ސަބްސިޑީ ދިނުމުގެ އުސޫލަށް ބަދަލު ގެނައުމަށް ހަރުދަނާ ނިޒާމެއް ބޭނުންވާކަމަށް ގަވަރުނަރު ވިދާޅުވެއްޖެ

ސަބްސިޑީ ދިނުމުގެ އުސޫލަށް ގެންނަ ބަދަލުގައި އެހީ އެންމެ ބޮޑަށް ބޭނުންވާ ފަރާތްތައް ދެނެގަތުމަށް ހަރުދަނާ ނިޒާމެއް ގާއިމްކުރުން މުހިންމު ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ގަވަރުނަރު އަހުމަދު މުނައްވަރު ވިދާޅުވެއްޖެއެވެ.

ރައްޔިތުންގެ މަޖިލީހުގެ ބަޖެޓު ދިރާސާކުރާ ކޮމެޓީގެ ބައްދަލުވުމެއްގައި ވާހަކަފުޅު ދައްކަވަމުން ގަވަރުނަރު މުނައްވަރު ވިދާޅުވީ، ސަބްސިޑީއަށް ގެންނަ ބަދަލުތަކަކީ ހެޔޮ ބަދަލެއް ނަމަވެސް، މިއީ ވަރަށް ރޭވުންތެރިކަމާއެކު ކުރަންޖެހޭ ކަމެއް ކަމަށެވެ.

ދެތިން އަހަރުވެއްޖެ މިކަން ކުރަން އުޅޭތާ، މިކަން ނުވެ އޮތީ، އެކަމަށް ބޭނުންވާ އޮނިގަނޑު ނެތުމުން. އަޅުގަނޑުމެންގެ ލަފައަކީ ރަނގަޅު ޑޭޓާ ބޭސްއެއް ހެދުން. ހުރިހާ މައުލޫމާތު ހިމެނޭ ޑޭޓާ ބޭސްއަކަށް ވާން ޖެހޭ

މުނައްވަރު ވިދާޅުވިއެވެ.

ގަވަރުނަރު އިތުރަށް ވިދާޅުވީ، ހުރިހާ ގޭބީސީއެއްގެ ފުރިހަމަ ޑޭޓާ ބޭސްއެއް އަވަހަށް ހެދުން މުހިންމު ކަމަށެވެ. އެއީ އެންމެ ހައްގުވެރި ފަރާތްތައް ހޯދުމަށް މި މައުލޫމާތު މުހިއްމުވާތީއެވެ.

ދައުލަތުގެ ޚަރަދުތަކާ ގުޅޭގޮތުން ވާހަކަފުޅުދައްކަވަމުން ގަވަރުނަރު މުނައްވަރު ފާހަގަކުރެއްވީ، ދައުލަތުން ސްޓޫޑަންޓު ލޯނަށް ކުރާ ހޭދަ އަހަރުން އަހަރަށް އިތުރުވަމުންދާ ކަމަށެވެ. މިގޮތުން، 5 އަހަރު ކުރިން 16 މިލިއަން ޑޮލަރު ޚަރަދުކުރަމުންދިޔަ ކަމެއް މިހާރު 52 މިލިއަން ޑޮލަރަށް އިތުރުވެފައިވާ ކަމަށް ވިދާޅުވިއެވެ. މިއީ ޤައުމުގެ ރިޒާވަށް ސީދާ އަސަރުކުރަމުންދާ ކަމެއް ކަމަށްވެސް ގަވަރުނަރު ފާހަގަކުރެއްވިއެވެ.

މީގެއިތުރުން، އަންނަ އަހަރު ވެލާނާ އިންޓަރނޭޝަނަލް އެއަރޕޯޓުގެ އައު ޓަރމިނަލް ބޭނުންކުރަން ފަށާއިރު، ރާއްޖެއަށް އަންނަ ފަތުރުވެރިންގެ އަދަދު އިތުރުކުރުމަށް މަސައްކަތްތަކެއް ކުރަން ޖެހޭ ކަމަށާއި، އެކަމަށް ބަޖެޓުގައި ޖާގަ ދޭންޖެހޭނެ ކަމަށްވެސް ގަވަރުނަރު މުނައްވަރު ވަނީ ވިދާޅުވެފައެވެ.