ބީއެމްއެލްގެ ދ. ކުޑަހުވަދޫ ބުރާންޗުގެ އައު އިމާރާތް ހުޅުވައި، ޚިދުމަތް ދޭން ފަށައިފި

ބޭންކް އޮފް މޯލްޑިވްސް (ބީއެމްއެލް) ގެ ދ. ކުޑަހުވަދޫ ބުރާންޗުގެ އައު އިމާރާތް ހުޅުވައި، އެ ބްރާންޗުން ރަސްމީކޮށް ޚިދުމަތް ދޭން ފަށައިފި އެވެ.

ބީއެމްއެލް ކުޑަހުވަދޫ ބުރާންޗުގެ އައު އިމާރާތް ހުޅުވުމަށް އެ ރަށުގައި ބޭއްވި ޚާއްޞަ ރަސްމިއްޔާތެއްގައި ބްރާންޗަށް އިތުރުކުރި އިމާރާތް ރަސްމީކޮށް ހުޅުއްވައިދެއްވީ މާލީ ކަންކަމާއި ތަރައްޤީގެ ރޭވުންތެރިކަމާ ބެހޭ ވަޒީރު މޫސާ ޒަމީރުއެވެ. މި ރަސްމިއްޔާތުގައި ބީއެމްއެލްގެ ސީއީއޯ މުޙައްމަދު ޝަރީފް އާއި، ބީއެމްއެލްގެ އިސްވެރިންނާއި، އަތޮޅު ކައުންސިލް މެންބަރުންނާއި، ކުޑަހުވަދޫ ކައުންސިލްގެ މެންބަރުންނާއި ރައްޔިތުން ވަނީ ބައިވެރިވެފައެވެ.

ބީއެމްއެލް އިން ވިދާޅުވީ، ކުޑަހުވަދޫގައި ޤާއިމްކޮށްފައިވާ ބީއެމްއެލް ބްރާންޗުގެ އައު އިމާރާތަކީ "ޕޭޕަރ ލެސް" ނުވަތަ ޑިޖިޓަލް ބޭންކިންގ ނިޒާމު ހިމެނޭ ބްރާންޗެއް ކަމަށެވެ. އަދި މި ބްރާންޗުން އިސްލާމީ ޝަރީއަތާ އެއްގޮތަށް އަމިއްލަ ފަރުދުންނާއި ވިޔަފާރިތަކަށް ބޭންކިންގެ ޚިދުމަތްތައް ފޯރުކޮށްދޭނެ ކަމަށާއި، ރަސްމީ ގަޑިތަކުގައި އެކައުންޓް ހުޅުވުމާއި، ލޯނު ދޫކުރުމުގެ މަސައްކަތްތަކުގެ އިތުރުން ކާޑުގެ ޚިދުމަތްތައްވެސް މި ބްރާންޗުން ލިބިގެންދާނެ ކަމަށް ބީއެމްއެލުން މައުލޫމާތުދެއެވެ.

މީގެ އިތުރުން، ކުޑަހުވަދޫ ބްރާންޗުންވެސް 24 ގަޑިއިރު ފައިސާ ނެގުމާއި ޖަމާކުރުމުގެ އިތުރުން، ބިލްތަކަށް ފައިސާ ދެއްކުމާއި ޓްރާންސްފަރ ކުރުމުގެ ޚިދުމަތްވެސް ފޯރުކޮށްދޭނެ ކަމަށް ބީއެމްއެލުން ވިދާޅުވެއެވެ.