1.4 މިލިއަން ފޮލޯވަރުންނާއެކު ޓިކްޓޮކްގައި ޣައްޒާގެ ޙާލަތު ދުނިޔެއަށް ބުނެދެމުން ދިޔަ ބިސާން ޓިކްޓޮކުން ރަސްމީކޮށް ބޭން ކޮށްފި

ޣައްޒާގައި ހިނގަމުންދާ ލާއިންސާނީ އަމަލުތައް ދުނިޔެއަށް ހާމަކޮށްދިނުމުގައި އިސްކޮށް ހަރަކާތްތެރިވާ ފަލަސްތީނުގެ މަޝްހޫރު ނޫސްވެރިޔާ ބިސާން އައުދާގެ ޓިކްޓޮކް އެކައުންޓް އެ ޕްލެޓްފޯމުން ދާއިމީކޮށް ބޭންކޮށްފިއެވެ.

އެމީ އެވޯޑް ހާސިލްކޮށްފައިވާ ބިސާންގެ އެކައުންޓް ބޭންކޮށްފައި މިވަނީ އެމެރިކާގެ އިންވެސްޓަރުންތަކެއް ޓިކްޓޮކް ގަތްތާ މަދު ދުވަސްކޮޅެއްގެ ތެރޭގައެވެ.

ބިސާން އޭނާގެ އިންސްޓަގްރާމް އަދި އެކްސް އެކައުންޓް މެދުވެރިކޮށް ބުނެފައިވަނީ، ވޭތުވެދިޔަ ހަތަރު އަހަރު ދުވަހު އޭނާ ބިނާކުރި 1.4 މިލިއަން ފޮލޯވަރުން ތިބި އެކައުންޓް ޓިކްޓޮކުން ޑިލީޓްކޮށްލާފައިވާ ކަމަށެވެ.

 "އަހަރެން ހީކުރީ ކޮންމެ ފަހަރަކުވެސް ވާހެން އެކައުންޓަށް ހުރަސްތަކެއް ކުރިމަތިވާނެ ކަމަށް، ނަމަވެސް ދާއިމީކޮށް ބޭންކޮށްލާނެ ކަމަކަށް އުންމީދެއް ނުކުރަން،" ޣައްޒާގައި ހުރެ ރެކޯޑްކުރި ވީޑިއޯއެއްގައި ބިސާން ބުންޏެވެ.

މި ނިންމުމާ ގުޅިގެން ބިސާން ވަނީ އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އާއި ޓިކްޓޮކްގެ އެމެރިކާ ގޮފީގެ އައު ސީއީއޯ އެޑަމް ޕްރެސާގެ ވާހަކަތަކަށް އިޝާރާތްކޮށްފައެވެ. ނަތަންޔާހޫ މީގެ ކުރިން ބުނެފައިވަނީ ސޯޝަލް މީޑިއާއަކީ ހަނގުރާމައިގެ މައިދާނުގައި ބޭނުންކުރާ އެންމެ މުހިންމު ހަތިޔާރު ކަމަށާއި، ޓިކްޓޮކް ގަތުމަކީ ވަރަށް މުހިންމު ކަމެއް ކަމަށެވެ. އަދި ޓިކްޓޮކްގެ އައު ސީއީއޯ އެޑަމް ޕްރެސާ ވަނީ "ޒަޔަނިސްޓް" މި ލަފުޒު ބޭނުންކުރުމަކީ ނަފްރަތު އުފެއްދުން ނުވަތަ ހޭޓް ސްޕީޗްގެ ގޮތުގައި ބަލާނެ ކަމަށް ބުނެފައެވެ.

ބިސާން އަކީ އަލްޖަޒީރާގެ އޭޖޭ ޕްލަސްއާ ގުޅިގެން ޣައްޒާގެ ހަގީގަތްތައް ހާމަކުރަމުންދާ ނޫސްވެރިއެކެވެ. އޭނާ އުފެއްދި "އިޓްސް ބިސާން ފްރޮމް ޣައްޒާ - އެންޑް އައި އޭމް ސްޓިލް އެލައިވް" ޑޮކިއުމެންޓްރީއަށް 2024 ވަނަ އަހަރު ވަނީ އެމީ އެވޯޑް ލިބިފައެވެ. ބިސާންގެ އެކައުންޓް ބޭންކުރި ނަމަވެސް، ބައެއް ގައުމުތަކަށް އަދިވެސް އެ އެކައުންޓް ފެންނަ ކަމަށް ރިޕޯޓްތައް ބުނެއެވެ.

މި ކަން ހިނގާފައި މިވަނީ ބޭރުގެ ނޫސްވެރިންނަށް މިނިވަންކަމާއެކު ޣައްޒާއަށް ވަދެ ރިޕޯޓްކުރުމުގެ ހުއްދަ ދިނުމާ މެދު އިޒްރޭލުގެ އެންމެ މަތީ ކޯޓުން ގޮތެއް ނިންމުން އަނެއްކާވެސް ފަސްކޮށްފައިވާ ދަނޑިވަޅެއްގައެވެ. މިއީ ފަލަސްތީނުގެ އަޑު ދުނިޔެއަށް އިއްވުމަށް ހުރަސް އެޅުމަށް ކުރަމުންދާ މަސައްކަތެއްގެ ގޮތުގައި ގިނަ ބަޔަކު ދަނީ ސިފަކުރަމުންނެވެ.