ކެފޭ އުސޫލުން މަސްތުވާތަކެތި ވިއްކަމުންދިޔަ 48 ތަނެއް ބަންދުކޮށްފި: ފުލުހުން

ކެފޭ އުސޫލުން މަސްތުވާތަކެތި ވިއްކަމުންދިޔަ 48 ތަނެއް މިހާތަނަށް ބަންދުކޮށްފައިވާ ކަމަށް ދިވެހި ފުލުހުންގެ ޚިދުމަތުން ބުނެފިއެވެ. 

ފުލުހުން މިއަދު އިސްކަންދަރު ކޮށީގައި ބޭއްވި ނޫސްވެރިންގެ ބައްދަލުވުމުގައި ޑްރަގް އެންފޯސްމެންޓް ޑިޕާޓްމެންޓުގެ ހެޑް، ސުޕްރިޑެންޓް އޮފް ޕޮލިސް، ނާހިދު ހުސެއިން ވިދާޅުވީ، އާ ލީޑަރޝިޕާއެކު ކެފޭ އުސޫލުން މަސްތުވާތަކެތި ބޭނުން ކުރުމުގެ ފުރުސަތު ދޭ ތަންތަން ބަންދުކުރަމުން އަންނަ ކަމަށެވެ.

އެގޮތުން އެމަސައްކަތުގެ ދަށުން މިހާތަނަށް 48 ތަނެއް ބަންދުކޮށްފައިވާ ކަމަށާއި އަދި މާލޭގެ އެކި ސަރަހައްދުތަކުގައި މަސްތުވާތަކެތީގެ ވިޔަފާރިކޮށް، ވިއްކަމުން އަންނަ ކަމަށް ތުހުމަތު ކުރެވޭ ތަންތަނުގައި ފުލުހުން ޑިއުޓީ ކުރަމުން އަންނަ ކަމަށް ވެސް ނާހިދު ވިދާޅުވިއެވެ.

މަސްތުވާތަކެތީގެ 683 މައްސަލައެއް މިހާތަނަށް ފުލުހުންނަށް ރިޕޯޓް ކޮށްފައިވާއިރު، އޭގެ ތެރެއިން 345 މައްސަަލައެއްގެ ތަހުޤީޤު ނިންމައި، ޕްރޮސެކިއުޓަރ ޖެނެރަލް (ޕީޖީ)ގެ އޮފީހަށް ފޮނުވާފައިވާ ކަމަށާއި، އަދި ޑްރަގް ޓްރެފިކިންގެ 19 މައްސަލަ 22 މީހެއްގެ މައްޗަށް ސާބިތުވާ ކަމަށް ޙުކުމް ކޮށްފައިވާ ކަމަށް ވެސް ނާހިދު ވިދާޅުވިއެވެ.

މަސްތުވާތަކެއްޗާ ދެކޮޅަށް ހިންގަމުން އަންނަ އޮޕަރޭޝަނުގައި މިހާތަނަށް 1،009 މީހުން ހައްޔަރުކޮށްފައިވާއިރު، ރާއްޖޭގެ އެކި ސަރަހައްދުތަކުގައި ހިންގާ އޮޕަރޭޝަންތަކުގައި މިހާތަނަށް 183 ކިލޯއަށްވުރެ ގިނަ މަސްތުވާތަކެތި އަތުލައިގެންފައިވާ ކަމަށް ފުލުހުން ހާމަކޮށްފައިވެއެވެ.