ޣައްޒާގައި 71،000 އަށްވުރެ ގިނަ މީހުން ޝަހީދުކޮށްލި ކަމަށް އިޒްރާއިލް ސިފައިން އެއްބަސްވެއްޖެ

ޣައްޒާގައި އިޒްރާއިލުން ހިންގަމުންދާ ގަތުލުއާންމުގައި ފަލަސްތީނުގެ 71،000 އަށްވުރެ ގިނަ މީހުން ޝަހީދުކޮށްލައިފައިވާ ކަމަށް ފަލަސްތީނުގެ ހެލްތު މިނިސްޓްރީން ނެރެމުންދާ ތަފާސްހިސާބުތަކަކީ ސައްހަ ހިސާބުތަކެއް ކަމަށް އިޒްރާއިލް ސިފައިން އެއްބަސްވެއްޖެއެވެ.

 މިއީ ފަލަސްތީނުގެ ސިއްހީ ވުޒާރާގެ ރިޕޯޓުތަކަކީ އިތުބާރު ނުކުރެވޭ އެއްޗެއް ކަމަށް ބުނެ އަހަރުތަކެއް ވަންދެން އިޒްރާއިލުން ދައްކަމުން އައި ވާހަކަތަކަށް ފަހު، އެ ހިސާބުތައް ގަބޫލުކުރި ފުރަތަމަ ފަހަރެވެ.

އިޒްރާއިލްގެ ނޫހެއް ކަމަށްވާ ހާރެޓްޒް އިން ބުރާސްފަތި ދުވަހު ރިޕޯޓުކޮށްފައިވާ ގޮތުގައި، އިޒްރާއިލް ސިފައިން ވަނީ 71،000 މީހުން ޝަހީދުވެފައިވާ ކަމަށް ބުނާ ބުނުމަކީ ބޮޑުތަނުން ރަނގަޅު ހިސާބެއް ކަމަށް ބުނެފައެވެ. އަދި މި އަދަދުގެ ތެރޭގައި ވީނުވީއެއް ނޭނގި ގެއްލިފައިވާ މީހުންނާއި، އިމާރާތްތަކުގެ ކުނިތަކުގެ ދަށުގައި ވަޅުލެވިފައިވާ މީހުން ނުހިމެނޭ ކަމަށްވެސް ސިފައިން ފާހަގަކޮށްފައިވެއެވެ.

އިޒްރާއިލް ސިފައިން އިތުރަށް ބުނެފައިވަނީ މިހާރު އެ ތަފާސްހިސާބުތައް ދިރާސާ ކުރަމުންދާ ކަމަށެވެ. ނަމަވެސް މި ހިސާބުތަކުގެ ތެރޭގައި ބަނޑުހައިހޫނުކަމުގެ ސަބަބުންނާއި، އިޒްރޭލުން ޣައްޒާ ބަންދުކޮށްފައި އޮތުމުގެ ސަބަބުން ފެތުރިފައިވާ ބަލިމަޑުކަމުގައި މަރުވި މީހުން ނުހިމެނެއެވެ. މި ހިސާބުތަކުގެ ސައްހަކަން ގަބޫލުކުރި ނަމަވެސް، އިޒްރާއިލް ސިފައިން ދަނީ އޭގެ ތެރެއިން އާންމުންނާއި ހަނގުރާމަވެރިން ވަކިކުރުމުގެ މަސައްކަތް ކުރަމުން ކަމަށް ބުނެފައެވެ.

ފަލަސްތީނުގެ ހެލްތު މިނިސްޓްރީން އާންމުކުރާ މި ތަފާސްހިސާބުތަކަކީ އދ. ގެ އިދާރާތަކާއި، ބައިނަލްއަގުވާމީ ޖަމިއްޔާތަކާއި، އެކި ގައުމުތަކުގެ ސަރުކާރުތަކުންވެސް ބޭނުންކުރަމުންދާ އިތުބާރު ހުރި ހިސާބުތަކެކެވެ. ބައެއް ދިރާސާތަކުން ދައްކާ ގޮތުގައި ޣައްޒާގައި ޝަހީދުވި މީހުންގެ އަދަދު ހެލްތު މިނިސްޓްރީން ރިޕޯޓުކުރާ އަދަދަށްވުރެ މާ މަތިވުން އެކަށީގެންވެއެވެ. އެގޮތުން 2025 ވަނަ އަހަރުގެ ޖޫން މަހު ނެރުނު ދިރާސާއަކުން ދައްކާ ގޮތުގައި އެ އަހަރުގެ ޖެނުއަރީ މަހުގެ ނިޔަލަށް 75،200 އަށްވުރެ ގިނަ މީހުން ވަނީ ޝަހީދުވެފައެވެ.

މި ހަފުތާގައި ފަލަސްތީނުގެ ހެލްތު މިނިސްޓްރީން އާންމުކުރި އެންމެ ފަހުގެ ތަފާސްހިސާބުތަކަށް ބަލާއިރު، އިޒްރާއިލްގެ ގަތުލުއާންމުގައި މިހާތަނަށް 71،660 އަށްވުރެ ގިނަ މީހުން ޝަހީދުވެ، 171،340 އަށްވުރެ ގިނަ މީހުން ވަނީ ޒަހަމްވެފައެވެ. ބައިނަލްއަގުވާމީ މާހިރުން ގަބޫލުކުރާ ގޮތުގައި ހެލްތު މިނިސްޓްރީގެ ހިސާބުތަކަކީ ވަރަށް ބޮޑަށް ބަލައިގެން ތައްޔާރުކޮށްފައިވާ، އިތުބާރު ހުރި ހިސާބުތަކެކެވެ.