15 އަހަރުން ދަށުގެ ކުދިންގެ ފޯނު ބެލުމަށް ކޯޓު އަމުރު ނުނެރެވޭނެކަމަށް ހައި ކޯޓުން ނިންމައިފި

އުމުރުން 15 އަހަރުން ދަށުގެ ކުދިންނަށް ކުރެވޭ ތުހުމަތުތަކާ ގުޅިގެން އެ ކުދިންގެ މޮބައިލް ފޯނު ފަދަ ތަކެތި ކޯޓު އަމުރުގެ ދަށުން ފުލުހުންނަށް ނުބެލޭނެ ކަމަށް ހައި ކޯޓުން ހުކުމްކޮށްފިއެވެ.

މި މައްސަލަ ހައި ކޯޓަށް ހުށަހެޅުނީ 14 އަހަރުގެ ކުއްޖަކަށް ތުހުމަތު ކުރެވޭ ކުށްތަކަކާ ގުޅިގެން އެ ކުއްޖާގެ ފޯނު ހިފެހެއްޓުމަށާއި ފޯނު ހުޅުވުމުގެ އަމުރެއް ނެރެދިނުމަށް ފުލުހުން ޖުވެނައިލް ކޯޓުގައި އެދުމުންނެވެ. ޖުވެނައިލް ކޯޓުން މިދިޔަ މަހު ނިންމާފައި އޮތީ އެއީ ޖިނާއީ މަސްއޫލިއްޔަތު އުފުލަންޖެހޭ އުމުރުގެ ކުއްޖަކަށް ނުވާތީ އެ ކުއްޖާގެ މައްޗަށް އެފަދަ އަމުރެއް ނުނެރެވޭނެ ކަމަށެވެ.

ހައި ކޯޓުގެ ހުކުމުގައި ބަޔާންކޮށްފައިވަނީ ޖިނާއީ މަސްއޫލިއްޔަތު އުފުލަން ނުޖެހޭ ކުދިންނާ މެދު އެފަދަ ފިޔަވަޅެއް އެޅުމަކީ ގާނޫނު ހުއްދަކުރާ ކަމެއް ނޫން ކަމަށެވެ. އަދި މީހުންގެ ޒާތީ މުއާމަލާތްތަކަކީ ހުރުމަތްތެރިވެގެންވާ ކަންކަން ކަމަށް ގާނޫނު އަސާސީގައި ބުނާއިރު، އެ ހައްގު ހިފެހެއްޓޭ ގޮތަށް ކޯޓަކަށް އަމުރު ނެރެވޭނީ ގާނޫނަކުން ހުއްދަ ލިބިގެން އަދި ގާނޫނު ހުއްދަކުރާ މިންވަރަކަށް އެކަނި ކަމަށް ހުކުމުގައި ބަޔާންކޮށްފައިވެއެވެ.

ތިން ފަނޑިޔާރުންގެ އިއްތިފާގުން ކުރެވުނު މި ހުކުމުގައި އިތުރަށް ފާހަގަކޮށްފައިވަނީ 15 އަހަރުނުވާ ކުއްޖަކާ ދެކޮޅަށް ކޯޓުން އެފަދަ އަމުރެއް ނެރުނަސް، އެ އަމުރަށް ކުއްޖާ ތަބާނުވެއްޖެ ނަމަ ގާނޫނީ ގޮތުން އިތުރަށް ކުރެވޭނެ ކަމެއް ވެސް ނޯންނާނެ ކަމަށެވެ. އެފަދަ ކުދިންނާ މެދު ކުރެވޭނެ ކަމަކީ ރިހެބިލިޓޭޓްކުރަން މަސައްކަތް ކުރުން ކަމަށްވެސް ހުކުމުގައި ބަޔާންކޮށްފައިވެއެވެ.

މި މައްސަލަ ހައި ކޯޓުން ބެއްލެވީ ފަނޑިޔާރު އަބްދުލްމާނިއު ހުސައިނާއި ފަނޑިޔާރު މުހައްމަދު ޝަނީޒް އަބްދުﷲ އާއި ފަނޑިޔާރު މުހައްމަދު ސަލީމެވެ.

މި ނިންމުން ނިންމާފައިވަނީ ސަރުކާރުން ޖިނާއީ ކުށުގެ މަސްއޫލިއްޔަތު އުފުލަންޖެހޭ އުމުރު 12 އަހަރަށް ދަށްކުރަން ގާނޫނަށް އިސްލާހު ހުށަހަޅާނެ ކަމަށް އިއުލާންކޮށްފައިވަނިކޮށެވެ.