އިސްރާއީލުން އެހީ ހުއްޓުވުމުގެ ސަބަބުން ފިނީގައި ގަނޑުވެގެން ޣައްޒާގައި އިތުރު ތުއްތު ކުއްޖަކު ޝަހީދުވެއްޖެ

އިސްރާއީލުން ޣައްޒާއަށް ބޭނުންވާ އިންސާނީ އެހީއާއި ހިޔާވަހިކަން ފޯރުކޮށްދިނުމަށް ހުރަސްއަޅަމުންދާ ދަނޑިވަޅެއްގައި، ގަދަ ފިނީގެ ސަބަބުން ގާޒާގައި 12 ދުވަހުގެ ތުއްތު ކުއްޖަކު ޝަހީދުވެއްޖެއެވެ.

 ފަލަސްތީނުގެ ސިއްހީ ވުޒާރާއިން ހާމަކުރި ގޮތުގައި، ޣައްޒާ ސިޓީގެ ރަންތިސީ ހޮސްޕިޓަލުގައި މަރުވި ހައިތަމް އަބޫ ކަސް އާއެކު، މި ފިނި މޫސުމުގައި ހައިޕޯތާމިއާ ނުވަތަ ގަދަ ފިނީގެ ސަބަބުން ޝަހީދުވި ކުދިންގެ އަދަދު މިހާރު ވަނީ 11 އަށް އަރާފައެވެ.

ޣައްޒާއަށް ކުރިމަތިވެފައިވާ ބާރުގަދަ ވިލާގަނޑުތަކާއި ވާރޭގެ ސަބަބުން، ގެދޮރު ގެއްލިފައިވާ ފަލަސްތީނު ރައްޔިތުންނަށް ވަނީ އިތުރު ތަކުލީފުތަކަކާ ކުރިމަތިލާން ޖެހިފައެވެ. ސޯޝަލް މީޑިއާގައި ދައުރުވަމުންދާ ވީޑިއޯތަކުން ފެންނަ ގޮތުގައި، ބާރުގަދަ ވަޔާއެކު މީހުން ދިރިއުޅޭ ފޭލިގެތައް އުދުހިގެން ދިއުމާއި، ކުޑަކުދިން ފިނީގައި ތުރުތުރުއަޅާ މަންޒަރު ފެނިގެންދެއެވެ. މީގެ އިތުރުން، ފިނީގެ ސަބަބުން އިމާރާތްތައް ވެއްޓި މިހާތަނަށް 25 މީހުން މަރުވެފައިވާ ކަމަށްވެސް ސިއްހީ ވުޒާރާއިން ބުނެއެވެ.

ޣައްޒާގެ ސިވިލް ޑިފެންސްގެ ތަރުޖަމާނު މަހްމޫދު ބާސަލް ވިދާޅުވީ، މިއީ ހަމައެކަނި މޫސުމީ މައްސަލައެއް ނޫން ކަމަށާއި، މިއީ އިސްރާއީލުން ޣައްޒާ އާރާސްތުކުރުމަށް ބޭނުންވާ ސާމާނު އެތެރެކުރުން ހުއްޓުވުމުގެ ސަބަބުން ކުރިމަތިވެފައިވާ އިންސާނީ ކާރިސާއެއް ކަމަށެވެ. ގިނަ ބަޔަކު ދިރިއުޅެމުންދަނީ ވީދިފައިވާ ފޭލިގެތަކާއި ރެނދުލާފައިވާ އިމާރާތްތަކުގައި ކަމަށާއި، ރަށްތަކުގެ އެތެރޭގައި ޖާގަ ނެތުމުގެ ސަބަބުން ގިނަ ބަޔަކު ފޭލިގެ ޖަހާފައިވަނީ އަތިރިމަތީގައި ކަމަށް އޭނާ ފާހަގަކުރެއްވިއެވެ.

އަލް-ޝިފާ ހޮސްޕިޓަލުގެ މެޑިކަލް ޓީމުތަކުން ބުނާ ގޮތުގައި، މިހާރު ފެތުރެމުންދާ ބަލިތަކަކީ ކޮވިޑް-19 ނުވަތަ އާދައިގެ ރޯގާއެއް ނޫނެވެ. މިއީ މާ ނުރައްކާތެރި އަދި ބާރަށް ފެތުރޭ ބަލިތަކެއް ކަމަށް އެ ފަރާތްތަކުން ފާހަގަކުރެއެވެ. އަންރުވާ (UNRWA) އިންވެސް ވަނީ ޣައްޒާގެ ގޯސް މޫސުމާއި މީހުން ތޮއްޖެހިފައި ތިބުމުގެ ސަބަބުން ނޭވާލާ ނިޒާމުގެ ބަލިތަކާއި ހަމުގެ ބަލިތައް އިތުރުވަމުންދާކަން ކަށަވަރުކޮށްދީފައެވެ.

އިސްރާއީލުގެ ހަމަލާތަކުގައި ޣައްޒާގެ 80 އިންސައްތަ އިމާރާތްތައް ވަނީ ސުންނާފަތިވެފައެވެ. އޮކްޓޯބަރު މަހު ހަމަލާ ބަދަލުކުރުން ހުއްޓާލުމަށް އެއްބަސްވި ނަމަވެސް، އިސްރާއީލުން ދަނީ އެ އެއްބަސްވުމާ ހިލާފަށް ފަލަސްތީނު މީހުން މަރަމުންނެވެ. އަދި ޓްރަމްޕްގެ ސުލްހައިގެ ޕްލޭނުގައި އެހީ ފޯރުކޮށްދިނުމަށް ހުރަސްނޭޅުމަށް ބުނެފައިވީ ނަމަވެސް، އިސްރާއީލުން ދަނީ އެހީގެ ސާމާނު އެތެރެކުރުން ހުއްޓުވައި، އެހީއަކީ ހަނގުރާމައިގެ ހަތިޔާރެއްގެ ގޮތުގައި ބޭނުންކުރަމުން ކަމަށް 100 އަށްވުރެ ގިނަ އެހީދޭ ޖަމިއްޔާތަކުން ވަނީ ތުހުމަތުކޮށްފައެވެ.