ހަނީމޫނަށް ހަނދަށް ދެވޭގޮތަށް ހަނދުގައި ހޮޓަލެއް ބިނާކުރަނީ

ސެން ފްރެންސިސްކޯގެ ސްޓާޓްއަޕް ކުންފުންޏެއް ކަމަށްވާ "ޖީއާރްޔޫޫ ސްޕޭސް" އިން ހަނދުގައި ދާއިމީ ހޮޓަލެއް ބިނާކުރުމުގެ އުންމީދީ މަޝްރޫއެއް އިއުލާންކޮށްފިއެވެ. މިއީ އިންސާނުންގެ ތާރީޚުގައި ބިމުން ބޭރުގައި ބިނާކުރެވޭ ފުރަތަމަ ދާއިމީ ހޮޓަލަށް ވާނެ ކަމަށް އެ ކުންފުންޏުން ބުނެއެވެ.

"ގެލެކްޓިކް ރިސޯސް ޔޫޓިލައިޒޭޝަން ސްޕޭސް"  އިން ހާމަކުރި ގޮތުގައި، މި މަޝްރޫއު ކުރިއަށް ގެންދާނީ އެކި މަރުހަލާތަކަކަށް ބަހާލައިގެންނެވެ. އެންމެ ފުރަތަމަ "ހައި-އެންޑް" ލޫނާ ޓޫރިޒަމް ޕްރޮގްރާމެއް ފަށައި، އޭގެ ފަހުން ހަނދުގައި ދާއިމީ ހޮޓަލެއް ބިނާކުރާނެއެވެ. މި ހޮޓާ ބިނާކުރުމުގައި ބޭނުންކުރާނީ ހަނދުގެ ފަސް  ބޭނުންކޮށްގެން ތައްޔާރުކުރާ ގާ ކަމަށް އެ ކުންފުންޏުން މައުލޫމާތުދެއެވެ.

މި މަޝްރޫއާ ގުޅޭގޮތުން ޖީ.އާރް.ޔޫ ސްޕޭސްގެ ފައުންޑަރ ސްކައިލާ ޗޭން ވިދާޅުވީ،  މިއަދު މިތިބީ އިންސާނުންނަށް އެހެން ގްރަހެއްގައި ދިރިއުޅެވޭނެ ފަދަ މުހިންމު ދަނޑިވަޅެއްގައި ކަމަށެވެ. އަދި ހަނދުގައި ދިރިއުޅުމުގެ މައްސަލަ ހައްލުނުކޮށް އިންސާނުންނަށް ދުނިޔެއިން ބޭރަށް ފުޅާނުވެވޭނެ ކަމަށްވެސް އޭނާ ފާހަގަކުރެއްވިއެވެ.

މި ހޮޓަލުގެ ފަރުމާ ދައްކާލުމަށް އާންމުކުރި ފޮޓޯތަކުން ފެންނަ ގޮތުގައި، މެދުތެރޭގައި ބޮޑު ހުސްތަން ހުންނައިރު، ތިން ފަރާތަކަށް އިމާރާތުގެ ބައިތައް ފެތުރިފައި ހުރެއެވެ. މި ހޮޓަލުގެ ބޭރު ފާރުތައް ހުންނާނީ ހަނދުގެ ފަސް ބޭނުންކޮށްގެމް ހަދާފައިވާ އަޅިކުލައިގެ ގާތަކުން ފަރުމާކުރެވިފައެވެ.

ކުންފުނިން އަމާޒު ހިފާފައިވަނީ 2032 ވަނަ އަހަރާ ހަމައަށް ހޮޓަލުގެ ފުރަތަމަ ފިޔަވަހި ހަނދުގައި ގާއިމުކުރުމަށެވެ. މި ހޮޓަލުގައި އެއްފަހަރާ 10 މެހެމާނުންނަށް ތިބެވޭނެ ކަމަށާއި، ބްލޫ އޮރިޖިން ނުވަތަ ސްޕޭސް އެކްސް ފަދަ ކުންފުނިތަކުގެ ފްލައިޓްތަކުގައި އެތަނަށް ދެވޭނެ ކަމަށް ވެއެވެ. މި ހޮޓާ ހާއްސަކޮށްފައިވަނީ އާދަޔާ ހިލާފު ތަޖުރިބާތައް ބޭނުންވާ މީހުންނާއި، ޖައްވީ ދަތުރުތަކަށް ޝައުގުވެރިވާ ފަރާތްތަކުގެ އިތުރުން "ހަނީމޫން" ފާހަގަކުރަން ބޭނުންވާ ފަރާތްތަކަށެވެ.

މި މަޝްރޫއު އަވަސްކުރުމަށް ބާރު ލިބުނީ އެމެރިކާގެ ރައީސް ޓްރަމްޕާއި ނާސާގެ އެޑްމިނިސްޓްރޭޓަރ ޖެރެޑް އައިސަކްމަން، 2030 ވަނަ އަހަރާ ހަމައަށް ހަނދުގައި ދާއިމީ ބޭހެއް ގާއިމުކުރުމަށް ނިންމެވި ނިންމެވުމާ ގުޅިގެން ކަމަށް ކުންފުންޏުން ބުނެއެވެ.

ޖީ.އާރް.ޔޫ ސްޕޭސްގެ ފައުންޑަރ ސްކައިލާ ޗޭން އަކީ ކުރިން ޓެސްލާ ކުންފުނީގައި މަސައްކަތް ކުރެއްވި އަދި ނާސާގެ އެހީގައި ޖައްވަށް ފޮނުވި 3D ޕްރިންޓަރެއްގެ މަސައްކަތުގައި އުޅުއްވި ބޭފުޅެކެވެ. މި މަޝްރޫއަށް ފަންޑު ކުރަނީ ސްޕޭސް އެކްސް ފަދަ ކުންފުނިތަކަށް އިންވެސްޓްކުރާ ފަރާތްތަކުންނެވެ.