އެޗްޑީސީގެ ރޯދަ ބާޒާރު ހޮނިހިރު ދުވަހުގެ ނިޔަލަށް ކުރިއަށްދާނެ

ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން އިންތިޒާމުކޮށްގެން ކުރިއަށްގެންދާ ރޯދަ ބާޒާރު، މި ހިނގާ ޖެނުއަރީ މަހުގެ 31 ވާ ހޮނިހިރު ދުވަހުގެ ނިޔަލަށް ކުރިއަށްދާނެ ކަމަށް އެ ކޯޕަރޭޝަނުން ހާމަކޮށްފިއެވެ.

ކުރިއަށް އޮތް 1447 ވަނަ އަހަރުގެ ރަމަޟާން މަހަށް ތައްޔާރުވުމުގެ ގޮތުން ކުރިއަށްގެންދާ މި ބާޒާރުގައި ޖުމްލަ 49 ސްޓޯލެއް ބައިވެރިވެފައިވެއެވެ. މި ހަފްތާ ބަންދުގެ ނިޔަލަށް ބާޒާރު ކުރިއަށްދާއިރު، މިއީ އާންމުންނަށް ބޭނުންވާ ތަކެތި އެއްތަނަކުން ފަސޭހަކަމާއެކު ހޯދުމަށް ހުޅުވާލެވިފައިވާ ރަނގަޅު ފުރުސަތެކެވެ.

މި ބާޒާރުގެ ތެރެއިން މުނިފޫހިފިލުވުމުގެ ހަރަކާތްތައްވެސް ކުރިއަށްދާނެއެވެ. އެގޮތުން މާދަމާގެ ވަގުތެއްގައި ރާއްޖޭގެ މަޝްހޫރު ބޮޑުބެރު ގްރޫޕެއް ކަމަށްވާ "ހަބޭސް ބޮޑުބެރު ގްރޫޕް" ގެ ހުށަހެޅުންތައް ފެނިގެންދާނެ ކަމަށް އެޗްޑީސީން މައުލޫމާތުދެއެވެ.

އެޗްޑީސީން ބުނީ މި ބާޒާރަކީ މުޖުތަމައުގެ ގުޅުން ބަދަހިކުރުމަށާއި، ރޯދަ މަހަށް ބޭނުންވާ ތަކެތި ހޯދުމުގައި އާންމުންނަށް ލުއިފަސޭހަ މަގަކަށް ހެދުމުގެ މަގްސަދުގައި ކުރިއަށްގެންދާ ހަރަކާތެއް ކަމަށެވެ. އެހެންކަމުން ވީހާވެސް ގިނަ ބަޔަކު މި ބާޒާރަށް ޒިޔާރަތްކުރުމަކީ އެ ކޯޕަރޭޝަންގެ އެދުމެކެވެ.