ރަސްދޫގައި ތަރައްޤީކުރާ 50 ހައުސިންގ ޔުނިޓްތަކުގެ ބިންްގާއަޅައިފި!

އއ.ރަސްދޫގައި ތަރައްޤީ ކުރާ 50 ހައުސިންގ ޔުނިޓްތަކުގެ ބިންގާއަޅައިފިއެވެ.

އެކަމަށްޓަކާ ރަސްދޫގައި މިއަދު ބޭއްވި ޚާއްސަ ރަސްމިއްޔާތެއްގައި ބިންގާ އަޅުއްވައިދެއްވީ ގެދޮރުވެރިކަމާއި ބިމާއި އުމްރާނީ ތަރައްޤީއާއި ބެހޭ ވަޒީރު ޑރ ޢަލީ ހައިދަރު އަޙްމަދެވެ.

ރަސްދޫގައި ހައުސިންގ ޔުނިޓް އެޅުމުގެ އެއްބަސްވުމުގައި ސޮއިކޮށްފައިވަނީ 2023 ވަނަ އަހަރުގެ ސެޕްޓެމްބަރު މަހުގެ 4ވަނަ ދުވަހުއެވެ. މި މަޝްރޫޢުގެ މަސައްކަތް ކޮންޓްރެކްޓްކޮށްފައިވަނީ އެސްޖޭ ކޮންސްޓްރަކްޝަން ޕްރައިވެޓް ލިމިޓެޑާއެވެ.

ރަސްދޫގައި ތަރައްޤީކުރާ 50 ހައުސިންގ ޔުނިޓްގެ ބިންގާ އެޅުމުގެ ރަސްމިއްޔާތުގައި ވާހަކަދައްކަވަމުން ގެދޮރުވެރިކަމާއި ބިމާއި އުމްރާނީ ތަރައްޤީއާއި ބެހޭ ވަޒީރު ޑރ ހައިދަރު ވިދާޅުވީ ހައުސިން ޔުނިޓްތައް އަޅާނީ އާންމުންނަށް ލުއިފަސޭހަވާ ގޮތަށް ކަމަށެވެ. އަދި އެއީ ޖާގަ ބޮޑު ހައުސިންގ ޔުނިޓްތަކަށްވާއިރު މި މަޝްރޫއާއެކު ރަސްދޫގެ ބޯހިޔާވަހިކަމަށް ހައްލު ލިބިގެންދާނެ ކަމަށެވެ.

 މި މަޝްރޫޢަށް ބައެއް ބަދަލުވެސް ގެނެސްފައިވާކަމަށް ގެދޮރުވެރިކަމާ ބެހޭ ވުޒާރާއިން ބުނެފައިވާއިރު، ކުރިން މި ހައުސިން ޔުނިޓްތައް ރަށުގެ ދެ ސަރަޙައްދެއްގައި އަޅަން ނިންމާފައި އޮތް ނަމަވެސް، މިހާރު ހުރިހާ ޔުނިޓްތައް ރަށުގެ އެއް ސަރަޙައްދުގައި އަޅާގޮތަށް ޕްރޮޖެކްޓަށް ބަދަލުގެނެސްފައިވާކަމަށް ވެސް ވުޒާރާއިން ބުނެއެވެ.

ރަސްދޫ ހައުސިންގ ޔުނިޓް ތަކުގެ ބިންގާ އެޅުމުގެ ރަސްމިއްޔާތު. ފޮޓޯ: ވުޒާރާ

ރަސްދޫގައި އަޅާ ކޮންމެ ހައުސިން ޔުނިޓެއްގައި 1000 އަކަފޫޓް ހުންނާނެ ކަމަށާއި، ކޮންމެ ޔުނިޓެއްގައި 3 ކޮޓަރިއާއި، 3 ފާޚާނާއާއި، ސިޓީން ރޫމް، ބަދިގެ ކާގެ އަދި ލޯންޑަރީއާއި ސްޓޯރޫމް ހުންނާނެ ކަަމަށްވެސް ވުޒާރައިން ބުނެފައިވެއެވެ. 

މީގެއިތުރުން ހައުސިން ޔުނިޓްތަކުގައި ދިރިއުޅޭ މީހުންނަށް ހިތްފަސޭހަ މާހައުލެއް ޤާއިމްކުރުމަށްޓަކައި ޔުނިޓްތައް ވަށައިގެން އަލިކޮށް، ޕާކަކާއި ވެހިކަލްތައް ޕާކްކުރާނެ ސަރަހައްދެއް ހަދާނެކަމަށްވެސް އެވުޒާރާއިން ވިދާޅުވިއެވެ.

މި މަސައްކަތް ހަވާލުކޮށްފައިވަނީ ހައުސިން ޔުނިޓްތަކުގެ މަސައްކަތް ފަށާތާ ގާތްގަނޑަކަށް 9 މަސް ދުވަހުގެ ތެރޭގައި ނިންމުމަށެވެ. މި މަޝްރޫޢަށް ސަރުކާރުން 84.2 މިލިއަން ރުފިޔާ ޚަރަދުކުރެއެވެ.

ރަސްދޫއިން އެންމެ ފަހުން ގޯތި ދޫކޮށްފައިވަނީ މީގެ ގާތްގަނޑަކަށް 25 އަހަރު ކުރިންނެވެ.