އަޚްލާޤީ ރީތި ސިފަތަކަށް ދަރިވަރުން އަހުލުވެރިކުރުވުމުގެ "ބިންގާ" ޕްރޮގްރާމެއް ސްކޫލްތަކުގައި ފަށަނީ

ސްކޫލް ދަރިވަރުންގެ ކިބައިގައި އަޚްލާޤީ ރީތި ސިފަތަކާއި އާދަތައް އަށަގަންނުވައި، ދީނީ ކަންކަމަށް ލޯބިޖެއްސުމުގެ މަޤްޞަދުގައި ތަރުބަވީ ޚާއްސަ ޕްރޮގްރާމް "ބިންގާ" ކުރިއަށް ގެންދިޔުމަށް ތަޢުލީމީ ވުޒާރާއިން ހުރިހާ ސްކޫލްތަކަކަށް އަންގައިފިއެވެ.

ތަޢުލީމީ ވުޒާރާއިން ހުރިހާ ސްކޫލްތަކަށް ފޮނުވާފައިވާ ސަރކިއުލާގައިވާ ގޮތުން، މިއީ ވަކި ތީމްތަކަކަށް ބަހާލައިގެން މުޅި އަހަރު ދުވަހަށް ދެމިގެންދާ ގޮތަށް ފަރުމާކޮށްފައިވާ ޕްރޮގްރާމެކެވެ. މި ޕްރޮގްރާމް ކުރިއަށް ގެންދިޔުމަށް ހަމަޖެހިފައިވަނީ ސްކޫލްތަކާއި ބެލެނިވެރިންގެ އިތުރުން މުޅި މުޖުތަމަޢުގެ ބައިވެރިވުމާއެކުގައެވެ.

މި ޕްރޮގްރާމްގެ ހަރަކާތްތައް ބިނާވެގެންވަނީ ކޮންމެ މަހަކަށް ކަނޑައަޅާ ޚާއްސަ ތީމެއްގެ މައްޗަށެވެ. އެގޮތުން ޕްރޮގްރާމް ފެށުމަށް ހަމަޖެހިފައިވަނީ "ޝުކުރުވެރިވުން" މި ތީމްގެ ދަށުންނެވެ. ކޮންމެ މަހެއް ފެށުމުގެ ކުރިން އެ މަހަކަށް ކަނޑައަޅާފައިވާ ތީމް ތަޢުލީމީ ވުޒާރާއިން ސްކޫލްތަކަށް އަންގަމުންދާނެއެވެ.

މި ޕްރޮގްރާމް ވިލަރެސްކުރުމަށް ތަޢުލީމީ ވުޒާރާއިން ވަނީ ޚާއްސަ ކޮމިޓީއެއް އެކުލަވާލާފައެވެ. މި ކޮމިޓީން ތީމްތައް ކަނޑައެޅުމާއި، ކުރިއަށްގެންދާނެ ހަރަކާތްތައް ސްކޫލްތަކާ ހިއްސާކުރުމާއި، ޕްރޮގްރާމް ވަޒަންކުރުމުގެ މަސައްކަތް ސްކޫލްތަކާ ގުޅިގެން ކުރިއަށް ގެންދާނެއެވެ.

ތަޢުލީމީ ވުޒާރާއިން ވިދާޅުވި ގޮތުގައި، މި ޕްރޮގްރާމްގެ ތެރެއިން ދަރިވަރުންގެ ކިބައިގައި އިޙްތިރާމް ކުރުމާއި، ޒިންމާ ނެގުމާއި، ސާފުތާހިރުކަމާއި، އަޅާލުމާއި އޯގާތެރިކަން ފަދަ ސިފަތައް އަށަގަންނުވަން މަސައްކަތް ކުރެވޭނެއެވެ. އަދި ފަރުޟު ފަސް ނަމާދުކުރުމަށް ބާރުއެޅުމުގެ ގޮތުން، ކޮންމެ މަހެއްގެ ތީމާއި ނަމާދުގެ މާތް އަޅުކަމާ ހުރި ގުޅުން ދަރިވަރުންނަށް ބުނެދޭންޖެހެއެވެ.

ސްކޫލްތަކުގައި މި ޕްރޮގްރާމް ހިންގުމުގެ އެންމެ އިސް ދައުރެއް އަދާކުރާނީ ސްކޫލްގެ ޕްރިންސިޕަލުންނެވެ. ޕްރޮގްރާމްގެ ދަށުން ކޮންމެ މަހަކު ޚާއްސަ އެސެމްބްލީއެއް ބޭއްވުމާއި، ދަރިވަރުންނަށް ވާހަކަ ދެއްކުމުގެ ފުރުޞަތު ދިނުމާއި، ރަށު ފެންވަރުގައި ޕެނަލް ޑިސްކަޝަން ފަދަ ހަރަކާތްތައް ހިންގަން ޖެހެއެވެ. މީގެ އިތުރުން، ސްކޫލްތަކުގެ މީސްމީޑިއާ މަންސަތަކުގައި މި ހަރަކާތްތައް ހިއްސާކުރުމަށްވެސް ތަޢުލީމީ ވުޒާރާއިން ވަނީ އިރުޝާދު ދެއްވާފައެވެ.