ނައްތާލަންވެފައި ހުރި މުސްޙަފްތައް ބަލައިގަތުމުގެ މުއްދަތު ސިޓީ ކައުންސިލުން އިތުރުކޮށްފި

މާލެ ސިޓީގެ ގޭގޭގައި ހުރި ބާވެ ހަލާކުވެފައިވާ މުސްޙަފްތަކާއި ދީނީ ލިޔުންތައް ނައްތާލުމަށްޓަކައި، އެ ތަކެތި ސިޓީ ކައުންސިލާ ހަވާލުކުރުމަށް ހުޅުވާލި ފުރުޞަތު އެ އިދާރާއިން އިތުރުކޮށްފިއެވެ.

 މާލެ ސިޓީ ކައުންސިލުން ނެރުނު ބަޔާނެއްގައި ބުނެފައިވަނީ، ނައްތާލަން ބޭނުންވާ މުސްޙަފްތަކާއި، ކީރިތި ޤުރުއާނުގެ އާޔަތްތަކާއި ކީރިތި ރަސޫލާ (ޞ)ގެ ޙަދީޘްފުޅުތައް ލިޔެފައިވާ ފޮތްތަކާއި ލިޔުންތައް ބަލައިގަތުމުގެ މުއްދަތު މިހާރު އިތުރުކޮށްފައިވާ ކަމަށެވެ.

ކުރިން މި ތަކެތި ބަލައިގަތުމަށް ހަމަޖެހިފައި އޮތީ މި މަހުގެ 24 އިން 29 ގެ ނިޔަލަށެވެ. ނަމަވެސް، ކައުންސިލުން މިއަދު ހާމަކުރި ގޮތުގައި މި މުއްދަތު މިހާރު ވަނީ 31 ޖެނުއަރީ 2026 އިން ފެށިގެން 5 ފެބްރުއަރީ 2026 ގެ ނިޔަލަށް އިތުރުކޮށްފައެވެ. މި މުއްދަތުގެ ތެރޭގައި ކޮންމެ ދުވަހެއްގެ ހެނދުނު 9:00 އިން މެންދުރު 12:00 އަށް އަދި މެންދުރު ފަހު 1:00 އިން ހަވީރު 5:00 އަށް ތަކެތި ބަލައިގަންނާނެއެވެ.

ތަކެތި ބަލައިގަންނާނެ ތަންތަން
މާލެ ސިޓީގެ ތިން ސަރަޙައްދަކުން މި ތަކެތި ބަލައިގަތުމަށް ވަނީ ހަމަޖެހިފައެވެ:

މާލެ: ސިނަމާލެ 3 ގެ ގޯތިތެރެ (ގަލޮޅު މަދުރަސާ ކުރިމަތިން ބުރުޒުމަގުން ސިނަމާލެ 3 ގެ ގޯތިތެރެއަށް ވަދެވޭ ގޭޓުން އެތެރެ)
ވިލިމާލެ: މާލޭ ސިޓީ ކައުންސިލް އިދާރާގެ ވިލިމާލެ ސެކްޝަން
ހުޅުމާލެ: މާލޭ ސިޓީ ކައުންސިލް އިދާރާގެ ހުޅުމާލެ އޮފީސް
ސިޓީ ކައުންސިލުން ބުނެފައިވަނީ މި ފުރުޞަތަކީ ހަމައެކަނި ގޭގޭގައި ހުރި، ބާވެ ނުވަތަ ހަލާކުވެފައިވާ ތަކެތި ނައްތާލުމަށް ދެވޭ ފުރުޞަތެއް ކަމަށެވެ. މިކަމާ ގުޅޭ އިތުރު މަޢުލޫމާތު ސާފުކުރެއްވުމަށް ބޭނުންފުޅުވާ ފަރާތްތަކުން 7994565 ނަންބަރު ފޯނާ ގުޅުއްވުމަށް އެ އިދާރާއިން ވަނީ އެދިފައެވެ.