ދުނިޔެ

ޔުރޭނިއަމް އަނބުރާ އަންނަނީ: ކެނެޑާ ނިއުކްލިއަރ "ސުޕަރ ޕަވަރަކަށް" ވެދާނެ

ޔުރޭނިއަމް އަނބުރާ އަންނަނީ: ކެނެޑާ ނިއުކްލިއަރ "ސުޕަރ ޕަވަރަކަށް" ވެދާނެ

ކެނެޑާގެ ޔުރޭނިއަމް ބޭސިންއެއް ފޮޓޯ:އިންޓަނެޓް

އާމިނަތު ޔުމްނާ

އާމިނަތު ޔުމްނާ

14 ނޮވެމްބަރު 2024، 01:47

14 ނޮވެމްބަރު 2024، 01:47

ކެނަޑާގައި ޔުރޭނިއަމް އަލުން އަންނަނީ ކުރިއަރަމުންނެވެ. މިއީ މޫސުމީ ބަދަލުތަކުގެ ޙައްލެއްގެ ގޮތުގައި ނިއުކްލިއަރ ހަކަތައަށް އަލުން ސަމާލުކަން ދޭން ފެށުމާ ގުޅިގެން ކަމުގައިބެލެވެއެވެ. މަތީ ފެންވަރުގެ ޔުރޭނިއަމް ވަސީލަތްތަކުން މުއްސަނދި ކެނެޑާއަށް ނިއުކްލިއަރ "ސުޕަރ ޕަވަރަކަށް" ވުމުގެ ފުރުސަތު އެބައޮތެވެ. 

ލީ ކަރޔަރ ވަނީ ގާތްގަނޑަކަށް 20 އަހަރު ވަންދެން ޔުރޭނިއަމް މައިނިންގ ދާއިރާގައި މަސައްކަތް ކުރައްވާފައެވެ. އޭނާ ފާހަގަ ކުރެއްވި ގޮތުގައި ފަހަކަށް އައިސް މި ދާއިރާއަށް ބޮޑު ބަދަލެއް އައިސްފައިވެއެވެ. 2011 ގައި ޖަޕާނުގައި ހިނގި ފުކުޝިމާ ނިއުކްލިއަރ ޕްލާންޓް ކާރިސާއާ ގުޅިގެން ނިއުކްލިއަރ ހަކަތައާ މެދު ދުނިޔޭގެ ނަޒަރު ބަދަލުވެ، ޔުރޭނިއަމްގެ އަގު ވަރަށް ބޮޑަށް ދަށްވިއެވެ.

ނަމަވެސް ފާއިތުވި 5 އަހަރުގެ ތެރޭގައި މި ޙާލަތު ބަދަލުވެ، ދުނިޔޭގެ ބާޒާރުގައި ޔުރޭނިއަމްގެ އަގު 200 އިންސައްތައަށް ވުރެ މަތިވެފައިވެއެވެ. މިއީ މިއަހަރުގެ އެންމެ މަތީ އަގު ހުރި މުދަލުގެ ތެރެއިން އެއްޗެކެވެ.

އޮސްޓްރޭލިއާގައި އުފަންވި ވިޔަފާރިވެރިއެއް ކަމުގައިވާ ކަރޔަރ ވިދާޅުވި ގޮތުގައި މި ބަދަލު އައީ 2018 ގައި މައިކްރޯސޮފްޓްގެ ބާނީ ބިލް ގޭޓްސް ނިއުކްލިއަރ ހަކަތައަކީ "މޫސުމީ ބަދަލުތަކާ ކުރިމަތިލުމަށް އެންމެ އެކަށީގެންވާ" އެއްޗެއް ކަމުގައި ބުނުމާ ގުޅިގެންނެވެ.

4 އަހަރު ފަހުން، އޭރުގެ ބްރިޓިޝް ބޮޑުވަޒީރު ބޮރިސް ޖޯންސަން ވަނީ ޤައުމުގެ ހަކަތައިގެ މަދުވެގެން 25 އިންސައްތަ ނިއުކްލިއަރ ހަކަތައިން އުފެއްދުމުގެ ސިޔާސަތެއް ކުރިއަށް ގެންގޮސްފައެވެ. އޭގެ ކުޑަ އިރުކޮޅެއް ފަހުން، ޔޫރަޕިއަން ޔޫނިއަނުން ވަނީ ނިއުކްލިއަރ ހަކަތައަކީ މޫސުމާ ރައްޓެހި ހަކަތައެއް ކަމުގައި ވޯޓު ދީފައެވެ.

ކަރޔަރގެ ކުންފުނި ނެކްސްޖެން އަކީ ކެނެޑާގައި އެންމެ ބޮޑު ޔުރޭނިއަމް މައިން ތަރައްޤީކުރަމުންދާ ކުންފުންޏެވެ. މި ކުންފުނީގެ އަގު މިހާރު 4 ބިލިއަން ޑޮލަރާ ގާތްކުރެއެވެ. ނަމަވެސް މި މައިން ވިޔަފާރީގެ ގޮތުން ހިންގަން ފެށޭނީ އެންމެ އަވަހަށް 2028 ގައެވެ.

ކެނެޑާގެ މައިނިންގ ކުންފުނިތަކުން ދެކޭގޮތުގައި ޤައުމުގެ މުއްސަނދި ވަސީލަތްތަކާއެކު، ނިއުކްލިއަރ ހަކަތައިގެ މުސްތަޤުބަލުގައި ކެނެޑާއަށް މުހިންމު ދައުރެއް އަދާކުރެވޭނެއެވެ. ސީއޯޕީ28 މޫސުމީ ބަދަލުތަކާބެހޭ ބައްދަލުވުމުގައި 20 އަށްވުރެ ގިނަ ޤައުމުތަކުން 2050 ވަނަ އަހަރާ ހަމައަށް އެ ޤައުމުތަކުގެ ނިއުކްލިއަރ ހަކަތަ އުފެއްދުން 3 ގުނަ އިތުރުކުރުމަށް އިޤްރާރުވުމާ ގުޅިގެން ޔުރޭނިއަމްއަށް އޮތް ޑިމާންޑް އިތުރުވާނެ ކަމަށް ބެލެވެއެވެ.

ނިއުކްލިއަރ ހަކަތައަކީ ގުދުރަތީ ގޭހާއި އަދި ބުރަ ކާބަން ފަދަ އެހެން ވަސީލަތްތަކާ އަޅާބަލާއިރު ކާބަން ބޭރުކުރުން ކުޑަ ހަކަތައެއްގެ ގޮތުގައި ފާހަގަކުރެވެއެވެ. ވޯލްޑް ނިއުކްލިއަރ އެސޯސިއޭޝަންގެ އަންދާޒާތަކުން ދައްކާ ގޮތުގައި ދުނިޔޭގައި އުފައްދާ ހަކަތައިގެ 10 އިންސައްތައަކީ ނިއުކްލިއަރ ހަކަތައެވެ. އަދި 50 އިންސައްތައަށްވުރެ ގިނައީ ގޭހާއި ބުރަ ކާބަނުންނެވެ.

މިއަހަރުގެ ސީއޯޕީ29 ގައި އަމާޒު ހިފާފައިވަނީ ނިއުކްލިއަރ މަޝްރޫޢުތަކަށް ފައިސާ ހޯދުމަށެވެ. މިއީ ދުނިޔޭގެ ފިނިހޫނުމިން މައްޗަށް ދިއުން މަޑުޖައްސާލުމަށް މިހާރު ގެންގުޅޭ ސިޔާސަތުތަކާއި އިންވެސްޓްމަންޓްތައް އެކަށީގެންވާ ވަރަށްވުރެ މަދުކަން ދާދިފަހުން އދ. އިން ނެރުނު ރިޕޯޓަކުން ދައްކާފައިވުމާ ގުޅިގެންނެވެ.


                    

މި ލިޔުން ކިޔާލުމުން

Ads by MSS