ދީން / ޚަބަރު
އުނގެނުމަކީ ސުވަރުގެއަށް މަގުފަހިކޮށްދޭ މަތިވެރި ޖިހާދެއް: ހުކުރު ޚުޠުބާ
ބެލެނިވެރިއެއް އަދި ދެ ދަރިވަރުން ފޮޓޯ: އޭއައި
އުނގެނުމުގެ މަގަކީ ދިގު އަދި ބުރަ މަސައްކަތެއް ނަމަވެސް، އެއީ ސުވަރުގެއަށް މަގުފަހިކޮށްދޭ އަދި އަޖުރު މަތިވެރި ޖިހާދެއް ކަމުގައި މިއަދުގެ ހުކުރު ޚުޠުބާގައި ވިދާޅުވެއްޖެއެވެ.
"ވަށައިޖެހޭ ތަޢުލީމުގެ މަތީގައި އުންމަތް ބިނާކުރާށެވެ!" މި މައުޟޫއަށް ރާއްޖޭގެ އެކިކި ކަންކޮޅުތަކުގައި އިއްވި ޚުޠުބާގައި ބުނީ، މަދަރުސާތަކުގެ ދޮރޯށިތަކުން ދަރިވަރުން ވަންނަ މަންޒަކީ އުންމީދުތައް އައުކޮށްދޭ މަންޒަރެއް ކަމަށެވެ. އަދި ދަރީންނަކީ މާތް الله އަހަރެމެންނާ ހަވާލުކުރައްވާފައިވާ އަގުބޮޑު އަމާނާތެއް ކަމަށާއި، މިއީ އެ ކުދިންގެ މުސްތަޤުބަލު ބިނާކުރުމުގެ އައު ބާބެއްގެ ފެށުން ކަމަށްވެސް ޚުޠުބާގައި ފާހަގަކުރެއްވިއެވެ.
އިސްލާމްދީނުގައި ތަޢުލީމަކީ ހަމައެކަނި ދުންޔަވީ ވަޒީފާއަކަށް ތައްޔާރުވުމެއް ނޫންކަން ފާހަގަކުރައްވައި ޚުޠުބާގައި ވިދާޅުވީ، ތަޢުލީމާއި ތަރުބިޔަތު ވާންޖެހޭނީ ކުދިންގެ ބުއްދިއާއި އަޚުލާޤަށް ފުރިހަމަކަން ގެނެސްދޭ، ޞާލިޙު އިންސާނަކު ބިނާކުރުމަށް ފޯރުކޮށްދެވޭ ވަށައިޖެހޭ ތަޢުލީމަކަށް ކަމަށެވެ. މުދައްރިސުން ދަރިވަރުންގެ ބުއްދި ތަރައްޤީކޮށްދޭ ފަދައިން، އެ ކުދިންގެ ހިތްތަކުގައި އީމާންކަމާއި މަތިވެރި އަޚުލާޤުގެ ބިންގާ އަޅައިދީ، ރޫޙާނީ ދިރުން ގެނެސްދިނުމަކީ ނުހަނު މުހިންމު ކަމެއް ކަމަށް ޚުޠުބާގައި ވިދާޅުވިއެވެ.
ޢިއްޒަތްތެރި މުދައްރިސުންނޭވެ! ކޮންމެ މާއްދާއެއް ކިޔަވައިދިން ކަމުގައި ވިޔަސް އިސްލާމްދީނުގެ އަޞްލުތަކާއި ތަރަހައިގެ ތެރެއަށް ފެއްތުމަކީ ތިޔަ ލޮބުވެތި މުދައްރިސުންގެ މަސްއޫލިއްޔަތެއް. އެއީ ނުހަނު ބޮޑު އަމާނާތެއް
ޚުޠުބާ
ބެލެނިވެރިންނަށް މުޚާޠަބުކޮށް ޚުޠުބާގައި ގޮވާލީ، ދަރިވަރުންގެ ޞިއްޙަތާއި ޖިސްމާނީ އަދި ނަފުސާނީ ބަދަލުތަކަށް ހޭލުންތެރިވެ، އެ ކުދިންގެ އެންމެ ގާތް އެކުވެރިޔާއަށް ވުމަށެވެ. އަދި ކާމިޔާބީގައި ބައިވެރިވެ، ނާކާމިޔާބީގައި އަތުގައި ހިފައި، އައު ޢަޒުމަކާއެކު ކުރިއަށްދާން ހިތްވަރުދޭ ބަޔަކަށް ވުމަށް ބެލެނިވެރިންނަށް އިލްތިމާސްކުރެއްވިއެވެ.
ކަމާބެހޭ އިދާރާތަކަށް އިޝާރާތްކުރައްވައި ޚުޠުބާގައި ވިދާޅުވީ، ތަޢުލީމީ ސިޔާސަތުތައް ޒަމާނާ ގުޅޭގޮތަށް މުރާޖަޢާކޮށް ހަރުދަނާކުރަން ޖެހޭ ކަމަށެވެ. އަދި މަންހަޖުތަކާއި މުޤައްރަރުތައް އިލާހީ މަންހަޖާ އެއްގޮތަށް، ދުރު ރާސްތާގެ ސާބިތު އަމާޒުތަކެއްގެ މައްޗަށް ބިނާކުރުމަކީ އަންނާން އޮތް ޖީލުތަކަށްޓަކައި ކޮނޑުގައި އެޅިފައިވާ ބޮޑު މަސްއޫލިއްޔަތެއް ކަމުގައި ވިދާޅުވިއެވެ.
ޢިލްމު އުނގެނުމުގެ އަޞްލު މަޤްޞަދަކީ ހަމައެކަނި އިމްތިޙާނުތަކުން ފާސްވުން ނޫން ކަމަށާއި، އެއީ އިންސާނާގެ ބުއްދިއާއި ޒަމީރު ހޭލައްވައިލާ ދިރުމެއް ކަމަށް ޚުޠުބާގައި ބަޔާންކުރެއްވިއެވެ. އަދި މިއަދު އުންމަތް ބޭނުންވަނީ ދީނީ އަދި ދުންޔަވީ ޢިލްމުގެ މާހިރުން ކަމަށާއި، އަމާނާތްތެރި، ޢަދުލުވެރި، އަދި ޤައުމީ މަޞްލަޙަތު އިސްކުރާ ޖީލެއް ބިނާކުރުމަށް އެންމެން އެކުގައި މަސައްކަތް ކުރުމަށް ޚުޠުބާގައި ވަނީ ގޮވާލާފައެވެ.
