ބޭރުން ފަރުވާ ހޯދުމަށް ހުއްދަ ނުލިބި ޣައްޒާގެ 1،268 ބަލިމީހުން މަރުވެއްޖެ ކަމަށް ހެލްތު މިނިސްޓްރީން ބުނެފި

ޣައްޒާގެ ސިއްހަތާ ބެހޭ ވުޒާރާއިން އަންގާރަ ދުވަހު އިންޒާރު ދީފައިވާ ގޮތުގައި، ބޭރު ގައުމުތަކުން ސިއްހީ ފަރުވާ ހޯދުމަށް ފުރުމުގެ ހުއްދަ ނުލިބި މަޑުކުރަން ޖެހުމުގެ ސަބަބުން މިހާތަނަށް 1،268 ބަލިމީހުން ވަނީ ޝަހީދުވެއްޖެއެވެ.

 ރަފަހް ބޯޑަރު ބަންދުކޮށްފައި އޮތުމުގެ ސަބަބުން ބަލިމީހުންނާއި ޒަހަމްވެފައިވާ މީހުންގެ ހާލަތު އިތުރަށް ގޯސްވަމުންދާ ކަމަށް އޮފިޝަލުން ފާހަގަކުރެއްވިއެވެ.

އެމިނިސްޓްރީން ހާމަކުރި ގޮތުގައި ގާތްގަނޑަކަށް 20،000 މީހުންނަށް ބޭރުން ފަރުވާ ހޯދުމުގެ ހުއްދަ ލިބިފައިވީ ނަމަވެސް، ޣައްޒާއިން ބޭރަށް ނުދެވި އެމީހުން ތިބީ މަޑުކުރަން ޖެހިފައެވެ. ބޭހާއި ސިއްހީ ސާމާނުގެ ދަތިކަމާއި، ހޮސްޕިޓަލްތަކުގެ އިންފްރާސްޓްރަކްޗަރ ހަލާކުވެފައިވުމުގެ ސަބަބުން ޣައްޒާއިން ބޭރުން ފަރުވާ ހޯދަންޖެހޭ މީހުންގެ ލިސްޓު ދަނީ ދިގުވަމުންނެވެ.

ސިއްހީ އޮފިޝަލުން ވިދާޅުވި ގޮތުގައި 440 ބަލިމީހެއްގެ ހާލު ވަރަށް ނާޒުކެވެ. އަދި އެމީހުންނަށް ވަގުތުން ފުރާނަ ސަލާމަތްކުރަނިވި ފަރުވާ ބޭނުންވެއެވެ. މީގެ ތެރޭގައި ކެންސަރު ބަލީގެ 4،000 އެއްހާ މީހުން ހިމެނޭއިރު، އެމީހުންނަށް ބޭނުންވާ ހާއްސަ ފަރުވާތަކާއި ޓެސްޓުތައް ޣައްޒާގައި ކުރެވޭނެ އެއްވެސް މަގެއް ނެތެވެ.

މިނިސްޓްރީގެ ތަފާސްހިސާބުތަކުން ދައްކާ ގޮތުގައި ފަރުވާއަށް ބޭނުންވެފައިވާ މީހުންގެ ތެރޭގައި 4،500 ކުޑަކުދިން ހިމެނެއެވެ. 2024 މެއި 7 ވަނަ ދުވަހު އިސްރާއީލުން ރަފަހް ބޯޑަރު ބަންދުކުރި ފަހުން، ޣައްޒާއިން ބޭރަށް ފަރުވާއަށް ފޮނުވުނީ އެންމެ 3،100 ބަލިމީހުންނަށެވެ.

ހެލްތު މިނިސްޓްރީން ބާރުއަޅައި ބުނެފައިވަނީ، ރަފަހް ބޯޑަރު އަލުން ހުޅުވައި، ބަލިމީހުންނަށް ފުރުސަތު ދިނުމާއި، އަސާސީ ސިއްހީ ސާމާނު ގަވާއިދުން ވައްދަން ފެށުމަކީ މިހާރު ޣައްޒާގެ ބަލިމީހުންގެ ފުރާނަ ސަލާމަތްކުރުމަށް އޮތް ހަމައެކަނި މަގު ކަމަށެވެ.