ހިޔާ ފްލެޓެއްގައި މީހަކު ރަހީނުކުރުން: މައްސަލައަކީ މަސްތުވާތަކެތީގެ ވިޔަފާރީގެ ދެބަސްވުން

ހިޔާ ފްލެޓެއްގައި މީހަކު ރަހީނުކޮށް އެމީހާއަށް އަނިޔާކުރި މައްސަލައަކީ މަސްތުވާތަކެތީގެ ވިޔަފާރިއެއްގައި ހިނގި ދެބަސްވުމަކާއި ގުޅިގެން ހިންގައިފައިވާ ކަމެއް ކަމަށް ދިވެހި ފުލުހުންގެ ޚިދުމަތުން ބުނެފިއެވެ. 

ދިވެހި ފުލުހުންގެ ޚިދުމަތުން މިއަދު އިސްކަންދަރު ކޮށީގައި ބޭއްވި ނޫސްވެރިންގެ ބައްދަލުވުމުގައި އެސިސްޓަންޓް ކޮމިޝަނަރ އޮފް ޕޮލިސް މުޙައްމަދު ދާއޫދު ވިދާޅުވީ، ރަހީނުކޮށްގެން ގެންގުޅުނު މީހާއާއި، ރަހީނުކުރުމުގައި ބައިވެރިވި މީހުންނާ ގުޅުން އޮތްކަން މިހާތަނަށް ތަހުޤީގަށް ފާހަގަވެފައިވާކަމަށެވެ. އަދި އެ ގުޅުމަކީ މަސްތުވާތަކެތީގެ ވިޔަފާރިއާއި ގުޅިގެން އޮންނަ ގުޅުމެއްކަން ފާހަގަކުރެވިފައިވާކަމަށް އެސިސްޓަންޓް ކޮމިޝަނަރ އޮފް ޕޮލިސް ވިދާޅުވިއެވެ. 

 ހިޔާ ޓަވަރުގެ އެޕާޓްމަންޓެއްގައި މީހަކު ރަހީނުކޮށްގެން އުޅޭކަމަށް ފުލުހުންނަށް މަޢުލޫމާތު ލިބިފައިވަނީ މިމަހުގެ 12 ވަނަ ދުވަހުގެ ރޭ 19:40 ހާއިރުކަމަށް ފުލުހުން ކުރިން ބުނެފައިވެއެވެ. ފުލުހުން ވަނީ ރަހީނުކޮށްފައިވާ މީހާ ސަލާމަތްކޮށް، 12 މީހުން ފުލުހުންގެ ބެލުމުގެ ދަށަށް ގެންގޮސްފައެވެ.

އޭސީޕީ ދާއޫދު ވިދާޅުވީ ތަހުޤީޤަށް މިހާތަނަށް ލިބިފައިވާ މަޢުލޫމާތުން ބޮޑަށް ބެލެވެނީ މަސްތުވާތަކެތީގެ ވިޔަފާރިކުރުމުގެ ތެރޭގައި އުފެދުނު ދެބަސްވުމުގެ ތެރެއިން ހިންގި ކަމެއް ކަމަށެވެ.

ހެޑް އޮފް ޑްރަގް އެންފޯސްމަންޓް، ސްޕްރިންޑެންޓެޑް އޮފް ޕޮލިސް ނާހިދު ޙުސައިން ނޫސްވެރިންގެ ބައްދަލުވުމުގައި ވާހަކަދައްކަވަމުން ވިދާޅުވީ، މި މައްސަލައިގެ ފަހަތުގައި ހުރިކަމަށް ތުހުމަތުކުރެވޭ މީހާއަކީ ރ. އިންނަމާދޫ ފެރޯމާގޭ މުހައްމަދު ސަލީމްކަމަށެވެ.

މައްސަލައިގެ ފަހަތުގައި ހުރިކަމަށް ތުހުމަތުކުރެވޭ މުޙައްމަދު ސަލީމް.ފޮޓޯ: ވަގުތު

އަދި ކޯޓު އަމުރެގެ ދަށުން 65 އަހަރުގެ އެމީހާ ބަލާފާސްކުރިއިރު އޭނާގެ ހަށިގަނޑުން ޝައްކުކުރެވޭ އެއްޗެއް ހުރި ޖުމްލަ 13 ރަބަރު ޕެކެޓް ފެނިފައިވާކަމަށް ނާހިދު ވިދާޅުވިއެވެ.

މީގެއިތުރުން އޭނާ ދިރިއުޅޭ އެޕާޓްމަންޓް ބަލާ ފާސްކުރިއިރު މަސްތުވާތަކެއްޗަށް ޝައްކުކުރެވޭ އެއްޗެއް ހުރި 8 ރަބަރު ޕެކެޓް ފެނިފައިވާކަން ވާކަމަށާއި، އޭނާ އަކީ އުމުރުދުވަހަށް ޖަލަށް ލާފައިވާ މީހެއްކަމަށެވެ.

މަސްތުވާތަކެތި ޓްރެފިކް ކުރި މައްސަލައެއްގައި އުމުރުދުވަހުގެ ޖަލު ޙުކުމް އިއްވި މިމީހާ އަކީ ޖަލު ޙުކުމް ތަންފީޒު ކުރަމުންދަނިކޮށް 8 ޖުލައި 2021 ގައި ވަނީ ގޭބަންދަށް ބަދަލުކޮށްފައިވާ މީހެއް ކަމަށް ނާހިދު ވިދާޅުވިއެވެ.  އަދި ގޭބަންދަށް ބަދަލުކުރިފަހުން، 2023 ވަނަ އަހަރު ޑައިނޯމިކް ޓްރެފިކްކުރުމުގެ އިތުރު މައްސަލައެއްގައި ހުޅުމާލޭ ކޯޓުގައި މިހާރުވެސް އޭނާގެ މައްޗަށް ޝަރީއަތް ހިނގަމުން އެބަދާ ކަމަށް ނާހިދު ވިދާޅުވިއެވެ.  

ހިޔާ ޓަވަރުގައި މީހަކު ރަހީނުކޮށްފައި ހުރީ ހިޔާ 9ވަނަ ޓަވަރުގެ 20 ވަނަ ފަންގިފިލާގެ 11 ވަނަ އެޕާޓްމަންޓްގައެވެ. މިމައްސަލާގައި ހައްޔަރުކުރި 12 މީހުންގެ ބަންދަށް ވަނީ މުއްދަތު ޖަހާފައެވެ.