އަސީރުން ބަދަލުކުރުމުގެ ފަހު މަރުހަލާގައި ފަލަސްތީނުގެ 15 މީހެއްގެ ހަށިގަނޑު އިސްރާއީލުން ހަވާލުކޮށްފި

ޣައްޒާގައި އިސްރާއީލުން ހިންގަމުންދާ ލާއިންސާނީ އުދުވާނުގެ ތެރެއިން އަސީރުން ބަދަލުކުރުމަށް އެއްބަސްވި އެއްބަސްވުމުގެ ފަހު މަރުހަލާގެ ދަށުން، ފަލަސްތީނުގެ 15 މީހެއްގެ ހަށިގަނޑު އިސްރާއީލުން ރެޑް ކްރޮސްއާ ހަވާލުކޮށްފިއެވެ.

މިއީ މިދިޔަ ހަފްތާގައި އިސްރާއީލު ސިފައިން ހޯދި އެ ގައުމުގެ އެންމެ ފަހު އަސީރުގެ ހަށިގަނޑުގެ ބަދަލުގައި ހަވާލުކުރި ހަށިގަނޑުތަކެކެވެ.

ޣައްޒާގައި ހުންނަވައި އަލްޖަޒީރާގެ ރިޕޯޓަރު ހާނީ މަހްމޫދު ރިޕޯޓްކޮށްފައިވާ ގޮތުގައި، މި ހަށިގަނޑުތައް ހަވާލުކުރާނީ ޚާން ޔޫނިސްގެ ނާސިރު ހޮސްޕިޓަލަށް ނުވަތަ ޣައްޒާ ސިޓީގެ އައްޝިފާ ހޮސްޕިޓަލަށް ކަމެއް ކަށަވަރު ކުރުމުގެ މަސައްކަތް ފަލަސްތީނުގެ ކަމާބެހޭ ފަރާތްތަކުން ދަނީ ކުރަމުންނެވެ. އިސްރާއީލުން ވަނީ އޮކްޓޯބަރު 7، 2023 ގައި މަރުވި އެ ގައުމުގެ ފުލުހެއް ކަމަށްވާ ރޭން ގްވިލީގެ ހަށިގަނޑު އިއްޔެ ވަޅުލާފައެވެ. މިއީ ހަމާސްގެ ބެލުމުގެ ދަށުގައި ހުރި އިސްރާއީލުގެ އެންމެ ފަހު އަސީރުގެ ހަށިގަނޑެވެ.

އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ، ގްވިލީގެ ޖަނާޒާގައި ވާހަކަދައްކަވަމުން އޭނާއަކީ "އިސްރާއީލުގެ ބަތަލެއް" ކަމަށް ސިފަކުރައްވައި، އިސްރާއީލަށް ހަމަލާދޭ ކޮންމެ ބަޔަކު އޭގެ ބަދަލުގައި ބޮޑު އަގަކުން ޖޫރިމަނާވާން ޖެހޭނެ ކަމުގެ އިންޒާރު ދެއްވާފައެވެ. ޣައްޒާގައި ތިބި ހުރިހާ އަސީރުން އަނބުރާ ގެނައުމުގެ މަސައްކަތް ކުރިއަށް ގޮސްފައިވަނީ އެކި ފަހަރު މަތިން ހެދި ސުލްހައިގެ އެއްބަސްވުންތަކާއި އަސީރުން ބަދަލުކުރުމުގެ މަރުހަލާތަކުގެ ތެރެއިންނެވެ.

އަސީރުން ބަދަލުކުރެވުނު ނަމަވެސް، އިސްރާއީލުގެ ޖަލުތަކުގައި އެއްވެސް ދައުވާއަކާ ނުލައި ފަލަސްތީނުގެ އެތައް ހާސް ބަޔަކު އަދިވެސް އެބަތިއްބެވެ. އދ. ގެ ރިޕޯޓްތަކުން ދައްކާގޮތުގައި 9,400 އެއްހާ ފަލަސްތީނު މީހުން އިސްރާއީލުން ހައްޔަރުކޮށްފައިވާއިރު، އޭގެ ތެރެއިން ގިނަ ބަޔަކަށް ޖިސްމާނީ އަދި ނަފްސާނީ އަނިޔާތައް ލިބެމުންދެއެވެ. ފިޒިޝަންސް ފޯ ހިއުމަން ރައިޓްސް-އިސްރާއީލުން ހާމަކުރި ގޮތުގައި، އިސްރާއީލުގެ ބަންދުގައި ތިއްބާ މަދުވެގެން 94 ފަލަސްތީނު މީހުން ވަނީ އަނިޔާވެރިކަމާއި ބޭސްފަރުވާ ނުލިބުމުގެ ސަބަބުން މަރުވެފައެވެ.

މި ހަނގުރާމައިގައި މިހާތަނަށް 71,000 އަށްވުރެ ގިނަ ފަލަސްތީނު މީހުން މަރުވެފައިވާކަމަށް ރިޕޯޓްތައް ބުނެއެވެ. އިސްރާއީލުގެ ނޫހެއް ކަމަށްވާ ހާއާރެޓްޒްއިން ބުނާގޮތުގައި، އިސްރާއީލު ސިފައިން މިހާރު ވަނީ ޣައްޒާގެ ހެލްތު މިނިސްޓްރީގެ ތަފާސްހިސާބުތައް ފުރަތަމަ ފަހަރަށް ބަލައިގަންނަން ފަށާފައެވެ.

މިހާރު ކުރިއަށްދާ ސުލްހައިގެ އެއްބަސްވުމުގެ ދަށުން ރަފަހް ބޯޑަރު ހުޅުވުމަށް ފަލަސްތީނުގެ ރައްޔިތުން ދަނީ އިންތިޒާރު ކުރަމުންނެވެ. އަސީރުން ބަދަލުކުރުމުގެ މަރުހަލާ ނިމުމުން، ޣައްޒާގެ ހިންގުން ފަލަސްތީނުގެ ޓެކްނޮކްރެޓުންގެ ކޮމިޓީއަކާ ހަވާލުކުރުމަށް ވަނީ ރޭވިފައެވެ.