އަވާމީ ލީގު ބައިވެރިނުކުރެވޭތީ ބަންގްލަދޭޝްގެ އިންތިޚާބު ޝައިޚް ހަސީނާ ކުށްވެރިކުރައްވައިފި

ބަންގްލަދޭޝްގެ ވެރިކަމުން ދުރުކޮށްފައިވާ ޝައިޚް ހަސީނާ، އަންނަ މަހު އެ ގައުމުގައި ބޭއްވުމަށް ހަމަޖެހިފައިވާ އާންމު އިންތިޚާބު ކުށްވެރިކުރައްވައިފިއެވެ.

އިންޑިއާގައި އަރުވާލެވިގެން ހުންނެވި ހަސީނާ މިކަން ހާމަކުރެއްވީ، އޭނާގެ ޕާޓީ ކަމަށްވާ އަވާމީ ލީގަށް އިންތިޚާބުގައި ބައިވެރިވުން މަނާކުރުމާ ގުޅިގެން، ގައުމުގައި ބައިބައިވުން އުފެދިދާނެ ކަމުގެ ބިރު އޮތް ދަނޑިވަޅެއްގައެވެ.

އެސޯސިއޭޓެޑް ޕްރެސް (އޭޕީ) އަށް ފޮނުއްވި މެސެޖެއްގައި ހަސީނާ ވިދާޅުވީ، "ބާކީކުރުމުގެ ތެރެއިން އުފަންވާ ސަރުކާރަކަށް ބައިބައިވެފައިވާ ގައުމެއް އެއްބައިނުކުރެވޭނެ" ކަމަށެވެ. އަދި އާބާދީގެ ބޮޑު ބަޔަކަށް ސިޔާސީ ހަރަކާތްތަކުގައި ބައިވެރިވުމުގެ ފުރުސަތު ނުދިނުމަކީ މުއައްސަސާތަކުގެ އިތުބާރު ގެއްލި، ކުރިމަގުގައި ގައުމު ސަލާމަތީ ހާލަތަކަށް ދާނެ ކަމެއް ކަމަށް އޭނާ އިންޒާރު ދެއްވިއެވެ. ހަސީނާ ވަނީ މިދިޔަ ހުކުރު ދުވަހު ދިއްލީގައި ހުންނަވައިގެން އޮންލައިންކޮށް 100,000 އަށް ވުރެ ގިނަ ސަޕޯޓަރުންނާ މުޚާތަބު ކުރައްވާފައެވެ.

ހަސީނާގެ މި ވާހަކަތަކާ ގުޅިގެން ބަންގްލަދޭޝްގެ ފޮރިން މިނިސްޓްރީން ވަނީ ހިތްހަމަނުޖެހުން ފާޅުކޮށްފައެވެ. އެ މިނިސްޓްރީން ނެރުނު ބަޔާނެއްގައި ބުނީ، އިންޑިއާގައި ހުންނަވައިގެން ހަސީނާ އާންމުކޮށް ވާހަކަދެއްކެވުމުގެ ފުރުސަތު އިންޑިއާ ސަރުކާރުން ދިނުމުން "ހައިރާންވެ އަންތަރީސްވެފައިވާ" ކަމަށެވެ. ބަންގްލަދޭޝް އިން ދަނީ ހަސީނާ އެ ގައުމާ ހަވާލުކުރުމަށް އެދެމުންނެވެ. ނަމަވެސް އިންޑިއާއިން އަދި އެކަމަށް ރަސްމީ ޖަވާބެއް ދީފައެއް ނުވެއެވެ.

ފެބްރުއަރީ 12 ވަނަ ދުވަހު ބޭއްވުމަށް ހަމަޖެހިފައިވާ މި އިންތިޚާބުގައި 127 މިލިއަނަށް ވުރެ ގިނަ މީހުންނަށް ވޯޓުލުމުގެ ހައްގު ލިބިގެންވެއެވެ. މިއީ ހަސީނާގެ 15 އަހަރުވީ ވެރިކަން ވައްޓާލި ފަހުން ބާއްވާ ފުރަތަމަ އިންތިޚާބެވެ. މިހާރުގެ ވަގުތީ ސަރުކާރުގެ ވެރިޔާ މުހައްމަދު ޔޫނުސް ވަނީ މިނިވަން އަދި އިންސާފުވެރި އިންތިޚާބެއް ބާއްވާނެ ކަމަށް ވައުދުވެވަޑައިގެންފައެވެ. ނަމަވެސް އަވާމީ ލީގު ބައިވެރިނުކުރެވޭތީ އިންތިޚާބުގެ ދެފުށް ފެންނަ މިންވަރާ މެދު ސުވާލު އުފެދެއެވެ.

މި އިންތިޚާބުގައި އެންމެ ކުރީގައި އުޅުއްވާނެ ކަމަށް ބެލެވެނީ ކުރީގެ ބޮޑުވަޒީރު ޚާލިދާ ޒިއާގެ ދަރިކަލުން އަދި ބަންގްލަދޭޝް ނޭޝަނަލިސްޓް ޕާޓީ (ބީއެންޕީ) ގެ އެކްޓިން ޗެއާމަން ތާރިގް ރަހްމާން އެވެ. އިންތިޚާބާ އެކު، ގައުމުގެ ގާނޫނުއަސާސީއަށް ބޮޑެތި އިސްލާހުތަކެއް ގެނައުމަށް ފެންނަ ނުފެންނަ ވޯޓެއްވެސް ނެގުމަށް ވަނީ ހަމަޖެހިފައެވެ.

ޔޫނުސްގެ އޮފީހުން ބުނެފައިވަނީ ސަލާމަތީ ބާރުތަކުން އިންތިޚާބުގެ އަމާންކަން ކަށަވަރުކުރާނެ ކަމަށާއި، އެއްވެސް ފަރާތަކަށް ނުފޫޒު ފޯރުވުމުގެ ފުރުސަތު ނުދޭނެ ކަމަށެވެ. ބައިނަލްއަގުވާމީ މޮނިޓަރުންނަށްވެސް ވަނީ އިންތިޚާބު އޮބްޒާވްކުރުމަށް ދައުވަތު ދީފައެވެ. ނަމަވެސް ހަސީނާ ވިދާޅުވަމުން ގެންދަވަނީ ޔޫނުސްގެ ބެލުމުގެ ދަށުން ބަންގްލަދޭޝްއަށް ދުވަހަކުވެސް އިންސާފުވެރި އިންތިޚާބެއް ނުފެންނާނެ ކަމަށެވެ.