ކެރަމް ވޯލްޑް ކަޕުން ރާއްޖޭގެ ފިރިހެން އަދި އަންހެން ޓީމަށް ލޯ މެޑެލް

އެމެރިކާގެ ކެލިފޯނިއާ ސްޓޭޓުގެ ސެން ފްރެންސިސްކޯ ބޭ އޭރިއާގައި މިހާރު ކުރިއަށްދާ ހަވަނަ ކެރަމް ވޯލްޑް ކަޕުގެ ޓީމު އިވެންޓުން ރާއްޖޭގެ ގައުމީ ފިރިހެން އަދި އަންހެން ޓީމުން ލޯ މެޑެލް ހޯދައިފިއެވެ.

އެމެރިކާގެ ކެރަމް އެސޯސިއޭޝަން (ޔޫއެސްސީއޭ) ގެ އިސްނެގުމުގެ މަތިން، އިންޓަނޭޝަނަލް ކެރަމް ފެޑެރޭޝަން (އައިސީއެފް) އާ ގުޅިގެން ބާއްވާ މި މުބާރާތުން ރާއްޖޭގެ ފިރިހެން ޓީމު ލޯ މެޑެލް ހޯދީ ސިންގަޕޫރު ބަލިކުރުމަށްފަހުއެވެ. ފިރިހެން ޓީމުގެ ފަރާތުން އިސްމާޢީލް އަޒްމީނާއި މުޙައްމަދު މުންތަސިރު ސިންގަލްސް މެޗުތަކުން މޮޅުވިއެވެ. އަދި ޑަބަލްސް މެޗުގައި ހަސަން ނާޒިމާއި އިބްރާހީމް ހުޖާން އަލީގެ ޕެއާ މޮޅުވެ، ރާއްޖެއަށް ލޯ މެޑެލް ކަށަވަރުކޮށްދިނެވެ.

އަންހެން ޓީމުން ލޯ މެޑެލް ހޯދީ މުބާރާތް ބާއްވާ ގައުމު ކަމަށްވާ އެމެރިކާ ބަލިކުރުމަށްފަހުއެވެ. އަންހެން ޓީމުގެ ފަރާތުން އައިމިނަތު ވިދާދު ސިންގަލްސް މެޗުން މޮޅުވިއެވެ. އަދި ޑަބަލްސް މެޗުގައި އައިޝަތު ނަހުފާ އާއި އައިޝަތު ފައިނާޒްގެ ޕެއާ މޮޅުވެ، ރާއްޖެއަށް ލޯ މެޑެލް ކަށަވަރުކޮށްދިނެވެ.

މިއީ ކެރަމް ވޯލްޑް ކަޕުގެ ތާރީޚުގައި ރާއްޖޭގެ ފިރިހެން ޓީމަށް ލިބުނު ފުރަތަމަ މެޑެއްޔެވެ. މި މުބާރާތުގައި އޯޕަން ސިންގަލްސް އާއި، އޯޕަން ޑަބަލްސްގެ އިތުރުން ޓީމު އިވެންޓް އަދި ސްވިސް އިވެންޓް ކުޅުމަށް ވަނީ ހަމަޖެހިފައެވެ. އަދި ޔޫއެސް އޯޕަން އިންވިޓޭޝަނަލް މުބާރާތްވެސް ކުޅުމަށް ވަނީ ހަމަޖެހިފައެވެ.