ފަތުރުވެރިކަމުގެ ވުޒާރާއިން ޢާއިލީ ހަވީރެއް މާދަމާ ހުޅުމާލޭގައި ބާއްވަނީ

ފަތުރުވެރިކަމުގެ ވުޒާރާއިން މާދަމާ ހުޅުމާލޭގެ ފޭސް އެކެއްގައި ޢާއިލީ ހަވީރެއް ބާއްވަން ނިންމައިފިއެވެ. މި ހަވީރަކީ ވޭތުވެދިޔަ އެއް އަހަރު ތެރޭގައި ފަތުރުވެރިކަމާބެހޭ ވުޒާރާއިން ހާސިލްކޮށްފައިވާ ކާމިޔާބީތައް ފާހަގަކުރުމުގެ ގޮތުން ބާއްވާ ހަވީރެކެވެ.

ހުޅުމާލޭ ފޭސް 1 ގައި ދިރާގު އެންޓެނާއާ ދިމާ ބީޗް ސަރަހައްދުގައި ބޭއްވުމަށް ހަމަޖެހިފައިވާ މި ހަވީރު އޮންނާނީ މާދަމާ ހަވީރު 4:00 އިން 6:00 އަށެވެ. މި ހަވީރުގެ ހަރަކާތްތައް އިންތިޒާމްކޮށްފައިވަނީ ދެމެހެއްޓެނިވި ފަތުރުވެރިކަމަށް އަމާޒުކޮށްގެންނެވެ.

މި ހަވީރުގައި ކުރިއަށް ގެންދާ ހަރަކާތްތަކުގެ މައިގަނޑު ތީމަކީ ގުދުރަތީ ވެއްޓާއި ކަނޑެވެ. މި ތީމާ ގުޅޭގޮތުން ކުރެހުމާއި، ކްރާފްޓް އެކްޓިވިޓީތަކާއި، އެއްފަހަރު ބޭނުންކޮށްފައި އުކާލާ ޕްލާސްޓިކް ބޭނުންކޮށްގެން ކުރާ ހަރަކާތްތައް ކުރިއަށް ގެންދިއުމަށް ވަނީ ހަމަޖެހިފައެވެ. މީގެ އިތުރުން ބަނާނާ ބޯޑާއި، ޖެޓް ސްކީ އަދި ފަން ޓިއުބް ފަދަ މުނިފޫހިފިލުވުމުގެ ހަރަކާތްތައްވެސް މި ހަވީރުގައި ހިމެނޭނެއެވެ.

މި ހަވީރަކީ ޢާއިލާތަކަށް އެކުގައި ވަގުތު ހޭދަކޮށް، ފަތުރުވެރިކަމުގެ ދާއިރާގެ ކާމިޔާބީތައް ފާހަގަކުރުމުގެ އިތުރުން ތިމާވެށި ރައްކާތެރިކުރުމުގެ މުހިންމުކަން އަންގައިދިނުމަށް ބާއްވާ ހަވީރެއްކަން ފާހަގަކުރެވެއެވެ. ފަތުރުވެރިކަމުގެ ވުޒާރާއިން މި ފަދަ ހަރަކާތްތައް ބޭއްވުމަކީ ދިވެހިރާއްޖޭގެ ފަތުރުވެރިކަން ކުރިއެރުވުމަށާއި، ދެމެހެއްޓެނިވި ގޮތެއްގައި ފަތުރުވެރިކަން ތަރައްޤީކުރުމަށް އެޅޭ މުހިންމު ފިޔަވަޅެއް ކަމުގައި ބެލެވެއެވެ.