ޓައިޕް 1 އަދި ޓައިޕް 2 ހަކުރުބަލީގެ ތަފާތު

ހަކުރު ބަލި ނުވަތަ ޑައިބެޓީސްއަކީ މުޅި ދުނިޔޭގައި މިލިއަނުން ގުނާލެވޭ މީހުންނަށް ކުރިމަތިވެފައިވާ ދިގު މުއްދަތަކަށް ދެމިގެންދާ ބައްޔެކެވެ. މިއީ ލޭގައި ހުންނަ ހަކުރުގެ މިންވަރު އިތުރުވެ، ސިއްހީގޮތުން ނުރައްކާތެރި އެތައް މައްސަލަތަކަކަށް މަގުފަހިވާ ބައްޔެއްކަން އެނގިފައިވީނަމަވެސް، ޑައިބެޓީސްއަކީ ހުރިހާ މީހުންނަށް އެއްގޮތަކަށް ޖެހޭ ބައްޔެއް ނޫނެވެ.

 ޑައިބެޓީސްގެ މައިގަނޑު ދެ ބާވަތެއް ވެއެވެ. އެއީ ޓައިޕް 1 އަދި ޓައިޕް 2 އެވެ. މި ދެ ބާވަތުގެ ސަބަބުތަކާއި، ސިފަތަކާއި، އަދި ބަލި ކޮންޓްރޯލްކުރާ ގޮތްތައް ތަފާތެވެ. މި ތަފާތުތައް ދެނެގަތުމަކީ މި ބަލީގައި ޖެހިފައިވާ މީހުންނަށް އެކަށީގެންވާ ފަރުވާ ދިނުމަށާއި، ދިރިއުޅުމުގެ ވައްޓަފާޅި ބަދަލުކުރުމަށާއި، އަދި ޖުމްލަކޮށް ސިއްހަތު ރަނގަޅުކުރުމަށް ވަރަށް މުހިންމު ކަމެކެވެ.

ޑައިބެޓީސްއަކީ ކޮބާ؟

ޑައިބެޓީސްއަކީ ހަށިގަނޑަށް ގްލޫކޯސް (ހަކުރު) ރަނގަޅަށް ބޭނުންކުރަން ނޭނގޭ މެޓަބޮލިކް ބައްޔެކެވެ. މީގެ ސަބަބުން ލޭގައި ހުންނަ ހަކުރުގެ މިންވަރު އިތުރުވެއެވެ. ކާއެއްޗެހިން ލިބޭ ގްލޫކޯސްއަކީ ހަކަތައަށް ކޮންމެހެން ބޭނުންވާ އެއްޗެކެވެ. ނަމަވެސް ގްލޫކޯސް ސެލްތަކަށް ވަނުމަށް އިންސުލިންގެ ބޭނުންވެއެވެ. އިންސުލިންއަކީ ޕެންކްރިއާސްއިން އުފައްދާ ހޯމޯނެކެވެ. މި ޕްރޮސެސްއަށް ދަތިވުމުން، ލޭގައި ހަކުރު އެއްވެ، ދުވަސް ވަމުންދާއިރު ނާރުތަކަށް ގެއްލުންވުމާއި، ފެނުމުގެ ބާރު ގެއްލުމާއި، ކިޑްނީގެ ބަލިތަކާއި، އަދި ހިތުގެ ބަލިތައް ފަދަ އެތައް ސިއްހީ މައްސަލަތަކެއް ކުރިމަތިވެއެވެ.

ޓައިޕް 1 ޑައިބެޓީސް: އޮޓޯއިމިއުން ބައްޔެއް

ޓައިޕް 1 ޑައިބެޓީސް، ނުވަތަ އިންސުލިންއަށް ބަރޯސާވާ ޑައިބެޓީސް ނުވަތަ ކުޑަކުދިންގެ ޑައިބެޓީސްގެ ގޮތުގައިވެސް އެނގިފައިވާ މި ބައްޔަކީ ހަށިގަނޑުގެ އިމިއުން ސިސްޓަމުން ޕެންކްރިއާސްގައި ހުންނަ އިންސުލިން އުފައްދާ ބީޓާ ސެލްތަކަށް ގޯސްކޮށް ހަމަލާދީ ނައްތާލާ އޮޓޯއިމިއުން ބައްޔެކެވެ. ޕެންކްރިއާސްއަށް އެކަށީގެންވާ މިންވަރަށް އިންސުލިން އުފެއްދޭން ނެތުމުން، ޓައިޕް 1 ޑައިބެޓީސް ޖެހިފައިވާ މީހުންނަށް ލޭގައި ހުންނަ ހަކުރުގެ މިންވަރު ކޮންޓްރޯލްކުރުމަށް އުމުރަށް އިންސުލިން ބޭނުންކުރަން ޖެހެއެވެ.

ސަބަބު: ޓައިޕް 1 ޑައިބެޓީސް  ޖެހޭ ސަބަބު ސީދާ އެނގިފައެއް ނުވެއެވެ. ނަމަވެސް ޖެނެޓިކް އަދި ވައިރަސް އިންފެކްޝަން ފަދަ ތިމާވެށީގެ ކަންކަމުގެ ސަބަބުން މި ބަލި ޖެހުމަށް މަގުފަހިވާ އިމިއުން ރެސްޕޮންސް އުފެދިދާނެ ކަމަށް ބެލެވެއެވެ.

ފެށޭ އުމުރު: ޓައިޕް 1 ޑައިބެޓީސް އާންމުކޮށް ފެށެނީ ކުޑައިރު ނުވަތަ ޒުވާން އުމުރުގައެވެ. ނަމަވެސް ކޮންމެ އުމުރެއްގައިވެސް މި ބަލި ޖެހިދާނެއެވެ.

އަލާމާތްތައް: އާންމު އަލާމާތްތަކުގެ ތެރޭގައި ހިމެނެނީ ބޮޑަށް ކަރުހިއްކުމާއި، ގިނަގިނައިން ކުޑަކަމުދިއުމާއި، ސަބަބެއް ނެތި ހަށިގަނޑުގެ ބަރުދަން ލުއިވުމާއި، ވަރުބަލިވުމާއި، އަދި ލޮލަށް ފެނުން އާދަޔާ ޚިލާފަށް ބުރަވުމެވެ. މި އަލާމާތްތައް ކުއްލިއަކަށް ފެށި އަވަހަށް ގޯސްވާން ފަށައެވެ.

ބަލި ކޮންޓްރޯލްކުރުން: ޓައިޕް 1 ޑައިބެޓީސްގެ ފަރުވާ އަމާޒުކުރެވިފައި ހުންނަނީ ގަވާއިދުން އިންސުލިން އިންޖެކްޝަން ނުވަތަ އިންސުލިން ޕަންޕް ތެރަޕީ ބޭނުންކުރުމާއި، ލޭގައި ހުންނަ ހަކުރުގެ މިންވަރު ބެލުމާއި، ހަމަހަމަ ކާނާ ކެއުމާއި، އަދި ކަސްރަތުކުރުމަށެވެ. އިންސުލިން ދިނުމުގެ ގޮތްތަކާއި، ކޮންޓިނުއަސް ގްލޫކޯސް މޮނިޓަރސް (ސީޖީއެމްސް)، އަދި އާޓިފިޝަލް ޕެންކްރިއާސް ސިސްޓަމްތަކުގެ ކުރިއެރުމުގެ ސަބަބުން ޓައިޕް 1 ޑައިބެޓީސް ޖެހިފައިވާ ގިނަ ބަޔަކަށް ދިރިއުޅުމުގެ ފެންވަރު ރަނގަޅުވެފައިވެއެވެ.

ޓައިޕް 2 ޑައިބެޓީސް: އިންސުލިން ރެސިސްޓެންސްގެ ނަތީޖާ

ޓައިޕް 2 ޑައިބެޓީސްއަކީ އެންމެ އާންމު ބާވަތުގެ ޑައިބެޓީސްއެވެ. މިއީ ޑައިބެޓީސްގެ 90-95 އިންސައްތަ ކޭސްތަކުގައި ހިމެނޭ ބާވަތެވެ. ޓައިޕް 1 އާ ޚިލާފަށް، ޓައިޕް 2 ޑައިބެޓީސްއަކީ އޮޓޯއިމިއުން ބައްޔެއް ނޫނެވެ. މީގެ ބަދަލުގައި، މިއީ އިންސުލިން ރެސިސްޓެންސްއާ ގުޅިފައިވާ ބައްޔެކެވެ. އިންސުލިން ރެސިސްޓެންސްގައި ހަށިގަނޑުގެ ސެލްތަކުން އިންސުލިންއަށް ދޭ ރެސްޕޮންސް ދަށްވެ، ލޭގައި ހުންނަ ހަކުރު ކޮންޓްރޯލްކުރުމަށް ޕެންކްރިއާސްއިން އިތުރު އިންސުލިން އުފައްދަން ޖެހެއެވެ. ވަގުތު ފާއިތުވަމުންދާއިރު، ޕެންކްރިއާސްއަށް މިކަން ދަތިވެ، ލޭގައި ހުންނަ ހަކުރުގެ މިންވަރު އިތުރުވެއެވެ.

ސަބަބު: ޓައިޕް 2 ޑައިބެޓީސް އާންމުކޮށް ގުޅިފައި ހުންނަނީ ޖެނެޓިކްސްއާއި ލަނބަވުމާއި، ކަސްރަތު ނުކުރުމާއި، އަދި ސިއްހަތަށް ގެއްލުންވާ ކާނާ ކެއުން ފަދަ ދިރިއުޅުމުގެ ވައްޓަފާޅިއާ ގުޅޭ ކަންކަމާއެވެ. އާއިލާގެ ހިސްޓްރީއާއި، ނަސްލާއި، އަދި އުމުރުވެސްމި ބަލި ޖެހުމުގެ ފުރުސަތު އިތުރުކުރެއެވެ.

ފެށޭ އުމުރު: ޓައިޕް 2 ޑައިބެޓީސް އާންމުކޮށް ފެށެނީ 45 އަހަރުން މަތީގެ މީހުންގެ ކިބައިންނެވެ. ނަމަވެސް ބަރުދަން  އިތުރުވުމާއި ދިރިއުޅުމުގެ ވައްޓަފާޅި ބަދަލުވުމުގެ ސަބަބުން މިހާރު ޒުވާނުންގެ މެދުގައިވެސް މި ބަލި އަންނަނީ އާންމުވަމުންނެވެ.

އަލާމާތްތައް: ޓައިޕް 2 ޑައިބެޓީސްގެ އަލާމާތްތައް ޓައިޕް 1 އާ އެއްގޮތެވެ. މީގެ ތެރޭގައި ހިމެނެނީ ކަރުހިއްކުމާއި، ގިނަގިނައިން ކުޑަކަމުދިއުމާއި، ވަރުބަލިވުމާއި، އަދި ލޮލަށް ފެނުން ބުރަވުމެވެ. ނަމަވެސް މި އަލާމާތްތައް ފާޅުވަނީ ވަރަށް ލަހުންނެވެ. މިކަމުގެ ސަބަބުން ބައެއް ފަހަރު ބަލި ދެނެގަތުން ލަސްވެއެވެ.

ބަލި ކޮންޓްރޯލްކުރުން: ސިއްހަތަށް ފައިދާހުރި ކާނާ ކެއުމާއި، ގަވާއިދުން ކަސްރަތުކުރުމާއި، އަދި ހަށިގަނޑުގެ ބަރުދަން ހެޔޮ މިނެއްގައި ބެހެއްޓުން ފަދަ ދިރިއުޅުމުގެ ވައްޓަފާޅިއަށް ގެންނަ ބަދަލުތަކަކީ ޓައިޕް 2 ޑައިބެޓީސް ކޮންޓްރޯލްކުރުމުގައި މުހިންމު ކަންކަމެވެ. ލޭގައި ހުންނަ ހަކުރުގެ މިންވަރު ކޮންޓްރޯލްކުރުމަށް މެޓްފޯމިން ފަދަ ބޭސްތައް އާންމުކޮށް ދެވެއެވެ. އަދި ބައެއް ހާލަތްތަކުގައި އިންސުލިން ތެރަޕީގެ ބޭނުން ޖެހިދާނެއެވެ.

ޓައިޕް 1 އަދި ޓައިޕް 2 ޑައިބެޓީސްއަކީ ތަފާތު ދެ ބައްޔެވެ. މި ދެ ބައްޔަށް ފަރުވާ ދިނުމުގައި ތަފާތު ގޮތްތަކެއް ގެންގުޅެންޖެހެއެވެ. ނަމަވެސް މި ދެ ބާވަތުގެ ޑައިބެޓީސްގައިވެސް ލޭގައި ހުންނަ ހަކުރުގެ މިންވަރު ރަނގަޅަށް ކޮންޓްރޯލްކުރުމަކީ ވަރަށް މުހިންމު ކަމެކެވެ. މިކަމުގެ ސަބަބުން ދިގު މުއްދަތުގެ ސިއްހީ މައްސަލަތަކުން ސަލާމަތްވެ، ދުޅަހެޔޮ ދިރިއުޅުމެއް އުޅެވޭނެއެވެ. ޑައިބެޓީސް ޖެހިފައިވާ މީހުން އެމީހުންގެ ޑޮކްޓަރާ މަޝްވަރާކޮށް، އެމީހުންގެ ހާލަތަށް އެންމެ އެކަށީގެންވާ ފަރުވާގެ ޕްލޭނެއް އެކުލަވާލަންވާނެއެވެ.