ސޯލާ މަޝްރޫޢުތައް ކުރިއަށްދާގޮތް ބެލުމަށް ވޯލްޑް ބޭންކުގެ ވަފުދެއް އައްޑޫ އާއި ފުވައްމުލަކަށް ޒިޔާރަތްކޮށްފި

ރާއްޖޭގައި ކުރިއަށްގެންދާ "އެސްޕަޔަރ"  އަދި "އަރައިޒް" މަޝްރޫޢުގެ ދަށުން ޤާއިމުކޮށްފައިވާ ސޯލާ ޕީވީ ނިޒާމުތައް ކުރިއަށްދާގޮތް ބެލުމަށް ވޯލްޑް ބޭންކުގެ ވަފުދެއް އައްޑޫ އާއި ފުވައްމުލަކަށް ޒިޔާރަތްކޮށްފި އެވެ.

މި ޒިޔާރަތަކީ، ވޯލްޑް ބޭންކުގެ އެހީގައި ހިންގާ ހުރިހާ މަޝްރޫޢުތަކެއްގެ ތިމާވެށީ އަދި އިޖުތިމާޢީ ކަންކަން ތަންފީޒުވަމުންދާ މިންވަރު ބަލައި، އެކަންކަމަށް ބޭނުންވާ އެހީތެރިކަން ފޯރުކޮށްދިނުމަށް ކުރިއަށްގެންދާ "އެންވަޔަރަންމަންޓް އެންޑް ސޯޝަލް އިމްޕްލިމެންޓޭޝަން ސަޕޯޓް" މިޝަންގެ ބައެކެވެ. ވޯލްޑް ބޭންކުގެ ސައުތު އޭޝިއާ ރީޖަންގެ އެންވަޔަރަންމަންޓަލް އެންޑް ސޯޝަލް ސްޓޭންޑަރޑްސް ޕްރެކްޓިސް މެނޭޖަރު ޖަންމޭޖޭ ސިންގް އިސްކޮށް ހުންނެވި މި ވަފުދުގައި، އެ ބޭންކުގެ ސްްރީލަންކާ ރީޖަނަލް އޮފީހުގެ އިސް ބޭފުޅުން ބައިވެރިވެވަޑައިގެންނެވިއެވެ.

A World Bank delegation visited Addu City and Fuvahmulah City this week to review Solar PV installations under the ASPIRE and ARISE projects. This visit is part of a broader Environment and Social Implementation Support mission for all projects covered under the World Bank.

Led… pic.twitter.com/Oy9gUsBs19

— Ministry of Tourism and Environment (@MoTmv) January 30, 2026

މި ދަތުރުގައި ވަފުދުގެ ބޭފުޅުން ވަނީ އައްޑޫ ސިޓީގައި ޤާއިމުކޮށްފައިވާ 3 މެގަވޮޓްގެ ސޯލާ ޕީވީ ނިޒާމާއި، ފުވައްމުލަކު ސިޓީގައި ގާއިމުކޮށްފައިވާ 2 މެގަވޮޓްގެ ސޯލާ ޕީވީ ނިޒާމުގެ މަސައްކަތްތައް ކުރިއަށްދާ ގޮތް ތަފްޞީލީ ގޮތެއްގައި ބައްލަވާލައްވާފައެވެ. އައްޑޫ އާއި ފުވައްމުލަކުގައި ކުރިއަށްދާ ސޯލާ ޕީވީގެ މަސައްކަތްތަކުގެ އިތުރުން، ބެޓަރީ އެނަރޖީ ސްޓޯރޭޖް ސިސްޓަމް (ބެސް) އަދި ކަރަންޓު ވިއުގަ (ގްރިޑް) އަޕްގްރޭޑް ކުރުމުގެ މަސައްކަތްތައް ހިނގަމުންދާ ސައިޓުތަކަށްވެސް މި ވަފުދުން ޒިޔާރަތްކުރިއެވެ. އަދި އެ ސައިޓުތަކުގައި ޢަމަލީ މަސައްކަތުގައި އުޅޭ ޓީމުތަކާ ބައްދަލުކޮށް، މަސައްކަތުގެ ފެންވަރާއި ކުރިއެރުމާ ގުޅޭގޮތުން މަޝްވަރާކޮށްފައިވެއެވެ.

މި ދަތުރުގެ ތެރެއިން ވޯލްޑް ބޭންކުގެ ވަފުދުން ވަނީ އައްޑޫ ސިޓީގެ މޭޔަރު އަލީ ނިޒާރު އާ ބައްދަލުކުރައްވާފައެވެ. މި ބައްދަލުކުރެއްވުމުގައި، މިހާރު ކުރިއަށްދާ ބެޓަރީ ސްޓޯރޭޖް ސިސްޓަމާއި، ގްރިޑް އަޕްގްރޭޑް ކުރުމުގެ މަސައްކަތްތަކާ ގުޅޭގޮތުން މޭޔަރުގެ ފީޑްބެކް ހޯއްދަވައި، މަޝްރޫޢުގެ ސަބަބުން ރަށުގެ ރައްޔިތުންނަށް ކުރާނެ ފައިދާތަކާ ގުޅޭގޮތުން މަޝްވަރާކުރެއްވިއެވެ.