މާރުކޭޓް ސަރަހައްދު މަގުހެދުން: 82 އިންސައްތަ މަސައްކަތް ފުރިހަމަކޮށްފި

މާލޭގެ އުތުރު ފަރާތު ބޮޑުތަކުރުފާނު މަގު ތަރައްގީކުރުމުގެ މަޝްރޫއުގެ ދެވަނަ ފިޔަވަހީގެ 82 އިންސައްތަ މަސައްކަތް މިހާރު ނިމިފައިވާ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ހާމަކޮށްފިއެވެ.

މި މަޝްރޫއުގެ ދަށުން މިހާތަނަށް ގިނަ މަސައްކަތްތަކެއް ވަނީ ނިންމާލާފައެވެ. އޭގެ ތެރޭގައި ބިން ހިއްކުމާއި، ޝީޓް ޕައިލް ކުރުމާއި، ޕެނަލް ހަރުކުރުމުގެ އިތުރުން ފެން ހިންދުމަށް ބޭނުންވާ ނިޒާމު ގާއިމުކުރުމުގެ މަސައްކަތްތައް ހިމެނެއެވެ. މީގެ އިތުރުން ސްޓޯމްވޯޓާ ކެޗްޕިޓްތަކާއި، ކޭބަލް ޖަންކްޝަންތައް ހެދުމާއި، ނަޖިސް ފެނާއި ފެން ހޮޅި އެޅުމުގެ މަސައްކަތް ވެސް ވަނީ އެއްކޮށް ނިންމާލާފައެވެ.

އެމްޓީސީސީން މައުލޫމާތު ދޭ ގޮތުގައި ކީވޯލް ކެޕިންގްގެ އެންމެ ފަހު ކޮންކްރީޓް މަސައްކަތްތައް މިއަދުގެ ނިޔަލަށް ނިންމާލުމަށް ވަނީ ތާވަލުކުރެވިފައެވެ. މިއީ މި ސަރަހައްދުގެ އައްސޭރިފަށް ވަރުގަދަކުރުމަށް ކުރެވޭ މުހިންމު މަސައްކަތެކެވެ.

މިހާރު ކުރިއަށްދާ މަސައްކަތްތަކަށް ބަލާއިރު، ކާބް ސްޓޯން ޖެހުމާއި، ސެޓްލްމަންޓް ޓޭންކް ހެދުމުގެ އިތުރުން ފެނާއި ކޭބަލް އެޅުމަށް ބޭނުންވާ ކޮންކްރީޓް މަސައްކަތްތައް ދަނީ ކުރަމުންނެވެ. އަދި މި ހަފުތާގެ ތެރޭގައި މަގުގެ ސަބް-ބޭސް ތައްޔާރުކުރުމާއި ތާރު އެޅުމަށް ވާންޖެހޭ ތައްޔާރީތައް ފެށުމަށް ވަނީ ހަމަޖެހިފައެވެ.

މި މަޝްރޫއު ނިމުމުން މާލޭގެ މާރުކޭޓް ސަރަހައްދުގެ ދަތުރުފަތުރަށް ބޮޑު ލުޔެއް ލިބި، އެ ސަރަހައްދުގެ މަގުތަކުގެ ފެންވަރު ރަނގަޅުވެގެންދާނެ ކަމަށް ބެލެވެއެވެ.