އިމާމުން ޖިންސާއި ޓީޝާޓު ލައިގެން ނަމާދުކުރުން މަނާކޮށްފި

އިސްލާމިކް މިނިސްޓްރީން އިމާމުންނާއި މުދިމުންގެ ސުލޫކީ މިންގަނޑު ބަލަހައްޓަންވީ ގޮތުގެ އުސޫލެއް އެކުލަވާލައި، އޭގައި އިމާމުން ޖިންސާއި ޓީޝާޓު ފަދަ ތަކެތި ލައިގެން އިމާމުވެ ނަމާދުނުކުރެވޭ ގޮތަށް ހިމަނައިފިއެވެ.

މި އުސޫލަކީ މިސްކިތްތަކުގެ އިމާމުންނާއި މުދިމުންނަކީ އިސްލާމްދީނާއި، ރާއްޖޭގެ ޤާނޫނުއަސާސީއާއި، ޤާނޫނުތަކާއި ގަވާއިދުތަކާއި އާންމު އިޖުތިމާޢީ މިންގަނޑުތަކާ އެއްގޮތަށް ޢަމަލުކުރާ ބައެއްކަން ކަށަވަރުކުރުމަށް ހަދާފައިވާ އުސޫލެކެވެ.

އުސޫލުގައިވާ ގޮތުން، ރަސްމީ ގަޑީގައި އިމާމުންނާއި މުދިމުން ހެދުން އަޅަންވާނީ އިސްލާމީ މުޖުތަމަޢު ބަލައިގަންނަ އަދި އިމާމުވެ ނަމާދުކުރުމަށް އެކަށީގެންވާ ގޮތަށެވެ. ޖިންސާއި ޓީޝާޓު ލައިގެން ނަމާދުނުކުރުމަށާއި، ގަޔަށް ބާރު ހެދުން ލައިގެން އިމާމުވެ ނަމާދުނުކުރުމަށް އަންގާފައިވެއެވެ. އަދި ބަންގި ގޮވުމާއި އިމާމުވެ ނަމާދުކުރާއިރު ބޮލުގައި އެއްޗެއް އެޅުމަށް ފަރުވާތެރިވުމަށްވެސް އަންގާފައިވެއެވެ.

މީގެ އިތުރުން، އިމާމުންނާއި މުދިމުންނަކީ ސާފުތާހިރުވެގެން ތިބޭ ބަޔަކަށްވުމާއި، މިސްކިތަށް އަންނަ ފަރާތްތަކާއި މުޖުތަމަޢުގެ އާންމު ފަރުދުންނާ މުޢާމަލާތްކުރުމުގައި އިޖުތިމާޢީ ހަމަތަކުގެ މަތިން ރީތި ބަހުން ވާހަކަދެއްކުމަށްވެސް އަންގާފައިވެއެވެ. އަދި އެހެން މީހުންނަށް ނަމޫނާ ބަޔަކަށްވުމުގެ އިތުރުން، އިމާމުންގެ ޤަދަރާއި ހައިބަތާއި އިތުބާރު ގެއްލޭފަދަ ކަންކަމުން ދުރުހެލިވުމަށްވެސް އަންގާފައިވެއެވެ.

މި އުސޫލާ ޚިލާފުވެއްޖެނަމަ، އެކަމެއްގެ ކުޑަބޮޑުމިނަށް ބެލުމަށްފަހު، ސިވިލް ސަރވިސް ގަވާއިދުގެ ދަށުން ފިޔަވަޅު އެޅުމުގެ ބާރު އިސްލާމިކް މިނިސްޓްރީއަށް ލިބިގެންވާކަން މި އުސޫލުގައި ބަޔާންކޮށްފައިވެއެވެ.