އެޕްސްޓައިންގެ ސިއްރު ލިޔުންތަކެއް ހާމަކުރުމާއެކު ދުނިޔޭގެ ނުފޫޒުގަދަ ފަރާތްތަކަށް ބޮޑު ސިހުމެއް

ޖިންސީ ކުށްތަކެއް ސާބިތުވެފައިވާ ޖެފްރީ އެޕްސްޓައިންއާ ގުޅުންހުރި، ސިއްރު ކުރެވިފައިވާ ގިނަ އަދަދެއްގެ ލިޔުންތަކެއް އެމެރިކާގެ ޖަސްޓިސް ޑިޕާޓްމަންޓުން އާންމުކުރުމާ ގުޅިގެން، ދުނިޔޭގެ ސިޔާސީ، ވިޔަފާރި އަދި އިޖުތިމާއީ ގޮތުން ނުފޫޒުގަދަ ފަރާތްތަކުގެ މެދުގައި ބޮޑު ނުތަނަވަސްކަމެއް އުފެދިއްޖެއެވެ.

މި ލިޔުންތަކުން ހާމަވާ ގޮތުގައި، އެޕްސްޓައިން ވަނީ ދުނިޔޭގެ އެކި ބައްރުތަކުގެ އެންމެ މަތީ ފަންތީގެ ސިޔާސީ ވެރިންނާއި، މަހުޖަނުންނާއި، ޝާހީ އާއިލާތަކުގެ ތެރެއަށް އޭނާގެ ނުފޫޒު ވަރަށް ފުންކޮށް ފޯރުވާފައެވެ. މިގޮތުން އާންމުކުރި މިލިއަނަކަށްވުރެ ގިނަ ސޮފްހާގެ އީމެއިލްތަކާއި، ނޯޓްތަކާއި އަދި ހެކިންގެ ބަޔާންތަކުގެ ތެރޭގައި އެމެރިކާގެ ކުރީގެ ރައީސުންނާއި، އިނގިރޭސި ޝާހީ އާއިލާގެ ބޭފުޅުންނާއި، އިންޑިއާގެ އިސް ސިޔާސީ ބޭފުޅުންގެ އިތުރުން ޓެކްނޮލޮޖީ ދާއިރާގެ ބޮޑެތި މަހުޖަނުންގެ ނަންތައް ހިމެނެއެވެ.

މި ލިޔުންތަކުގައި ހިމެނޭ ބައެއް މުހިންމު ކަންކަމަށް ބަލާއިރު، ކުޑަކުދިންނަށް ޖިންސީ ގޯނާކުރި ކަމުގެ ތުހުމަތުތައް 2006 ވަނަ އަހަރުން ފެށިގެން ފެޑަރަލް އިދާރާތަކަށް އެނގިފައިވީ ނަމަވެސް، އެކަށީގެންވާ ފިޔަވަޅެއް އަޅާފައި ނުވާކަން ހާމަވެއެވެ. އަދި 2008 ވަނަ އަހަރު އެޕްސްޓައިންއަށް ދީފައިވާ 18 މަސްދުވަހުގެ ލުއި ހުކުމުގެ މައްސަލަވެސް މިހާރު ވަނީ އަލުން ހޫނުވެފައެވެ.

ލިޔުންތަކުން ހާމަވާ ގޮތުގައި، އެޕްސްޓައިން ވަނީ ދެކުނު އޭޝިއާގެ ސިޔާސީ ކަންކަމަށްވެސް ޝައުގުވެރިކަން ފާޅުކޮށްފައެވެ. އެގޮތުން ޕާކިސްތާނުގެ ޕޯލިއޯ ނައްތާލުމުގެ މަސައްކަތްތަކާއި، އިންޑިއާ އާއި ޕާކިސްތާނުގެ ފެނުގެ މައްސަލަތަކުގެ އިތުރުން 2018 ވަނަ އަހަރު އިމްރާން ޚާން ވެރިކަމަށް ވަޑައިގަތުމުން އެކަމާ މެދު ނުރުހުން ފާޅުކޮށްފައިވާކަން އެނގެއެވެ. މީގެ އިތުރުން އިންޑިއާގެ ބޮޑުވަޒީރު ނަރެންދުރަ މޯދީގެ އަރިސް ސިޔާސީ ބޭފުޅުންނާ ގުޅުން ބަދަހިކޮށް، ބައިނަލްއަގުވާމީ މައިދާނުގައި ނުފޫޒު ފޯރުވަން އޭނާ މަސައްކަތްކޮށްފައިވާ ކަމަށް ލިޔުންތަކުން ދައްކައެވެ.

އިނގިރޭސިވިލާތުގެ ޕްރިންސް އެންޑްރޫ ފަދަ ބޭފުޅުންނާ އޮތް ގުޅުންވެސް މި ލިޔުންތަކުން އަލުން ވަނީ ފެންމަތިވެފައެވެ. ތަޖުރިބާކާރުން ބުނާ ގޮތުގައި، އެޕްސްޓައިން ވަނީ އޭނާގެ އަސްލު ސޫރަ ފޮރުވުމަށްޓަކައި ދުނިޔޭގެ ސިއްހީ ކަންކަމާއި، ތައުލީމާއި އަދި އަންހެނުންގެ ހައްގުތަކަށް މަސައްކަތްކުރާ ޖަމިއްޔާތަކުގެ ނަން ބޭނުންކޮށްފައެވެ.

ޖުމްލަ 6 މިލިއަން ސޮފްހާގެ ތެރެއިން މިހާތަނަށް އާންމުކޮށްފައިވަނީ ދެބައިކުޅަ އެއްބައެވެ. ގިނަ ބަޔަކު ދަނީ ބާކީ ހުރި ލިޔުންތައްވެސް ހާމަކުރުމަށާއި، މި ނުފޫޒުގަދަ ވިއުގައިގައި ހިމެނޭ އެންމެހާ ފަރާތްތަކާމެދު ފިޔަވަޅު އެޅުމަށް ގޮވާލަމުންނެވެ.