ކުރިއަށް އޮތް 4 އަހަރަކީ ސިއްޙީ ނިޒާމުގެ އައު ބާބެއް ލިޔެވިގެންދާނެ ދުވަސްތަކެއް: ސިއްޙަތާއި ބެހޭ ވަޒީރު

ދަރުމަވަންތަ ހޮސްޕިޓަލް ޓަރޝަރީ ފެންވަރުގައި ރަސްމީކޮށް ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުން، ކުރިއަށް އޮތް 4 އަހަރަކީ ސިއްޙީ ނިޒާމުގެ މުޅިން އައު ބާބެއް ލިޔެވިގެންދާނެ ދުވަސްތަކެއްކަމަށް ސިއްޙަތާބިއްޙަތާބެހޭ ވަޒީރު އަބްދުﷲ ނާޒިމް އިބްރާހިމް ވިދާޅުވެއްޖެއެވެ.

މި ރަސްމިއްޔާތުގައި ވާހަކަފުޅު ދައްކަވަމުން ވަޒީރު ވިދާޅުވީ، 2018 ވަނަ އަހަރު ނިމުނު ނަމަވެސް ދަރުމަވަންތަ ހޮސްޕިޓަލުގެ ބޭނުން އެންމެ އެދެވޭ ގޮތުގައި ނުކުރެވި ހުރުމަކީ ބޮޑު އިހުމާލެއް ކަމަށެވެ. އެހެންނަމަވެސް މިއަދު މި ހޮސްޕިޓަލް ހުޅުވުމުން ފެންނަނީ ވަރަށް އުންމީދީ މަންޒަރެއްކަމަށް ވަޒީރު ފާހަގަކުރެއްވިއެވެ.

ވަޒީރު އިތުރަށް ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ވޭތުވެދިޔަ 52 ހަފްތާގެ ތެރޭގައި ސިއްޙީ ދާއިރާ ހަރުދަނާކުރުމަށް ގިނަގުނަ މަސައްކަތްތަކެއް ކުރައްވާފައިވާ ކަމަށެވެ. މީގެ ތެރޭގައި ބޭސްފަރުވާގެ ނިޒާމް ހަރުދަނާކުރުމާއި، ދުޅަހެޔޮ އާބާދީއެއް ބިނާކުރުމާއި، ސިއްޙީ ދާއިރާގެ ގަވަރނަންސް ހަރުދަނާކުރުން ހިމެނެއެވެ.

އިރާދަކުރެއްވިއްޔާ މި ވޭތުވެދިޔަ 1 އަހަރު ކުރެވުނު މަސައްކަތާއި އަޅުގަނޑުމެންނަށް ފަށައިގަނެވިފައި ހުރި ސިއްޙީ ދާއިރާގެ މުހިންމު މަސައްކަތްތަކާއެކު ކުރިއަށް އޮތް 4 އަހަރު ވާނީ ދިވެހި ރައްޔިތުންނަށް ސިއްޙީ ނިޒާމުގެ މުޅިން އައު ބާބެއް ލިޔެވިގެންދާނެ 4 އަހަރަށް

ވަޒީރު ވިދާޅުވިއެވެ.

ވަޒީރު އިތުރަށް ވިދާޅުވީ، ރާއްޖޭގެ ސިއްޙީ ނިޒާމް ހަރުދަނާކުރުމުގެ މަސައްކަތުގެ ދަށުން މާލޭ ސަރަޙައްދުގެ އިތުރުން، އާބަން ސެންޓަރުތައް ހިމެނޭ ގޮތަށް މުޅި ރާއްޖޭގައި ފޯރުކޮށްދޭ ސިއްޙީ ޚިދުމަތް ހަރުދަނާވެގެންދާނެ ކަމަށެވެ.

މި ރަސްމިއްޔާތު ބޭއްވުނީ  ދަރުމަވަންތަ ހޮސްޕިޓަލުގައެވެ. މި ރަސްމިއްޔާތުގައި ސަރުކާރުގެ އިސް ބޭފުޅުންނާއި ސިއްޙީ ދާއިރާގެ މަސްއޫލުވެރިން ބައިވެރިވެ ވަޑައިގެންނެވިއެވެ.