިއްޙަތު ރައްކާތެރިކުރުމަށްޓަކައި ޚާއްސަ ސަމާލުކަމެއް ދިނުމަށް އެ އިދާރާއިން ވަނީ އެދިފައެވެ. ވައިގެ ސާފުކަން ހުރި މިންވަރު ބަލާ "އައިކިއު އެއާ" ގެ މައުލޫމާތުތަކަށް ބަލާއިރު، އުތުރުން ކުޅުދުއްފުށި، މެދުރާއްޖެތެރެ އަދި ދެކުނުން ފުވައްމުލައް ސިޓީގައި ވައި ވަނީ ވަރަށް ބޮޑަށް ނުސާފުވެފައެވެ.

މިހާރުގެ ތަފާސްހިސާބުތަކަށް ބަލާއިރު، ބައެއް ސަރަހައްދުތަކުގެ ވައިގެ ކޮލިޓީ ހުރީ ރަތް ސަމާލުގައެވެ. މީގެ މާނައަކީ ވައި ނުސާފުވުމުގެ ސަބަބުން ސިއްޙީ ގޮތުން ނޭދެވޭ އަސަރުތައް ކުރުމުގެ ފުރުސަތު ބޮޑުވުމެވެ. ޚާއްސަކޮށް ފުއްޕާމެއާއި ހިތުގެ ބަލިތައް ހުންނަ ފަރާތްތަކަށް މީގެ ނުރައްކާ ބޮޑުވާނެ ކަމަށް އެޗްޕީއޭއިން ފާހަގަކުރެއެވެ.

މި ހާލަތާ ގުޅިގެން ބޭރުގައި ކުޅިވަރު ކުޅުމާއި ކަސްރަތު ކުރުން ފަދަ ކަންކަން މަޑުޖައްސާލުމަށް ވަނީ އިލްތިމާސްކޮށްފައެވެ. އަދި ބޭރަށް ނުކުންނަ ވަގުތުތަކުގައި "މާސްކު އެޅުމަށާއި، ބޭރުގެ ނުސާފު ވައި ނުވަންނާނެހެން ގޭގެ ދޮރުތައް ލައްޕާފައި ބެހެއްޓުމަށް" އެޗްޕީއޭއިން އިރުޝާދު ދެއެވެ. މީގެ އިތުރުން ގޭތެރޭގައި އެއަރ ޕިއުރިފަޔަރ ބޭނުންކުރުމަކީވެސް ކުރެވިދާނެ ކަމެއް ކަމަށް އެ އިދާރާއިން ވިދާޅުވެއެވެ.

މޫސުމާބެހޭ ޤައުމީ އިދާރާއިން ހާމަކުރި ގޮތުގައި، ވޭތުވެދިޔަ ހަތް ދުވަހަށް ބަލާއިރު ދުންފުހުގެ އަސަރު އެންމެ ބޮޑަށް ކޮށްފައިވަނީ މިއަދުއެވެ. މިކަމުގެ ސަބަބުން ދުރުފެންނަ މިންވަރު ވަނީ 2 ކިލޯމީޓަރަށް ދަށްވެފައެވެ. މެޓް އޮފީހުން ލަފާކުރާ ގޮތުގައި މި އަސަރު ރާއްޖޭގެ ހުރިހާ ސަރަހައްދަކަށްވެސް ފޯރާނެއެވެ.