ވެލިދޫގެ ބިން ހިއްކުމުގެ މަޝްރޫޢު ނިންމާލުމާ ގާތަށް، އަންނަ މަހުގެ ނިޔަލަށް މަސައްކަތް އެއްކޮށް ނިމޭނެ

ނ. ވެލިދޫގައި އޮޑިދޯނިފަހަރު ބަނުމާއި ފައިބަރު މަސައްކަތަށް ޚާއްޞަކޮށްގެން ހިއްކަމުންދާ ސަރަޙައްދުގެ މަސައްކަތްތައް އަންނަ މަހުގެ ނިޔަލަށް އެއްކޮށް ނިންމާލެވޭނެ ކަމަށް މަޝްރޫޢުގެ ކޮންޓްރެކްޓަރ އެމްޓީސީސީން ހާމަކޮށްފިއެވެ.

މި މަޝްރޫޢަކީ ވެލިދޫގެ ރައްޔިތުންގެ ވަރަށް ބޮޑު އެދުމަކަށް، ރަށުގެ އިޤްތިޞާދީ ހަރަކާތްތަކަށް ޖާގަ އިތުރުކުރުމަށްޓަކައި ސަރުކާރުން ފެއްޓެވި މަސައްކަތެކެވެ. މި މަޝްރޫޢުގެ އަމަލީ މަސައްކަތް ރަސްމީކޮށް ފައްޓަވައިދެއްވީ މިދިޔަ އަހަރުގެ ޖުލައި މަހު، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެ ރަށަށް ކުރެއްވި ދަތުރުފުޅުގައެވެ.

ވެލިދޫގެ ހުޅަނގު ފަރާތުން 2.7 ހެކްޓަރުގެ ބިން ހިއްކުމުގެ މި މަޝްރޫޢުގެ ދަށުން، ބިން ހިއްކުމަށް ވެލި އެޅުމުގެ ހުރިހާ މަސައްކަތެއް މިދިޔަ އޮގަސްޓް މަހުގެ ތެރޭގައި ވަނީ ނިންމާފައެވެ. އެމްޓީސީސީން މަޢުލޫމާތު ދޭ ގޮތުގައި މިހާރު ކުރިއަށްދަނީ ހިއްކި ސަރަޙައްދު ޙިމާޔަތްކުރުމަށްޓަކައި 443 މީޓަރުގެ ޖިއޯ ބޭގް ރިވެޓްމަންޓް ޖެހުމުގެ މަސައްކަތެވެ.

މުޅި މަޝްރޫޢުގެ ގާތްގަނޑަކަށް 90 އިންސައްތަ މަސައްކަތް މިހާރު ނިމިފައިވާއިރު، ކުންފުނީގެ އަމާޒަކީ އަންނަ އޮކްޓޫބަރު މަހުގެ ނިޔަލަށް ހުރިހާ މަސައްކަތެއް ނިންމައި ބިން ބޭނުންކުރެވޭނެ މަގު ފަހިކޮށްދިނުމެވެ.

ވެލިދޫއަކީ ރާއްޖޭގައި ސަފާރީއާއި ބޮޑެތި އުޅަނދުފަހަރު ބަނުމަށް ނަން މަޝްހޫރު ރަށެކެވެ. ނަމަވެސް، ރަށުގެ ބިން މިހާރު އޮތް ގޮތުން އެފަދަ މަސައްކަތްތައް ފުޅާކުރުމަށް ވަނީ ބޮޑެތި ގޮންޖެހުންތަކާ ކުރިމަތިވެފައެވެ. ރަށުގެ ރައްޔިތުން ފާހަގަކުރާ ގޮތުގައި މި އާ ބިމާއެކު މި ސިނާއަތަށް ބޮޑު އިންގިލާބެއް އަންނާނެއެވެ.

ވެލިދޫގައި މިހާރު މި މަސައްކަތްތައް ކުރަމުންދަނީ ރަށުގެ އެކި ހިސާބުތަކުން ދޫކޮށްފައިވާ ބިންތަކުގައެވެ. ނަމަވެސް އައު ބިމާއެކު، އޮޑިދޯނިފަހަރު ބަނުމާއި އެހެލުމުގެ މަސައްކަތްތައް އެއް ސަރަޙައްދަކުން ފަސޭހަކަމާއެކު ކުރެވޭނެ އިންތިޒާމު ހަމަޖެހިގެންދާނެއެވެ.

2،700 އަށްވުރެ ބޮޑު އާބާދީއެއް އޮންނަ ވެލިދޫއަކީ އިޤްތިޞާދީ ގޮތުން ފުދުންތެރި، މަސައްކަތްތެރި ރައްޔިތަކު ދިރިއުޅޭ ރަށެކެވެ. މި މަޝްރޫޢުގެ ސަބަބުން ރަށުގެ ޒުވާނުންނަށާއި ވިޔަފާރިވެރިންނަށް އާމްދަނީ ހޯދުމުގެ އައު ދޮރުތަކެއް ހުޅުވިގެންދާނެ ކަމަށް ބެލެވެއެވެ.