ޣައްޒާގެ ޙިޞާރު ފޫއަޅުވާލަން 100 އަށްވުރެ ގިނަ އުޅަނދުގެ ބޮޑު ގާފިލާއެއް ތައްޔާރުވަނީ

އިޒްރޭލުން ޣައްޒާއަށް އަޅާފައިވާ ލާއިންސާނީ  ޙިޞާރު ހުއްޓުވައި، އެހީގެ ތަކެތި ފޯރުކޮށްދިނުމަށްޓަކައި ބައިނަލްއަގުވާމީ އެކްޓިވިސްޓުން އިސްނަގައިގެން މިހާތަނަށް ފޮނުވާ އެންމެ ބޮޑު ކަނޑުގެ ގާފިލާ ފޮނުވުމުގެ ތައްޔާރީތައް ފަށައިފިއެވެ.

ދެކުނު އެފްރިކާގެ ޖޮހަނަސްބާގާއި ފަލަސްތީނުގެ ރާމަﷲ ގައި ބޭއްވި ބައްދަލުވުންތަކުގައި ނިންމާފައިވަނީ، 100 އަށްވުރެ ގިނަ އުޅަނދާއި، 1،000 އެއްހައި ސިއްހީ މަސައްކަތްތެރިންނާއެކު މި ބޮޑު ގާފިލާ ޣައްޒާއަށް ދަތުރުކުރުމަށެވެ. މިއީ މިދިޔަ އޮކްޓޫބަރު މަހު ޣައްޒާއަށް އެހީ ހިފައިގެން ދިޔަ "ގްލޯބަލް ރެސިލިއަންސް ފްލޮޓިލާ" އިޒްރޭލުން ހުއްޓުވައި، އެކްޓިވިސްޓުން ހައްޔަރުކުރުމާ ގުޅިގެން ކުރިއަށްގެންދާ ވަރުގަދަ ހަރަކާތެކެވެ. އޭރު ހުއްޓުވި ގާފިލާގައި 40 އުޅަނދު ހިމެނުނުއިރު، ތިމާވެށީގެ އެކްޓިވިސްޓް ގްރެޓާ ތުންބާގް ހިމެނޭހެން 450 އަށްވުރެ ގިނަ މީހުން އިޒްރޭލުން ހައްޔަރުކުރިއެވެ.

މި އައު މިޝަންގެ ރޭވުންތައް އިޢުލާނުކޮށްފައިވަނީ ދެކުނު އެފްރިކާގެ ނެލްސަން މަންޑޭލާ ފައުންޑޭޝަނުގައި މިދިޔަ ބުދަ ދުވަހު ބޭއްވި ނޫސްވެރިންގެ ބައްދަލުވުމެއްގައެވެ. މި ބައްދަލުވުމުގައި ވާހަކަދައްކަވަމުން ނެލްސަން މަންޑޭލާގެ ކާފަދަރިކަލުން އަދި ކުރީގެ ގާފިލާގައި ހައްޔަރުކުރި މަންޑްލާ މަންޑޭލާ ވިދާޅުވީ، މިއީ އިންސާނީ ކަރާމާތާއި އިންސާފު ހޯދުމަށް ކުރާ މަސައްކަތެއް ކަމަށެވެ. އަދި ދުނިޔޭގެ ހުރިހާ ގައުމުތަކަކުން މި ހަރަކާތުގައި ބައިވެރިވުމަށް އޭނާ ގޮވާލެއްވިއެވެ.

މި ގާފިލާ އަނެއްކާވެސް ހުއްޓުވި ކަމުގައިވިޔަސް، މިއީ ޣައްޒާގެ ރައްޔިތުންނާއެކު މުޅި ދުނިޔެ އޮތްކަން ހާމަކޮށްދޭ ވަރުގަދަ މެސެޖަކަށް ވާނެ،

މަންޑްލާ 

އިޒްރޭލުން ބުނަމުންދަނީ މިފަދަ ގާފިލާތަކަކީ ހަމައެކަނި ރަމްޒީ ކަމެއް ކަމަށާއި، އެހީ ފޯރުކޮށްދިނުމަށް އެގައުމުން ހުރަސް ނާޅާ ކަމަށެވެ. ނަމަވެސް ފަލަސްތީނު ސަރުކާރާއި ބައިނަލްއަގުވާމީ އިދާރާތަކުން ބުނާ ގޮތުގައި ޣައްޒާއަށް ވަންނަ އެހީގެ މިންވަރު އިންތިހާއަށް މަދެވެ.

2025 ވަނަ އަހަރުގެ އޮކްޓޫބަރު މަހު ހަމަލާބަދަލުކުރުން ހުއްޓާލުމަށް އިޢުލާނުކުރި ނަމަވެސް، އިޒްރޭލު ސިފައިން އަދިވެސް ދަނީ ޣައްޒާގެ ދެބައިކުޅަ އެއްބަޔަށްވުރެ ބޮޑު ސަރަހައްދެއް ކޮންޓްރޯލް ކުރަމުންނެވެ. އަދި ހުޅަނގު އައްސޭރީގައި އިޒްރޭލުގެ ވަޒަންވެރިން ފަލަސްތީނު މީހުންނަށް ދޭ ހަމަލާތައް ވަނީ ވަރަށް ބޮޑަށް އިތުރުވެފައެވެ. އދ. ގެ ތަފާސްހިސާބުތަކުން ދައްކާގޮތުގައި، މިއަހަރުގެ ޖެނުއަރީ މަހު އެކަނިވެސް 700 އެއްހައި ފަލަސްތީނު ރައްޔިތުން ވަނީ އެމީހުންގެ ގެދޮރުން ބޭރުކޮށްލާފައެވެ.

2026 ވަނަ އަހަރަށް ތާވަލުކުރެވިފައިވާ މި ބޮޑު ގާފިލާގެ މަގުސަދަކީ ޣައްޒާގެ ރައްޔިތުން ތަހައްމަލު ކުރަމުންދާ ވޭނާއި ދަތިތަކަށް ދުނިޔޭގެ ސަމާލުކަން ހޯދައި، ބޭނުންވާ އިންސާނީ އެހީ ފޯރުކޮށްދިނުމެވެ.