ޚަބަރު
ބަނގުރާ ފުޅިތަކަކާއެކު، ބަނގުރާ އުފެއްދުމަށް ބޭނުންކުރާ ތަކެތި ހޯދައި ފުލުހުންގެ ބެލުމުގެ ދަށަށް ގެނެސްފި
ކުށުގެ ވެށިން/ފޮޓޯ: ފުލުހުން
ބަނގުރާ ފުޅިތަކަކާއެކު، ބަނގުރާ އުފެއްދުމަށް ބޭނުންކުރާ ތަކެތި ފުވައްމުލައް ސިޓީން ހޯދައި ދިވެހި ފުލުހުންގެ ޚިދުމަތުގެ ބެލުމުގެ ދަށަށް ގެނެސްފިއެވެ.
މި ތަކެތި ހޯދާފައި ވަނީ މަސްތުވާތަކެއްޗާއި ބަނގުރަލާ ދެކޮޅަށް ފުވައްމުލައް ސިޓީ ފުލުުން ކުރަމުންދާ މަސައްކަތުގެ ތެރެއިން، މި ޖަނަވަރީ މަހުގެ 29 ވަނަ ދުވަހު ހިންގި އޮޕަރޭޝަނެއްގައެވެ.
ދިވެހި ފުލުހުންގެ ޚިދުމަތުން ވިދާޅުވީ، މި އޮޕަރޭޝަންގައި ފުވައްމުލައް ސިޓީގެ އެކި ސަރަޙައްދުތަކުގެ ވަލުތެރެ ބަލައިފާސްކޮށްފައިވާ ކަމަށެވެ. އަދި މިތަންތަން ބަލައިފާސްކުރުމުގެ ތެރެއިން، ބަނގުރާ ކަމަށް ބެލެވޭ އެއްޗެއްހުރި ފުޅިތަކަކާއި، ހަންތަކެއް ފެނިފައިވާކަމަށް ފުލުހުން ވިދާޅުވިއެވެ. މީގެ އިތުރުން، ބަނގުރާ އުފެއްދުމަށް ބޭނުންކުރާ ކަމަށް ބެލެވޭ ބައެއް ސާމާނު ވެސް އެ ސަރަޙައްދުން ފެނިފައިވާކަމަށް ފުލުހުން މަޢުލޫމާތުދެއެވެ.
މި މައްސަލައާ ގުޅިގެން މިހާތަނަށް އެއްވެސް މީހަކު ހައްޔަރުކޮށްފައި ނުވާއިރު، މި މައްސަލަ ފުލުހުން ގެންދަނީ އިތުރަށް ތަޙުޤީގުކުރަމުންނެވެ.
Ads by MSS
