އެކަނި އެއްބާރަކުން ކުރާ މަސައްކަތަކުން ދުނިޔޭގެ މައްސަލަތައް ހައްލުނުކުރެވޭނެ: އދ.ގެ ސެކްރެޓަރީ ޖެނެރަލް

ދުނިޔޭގެ ގައުމުތަކުގެ މެދުގައި އޮންނަ އެއްބާރުލުން ކުޑަވަމުންދާ ކަމަށް ވިދާޅުވެ، އދ.ގެ ސެކްރެޓަރީ ޖެނެރަލް އެންޓޯނިއޯ ގުޓަރޭޒް އިންޒާރު ދެއްވައިފިއެވެ.

މީޑިއާއާ ވާހަކަދައްކަވަމުން ގުޓަރޭޒް ވިދާޅުވީ ދުނިޔޭގެ ބޮޑެތި މައްސަލަތައް ހައްލުކުރުމަށް ކުރެވޭ މަސައްކަތްތަކަށް ބައެއް ބާރުގަދަ ގައުމުތަކުން ހުރަސްއަޅަމުންދާ ކަމަށެވެ.

އދ.ގެ އިސްވެރިޔާގެ ހައިސިއްޔަތުން ދެއްވި އަހަރީ ތަގުރީރުގައި ގުޓަރޭޒް ފާހަގަކުރެއްވި ގޮތުގައި، މޫސުމީ ބަދަލުތަކާއި، ނުހަމަހަމަކަމާއި، ހަނގުރާމަތަކުގެ އިތުރުން ޓެކްނޮލޮޖީ ކުންފުނިތަކުގެ ނުފޫޒު ފަދަ ބޮޑެތި މައްސަލަތައް ހައްލުކުރުމަށް އދ. އޮތީ ތައްޔާރަށެވެ. ނަމަވެސް، "ދުނިޔޭގެ މައްސަލަތައް ހައްލުކުރެވޭނީ އެންމެ ބާރަކުން ބޭނުންވާ ގޮތަށް ކަންކަން ނިންމައިގެންނެއް ނޫން" ކަމަށް ވިދާޅުވެ، އެމެރިކާގެ ރައީސް ޑޮނަލްޑް ޓްރަމްޕްގެ ސިޔާސަތުތަކަށް އޭނާ ނުސީދާކޮށް ފާޑުވިދާޅުވިއެވެ.

ގުޓަރޭޒް އިތުރަށް ވިދާޅުވީ ދުނިޔޭގެ ބާރުތަކުން އެކި ސަރަހައްދުތަކަށް ނުފޫޒު ފޯރުވައިގެން ވެސް މި މައްސަލަތައް ހައްލު ނުކުރެވޭނެ ކަމަށެވެ. މިއީ ޗައިނާގެ ކުރިއަރަމުން އަންނަ ދައުރަށް އިޝާރާތް ކުރައްވައި ދެއްވި ބަހުގެ ހަމަލާއެއް ކަމަށް ބެލެވެއެވެ. މި އަހަރުގެ ނިޔަލަށް މަގާމުން ވަކިވެވަޑައިގަންނަވާ ގުޓަރޭޒް ވަނީ ބައިނަލްއަގުވާމީ ގާނޫނުތަކަށް ބޯލެނބުމުގެ މުހިންމުކަން ފާހަގަކުރައްވާފައެވެ.

ޣައްޒާގައި އިޒްރޭލުން ހިންގަމުންދާ ގަތުލުއާންމާއި، އެމެރިކާ ސިފައިން ވެނެޒުއޭލާގެ ރައީސް ނިކޮލަސް މަޑޫރޯ ހައްޔަރުކުރުމާ ގުޅިގެން ގުޓަރޭޒް ވިދާޅުވީ ބައިނަލްއަގުވާމީ ގާނޫނުތަކަށް އަރައިގަނެ، މަލްޓިލޭޓަރަލް މުއައްސަސާތަކަށް ހަމަލާދެމުންދާ ކަމަށެވެ. އެހެންނަމަވެސް، އދ. އިން އަދިވެސް މަސައްކަތް ކުރަމުންދަނީ ބައިނަލްއަގުވާމީ ގާނޫނުތަކުގެ މައްޗަށް ބިނާވެފައިވާ ދެމެހެއްޓެނިވި ސުލްހައެއް ގާއިމުކުރުމަށް ކަމަށް އޭނާ ވިދާޅުވިއެވެ.

ޓްރަމްޕްގެ ސިޔާސަތުތަކަށް ފާޑުކިޔުން
ރައީސް ޓްރަމްޕް ވަނީ އދ.ގެ ނިޒާމުން އެމެރިކާ ވަކިކުރުމަށް މަސައްކަތް ކުރައްވައި، އަމިއްލަފުޅަށް "ބޯޑް އޮފް ޕީސް" ގެ ނަމުގައި އާ އިދާރާއެއް އުފައްދަވާފައެވެ. މީގެ އިތުރުން، ފަލަސްތީނާ ބެހޭ އދ.ގެ ހާއްސަ ރެޕަޓުއާ ފްރެންޗެސްކާ އަލްބަނީޒްއަށް ދަތިކުރުމުގެ ފިޔަވަޅުތައް އަޅައި، އދ.ގެ އެކި މަޝްވަރާތަކުގައި ބައިވެރިވާ ފަރާތްތަކަށް ޓްރަމްޕްގެ ސަރުކާރުން ދަނީ ބިރުދައްކަމުންނެވެ.

ބްރެޒިލްގެ ރައީސް ލޫލާ ދަ ސިލްވާ ވެސް ވަނީ ޓްރަމްޕް އުޅުއްވަނީ "އާ އދ. އެއް" އުފައްދަވަން ކަމަށް ތުހުމަތު ކުރައްވާފައެވެ. ޓްރަމްޕްގެ މި ހަރަކާތްތަކަށް ފްރާންސް ފަދަ ގައުމުތަކުން ދަނީ ދެކޮޅު ހަދަމުންނެވެ. ފްރާންސުން ބުނެފައިވަނީ އދ.ގެ އޮނިގަނޑާއި އުސޫލުތަކާ މެދު ސުވާލު އުފެއްދުމަކީ ބަލައިގަނެވޭނެ ކަމެއް ނޫން ކަމަށެވެ.