ހިޔާ ޓަވަރުގައި އަލިފާނުގެ ހާދިސާއެއް ހިނގައިފި

ހުޅުމާލެ ދެވަނަ ފިޔަވަހީގައި ހުންނަ ހިޔާ ފްލެޓްތަކުގެ ތެރެއިން ފަސްވަނަ ޓަވަރުގައި އަލިފާނުގެ ހާދިސާއެއް ހިނގައިފިއެވެ.

"ފަރުދުން" އަށް މައުލޫމާތު ލިބިފައިވާ ގޮތުގައި އަލިފާން ރޯވެފައި ވަނީ ހިޔާ ޓަވަރު ފަހެއްގެ 24 ވަނަ ފަންގިފިލާގެ ވައިގޮޅިތެރޭގައި ހުރި އައުޓްޑޯ އޭސީ ޔުނިޓަކުންނެވެ. އެ ޓަވަރުން ބޯކޮށް ކަޅު ދުން އަރަމުންދާއިރު، އެ އިމާރާތުގެ ތިރީ ފަންގިފިލާތަކަށް ވެސް ދުމުގެ ވަސް ފެތުރިފައިވާ ކަމަށް އެ ސަރަހައްދުގައި ތިބި މީހުން ބުނެއެވެ.

މި ހާދިސާއާ ގުޅިގެން އެ ޓަވަރުގެ މަތީ ފަންގިފިލާތަކުގެ ބައެއް އެޕާޓްމެންޓުތަކުން މީހުން މިހާރު ތިރިއަށް ފައިބަމުންދާ ކަމަށް އެ ސަރަހައްދުގައި ހުރި "ފަރުދުން" ގެ ނޫސްވެރިޔާ ވަނީ މައުލޫމާތު ދީފައެވެ. މީހުން ހުސްކުރުމުގެ މަސައްކަތް ކުރަމުންދަނީ ރައްކާތެރިކަމުގެ ފިޔަވަޅެއްގެ ގޮތުންނެވެ.

މި ހާދިސާއާ ގުޅޭ ގޮތުން އެމްއެންޑީއެފުން މިހާތަނަށް ބުނީ، ހިޔާ ޓަވަރު ފަހެއްގައި އަލިފާނުގެ ހާދިސާއެއް ހިނގުމާ ގުޅިގެން ފަޔާ އެންޑް ރެސްކިއު ސާވިސަސްއިން އެ ސަރަހައްދުގައި ހަރަކާތްތެރިވަމުން އަންނަ ކަމަށެވެ. ނަމަވެސް، އަލިފާން ރޯވާން ދިމާވި ސަބަބާއި ލިބުނު ގެއްލުމުގެ އިތުރު ތަފުސީލެއް މިހާތަނަށް ކަމާބެހޭ ފަރާތްތަކުން ހާމަކޮށްފައެއް ނުވެއެވެ.

މި ހާދިސާގައި އެއްވެސް މީހަކަށް ޖިސްމާނީ އަނިޔާއެއް ލިބިފައިވާ ކަމުގެ ރިޕޯޓެއް އަދި ލިބިފައެއް ނުވެއެވެ.

ތަފުސީލް އަންނަނީ.