އިޒްރާއީލުން ލުބުނާނުގެ ސަރަހައްދަށް އެޤައުމުގެ ޖަމާއަތެއްގެ އިސްވެރިއަކު ރަހީނުކުރިކަމަށް ތުހުމަތުކޮށްފި

ލުބުނާނުގެ ހަތިޔާރު އެޅި ޖަމާއަތެއް ކަމަށްވާ އަލް-ޖަމާއާ އަލް-އިސްލާމިއްޔާ އިން، އިޒްރާއީލު ސިފައިން އެ ޖަމާއަތުގެ އިސް މެންބަރަކު ވަގަށް ނަގާފައިވާ ކަމަށް ބުނެ އިޒްރާއީލަށް ތުހުމަތުކޮށްފިއެވެ.

މި ހާދިސާ ހިނގާފައިވަނީ ލުބުނާނުގެ ދެކުނުގެ ސަރަހައްދަކަށް އިޒްރާއީލު ސިފައިން ވަދެ ހިންގި ހާއްސަ އޮޕަރޭޝަނެއްގެ ތެރެއިންނެވެ.

އެ ޖަމާއަތުން ހާމަކުރި ގޮތުގައި، އިޒްރާއީލުން ވަގަށް ނަގާފައިވަނީ އެ ޖަމާއަތުގެ އޮފިޝަލެއް ކަމަށްވާ އަތުވީ އަތުވީ އެވެ. އޭނާ ހައްޔަރުކޮށްފައިވަނީ ހަސްބައްޔާ ޑިސްޓްރިކްޓްގައި ހުންނަ އޭނާގެ އަމިއްލަ ގެއިންނެވެ. އަތުވީ އަކީ ހިއްބާރިއްޔާ އަވަށުގެ ކުރީގެ މޭޔަރުވެސް މެއެވެ. މި އަމަލަކީ ބައިނަލްއަގުވާމީ ގާނޫނުތަކާ ހިލާފަށް އިޒްރާއީލުން ހިންގި "އިސްތިއުމާރީ" އަމަލެއްގެ ގޮތުގައި އެ ޖަމާއަތުން ވަނީ ސިފަކޮށްފައެވެ.

އިޒްރާއީލު އަސްކަރިއްޔާއިން ނެރުނު ބަޔާނެއްގައި ބުނެފައިވަނީ، ވޭތުވެދިޔަ ހަފުތާތަކުގައި އެއްކުރެވުނު އިންޓެލިޖެންސް މައުލޫމާތަށް ބިނާކޮށް ހިންގި ހާއްސަ ރޭޑެއްގައި "ޓެރަރިސްޓް ޖަމާއަތެއްގެ އިސްވެރިއަކު" އަތުލައިގަނެފައިވާ ކަމަށެވެ.

އަދި އޭނާ އިތުރަށް ސުވާލުކުރުމަށް އިޒްރާއީލުގެ ސަރަހައްދަށް ގެންގޮސްފައިވާ ކަމަށްވެސް އަސްކަރިއްޔާއިން ބުނެފައިވެއެވެ. އިޒްރާއީލުން ތުހުމަތުކުރާ ގޮތުގައި އަލް-ޖަމާއާ އަލް-އިސްލާމިއްޔާ އިން ދަނީ އިޒްރާއީލުގެ އުތުރުގެ ސަރަހައްދުތަކަށް ހަމަލާތައް ދެމުންނެވެ.

މި ހާދިސާ ހިނގާފައި މިވަނީ ހިޒްބުالله އާއި އިޒްރާއީލާ ދެމެދު 2024 ވަނަ އަހަރުގެ ނޮވެމްބަރު މަހު ހަނގުރާމަ ހުއްޓާލުމުގެ އެއްބަސްވުމެއް ގާއިމުކޮށްފައި ވަނިކޮށެވެ. އެ އެއްބަސްވުމުގެ ދަށުން އިޒްރާއީލު ސިފައިން ލުބުނާނުގެ ސަރަހައްދުތަކުން ފޭބުމަށް ލާޒިމުކުރި ނަމަވެސް، އިޒްރާއީލުން އަދިވެސް ދަނީ ލުބުނާނުގެ ފަސް ސަރަހައްދެއްގައި ފައިތިލަ ސާބިތުކޮށްގެން ތިބެ، އަސްކަރީ އޮޕަރޭޝަންތައް ހިންގަމުންނެވެ.

ލުބުނާނުގެ ގާނޫނު ހަދާ މަޖިލީހުގެ މެންބަރު ހުސައިން ހާޖް ހަސަން ވިދާޅުވި ގޮތުގައި، ހަނގުރާމަ ހުއްޓާލުމުގެ އެއްބަސްވުމަށްފަހު އެކަނިވެސް އިޒްރާއީލުން ވަނީ ލުބުނާނުގެ 10 މީހަކު ވަގަށް ނަގާފައެވެ. މިހާރު ޖުމްލަ 20 ލުބުނާނު ރައްޔިތުން އިޒްރާއީލުގެ ބަންދުގައި ތިބި ކަމަށް އޭނާ ތުހުމަތު ކުރެއްވިއެވެ.

މީގެ އިތުރުން، ހޯމަ ދުވަހު އިޒްރާއީލުން ދިން ވައިގެ ހަމަލާއެއްގައި ލުބުނާނުގެ ދެކުނުން ތިން މީހަކު މަރުވެފައިވާ ކަމަށް ރިޕޯޓުތައް ބުނެއެވެ. މަރުވި މީހުންގެ ތެރޭގައި ކުޑަކުއްޖަކުވެސް ހިމެނެއެވެ. މި ހަމަލާ އަމާޒުކޮށްފައިވަނީ ޓައިރް ޑިސްޓްރިކްޓްގެ ޔަނޫހް އަވަށުގެ މެދުތެރޭގައި ދަތުރުކުރަމުންދިޔަ އުޅަނދަކަށެވެ.