އެމް.އެން.އެސް.ޑީ.އޭ އާއި މެރިޓައިމް ޓްރެއިނިންގ އިންސްޓިޓިއުޓް އާ ދެމެދު ޤައުމީ ފެންވަރުގެ ތަމްރީނު ފަށަނީ

މޯލްޑިވްސް ނޭޝަނަލް ސްކިލްސް ޑިވެލޮޕްމަންޓް އޮތޯރިޓީ (އެމް.އެން.އެސް.ޑީ.އޭ) އާއި މެރިޓައިމް ޓްރެއިނިންގ އިންސްޓިޓިއުޓް އާ ދެމެދު ނޭޝަނަލް އެޕްރެންޓިސްޝިޕް ޕްރޮގްރާމް (ނެޕް) އަދި ނޭޝަނަލް ޓްރޭޑް ޓެސްޓިންގ އެންޑް ސެޓިފިކޭޝަންގެ (އެން.ޓީ.ޓީ.ސީ) ދަށުން ތަމްރީނު ފޯރުކޮށްދިނުމަށް ކުރެވޭ ފަހުމުނާމާގައި މިއަދު ސޮއިކޮށްފިއެވެ.

މި އެއްބަސްވުމުގައި މެރިޓައިމް ޓްރެއިނިންގ އިންސްޓިޓިއުްޓިޓިއުޓްގެ ފަރާތުން ސޮއިކުރެއްވީ މެނޭޖިންގ ޑިރެކްޓަރ ކެޕްޓަން މުޙައްމަދު އަސްލަމްއެވެ. އެމް.އެން.އެސް.ޑީ.އޭގެ ފަރާތުން ސޮއިކުރެއްވީ ޗީފް އެގްޒެކެޓިވް އޮފިސަރ ޑރ. ޒަހުރާ މުޙައްމަދެވެ.

2023 ވަނަ އަހަރު މެރިޓައިމް ޓްރެއިނިންގ އިންސްޓިޓިއުޓް ވަނީ އެމް.އެން.އެސް.ޑީ.އޭ ގައި އިންސްޓިޓިއުޓް ބޭސްޑް ޓްރެއިނިންގ ހިންގައިދޭ ތަނެއްގެ ގޮތުގައި ރަޖިސްޓްރީކޮށްފައެވެ. އަދި އިލެކްޓްރިކަލް އިންސްޓޮލޭޝަން އެންޑް މެއިންޓެނެންސް، ރެފްރިޖެރޭޝަން އެންޑް އެއަރ ކޮންޑިޝަނިންގ މެކޭނިކް އަދި ވެލްޑިންގ ޓެކްނިކްސްގެ ނޭޝަނަލް ސެޓްފިކެޓް 3 ހިންގުމަށްވެސް ވަނީ ރަޖިސްޓްރީ ކޮށްފައެވެ.

އެމް.އެން.އެސް.ޑީ.އޭ ގެ ނެޕް ޕްރޮގްރާމަކީ ވަޒީފާ އަދާކުރާ މާހައުލެއްގައި އުޅެމުން ތަމްރީނުވުމުގެ ފުރުސަތު ފަހިކޮށްދޭ ޕްރޮގްރާމެކެވެ. މި ޕްރޮގްރާމްގެ ދަށުން، 6 މަސްދުވަހުގެ ތަމްރީނު ލިބި ގައުމީ ސަނަދެއް ހާސިލުކުރުމުގެ ފުރުސަތު ލިބިގެންދެއެވެ. އަދި ބައިވެރިވާ ފަރާތްތަކަށް އެލަވަންސް ވެސް ލިބޭގޮތަށް ހަމަޖެހިފައިވެއެވެ.

އެން.ޓީ.ޓީ.ސީ އަކީ ވަކި ހުނަރެއްގެ މަސައްކަތުގައި މަދުވެގެން 5 އަހަރު ދެމިހުރި ފަރާތްތަކަށް އެ ދާއިރާއަކުން ނެޝަނަލް ސެޓްފިކެޓެއް ހާސިލުކުރެވޭނެ މަގު ފަހިކޮށްދޭ ޕްރޮގްރާމެކެވެ.

މި ދެ ޕްރޮގްރާމްގެ މަޤްޞަދަކީ ދިވެހިރާއްޖޭގެ މަސައްކަތްތެރިންގެ ހުނަރު އިތުރުކޮށް، ވަޒީފާގެ ބާޒާރުގައި ޤާބިލު މުވައްޒަފުން އުފެއްދުމެވެ. މި ޕްރޮގްރާމްތަކާ ގުޅޭ އިތުރު މަޢުލޫމާތު އެމް.އެން.އެސް.ޑީ.އޭ ގެ ވެބްސައިޓުން ލިބެން ހުންނާނެއެވެ.