ދުންފަތުގެ އިސްތިއުމާލު ހުއްޓާލަން ބޭނުންވާ މީހުންނަށް އެހީތެރިކަން ފޯރުކޮށްދޭން އެޗްޕީއޭއިން މަސައްކަތް ފަށައިފި

ދުންފަތުގެ އިސްތިއުމާލުކުރުން ހުއްޓާލަން ބޭނުންވާ މީހުންނަށް ސިއްޙީ ޚިދުމަތްދޭ ހުރިހާ ތަނަކުން އެހީތެރިކަން ފޯރުކޮށްދޭނެ އިންތިޒާމް ހަމަޖެއްސުމުގެ މަސައްކަތް ކުރަމުންދާކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މިއަދު ވިދާޅުވެއްޖެއެވެ.

އެޗްޕީއޭގެ ޑެޕިއުޓީ ޑިރެކްޓަރު ހަސަން މުހައްމަދު ޕީއެސްއެމް ނިއުސްގެ "ރާއްޖެ މިއަދު" ޕްރޮގްރާމުގައި ވާހަކަދައްކަވަމުން ވިދާޅުވީ، މިހާރުވެސް މާލޭގައި 4 ކްލިނިކުން މި ޚިދުމަތް ދެމުންދާ ކަމަށާއި، ރާއްޖޭގެ ހުރިހާ ސިއްޙީ މަރުކަޒުތަކަކުން މި ޚިދުމަތް ފޯރުކޮށްދިނުމަށް މަސައްކަތްކުރަމުންދާ ކަމަށެވެ.

"އަޅުގަނޑުމެން މިހާރު މިކުރާ މަސައްކަތަކީ ރާއްޖޭގެ ސިއްޙީ ޚިދުމަތްދޭ ހުރިހާ ތަނަކުންވެސް ހުއްޓާލަން ބޭނުންވާ މީހުންނަށް އެހީތެރިކަން ފޯރުކޮށްދޭން. ކައުންސިލިން ދިނުމާއި ނިކޮޓިން ރިޕްލޭސްމަންޓް ތެރަޕީވެސް ލިބޭނެގޮތް ހަމަޖެއްސުން," ހަސަން މުހައްމަދު ވިދާޅުވިއެވެ.

މި މަސައްކަތް ފެށިފައިވަނީ ދުންފަތް ކޮންޓްރޯލް ކުރުމާ ބެހޭ ޤާނޫނަށް ގެނެވުނު އިސްލާހާ ގުޅިގެންނެވެ. މި އިސްލާހުގެ ދަށުން، އަންނަ މަހުގެ 15 ވަނަ ދުވަހުން ފެށިގެން ވޭޕްގެ އެއްވެސް ބާވަތެއް ރާއްޖެ އެތެރެކުރުމާއި، ބޭނުންކުރުމާއި، ވިއްކުމާއި އަދި ހިލޭ ބެހުން މަނާވާނެއެވެ.

މީގެ އިތުރުން، 21 އަހަރުން ދަށުގެ މީހުންނަށް ދުންފަތުގެ އެއްވެސް ބާވަތެއް ވިއްކުން މަނާކުރެވި، ދުންފަތުގެ ބާވަތްތައް ގަންނަ ފަރާތްތަކުގެ އުމުރު ޔަގީންކުރުމަށް ވަނީ ލާޒިމުކޮށްފައެވެ.

ހަސަން މުހައްމަދު ވިދާޅުވިގޮތުގައި، މި ފިޔަވަޅުތައް އަޅާފައިވަނީ ދިރާސާތަކުގެ ނަތީޖާތަކަށް ބިނާކޮށެވެ. "އުމުރުން 21 އަހަރުވަންދެން ދުންފަތާ ދުރުކޮށް މީހަކު ބެހެއްޓިއްޖެނަމަ އުމުރަށްވެސް އެމީހަކު ދުންފަތާ ދުރުގައި ހުންނާނެކަމަށް ބޭރުގެ އެކި ދިރާސާތަކުން ދައްކާ," އޭނާ ވިދާޅުވިއެވެ.

މި ޤާނޫނުގެ ދަށުން، ވޭޕްކުރަން ބޭނުންކުރާ އާލާތްތައް ވިއްކާ ފަރާތްތައް 20,000 ރުފިޔާއިން ޖޫރިމަނާކުރެވޭނެ އަދި ކޮންމެ އާލާތަކަށް 10,000 ރުފިޔާގެ މަގުން އިތުރަށް ޖޫރިމަނާކުރެވޭނެއެވެ. އަދި މިފަދަ އާލާތެއް ހިލޭ ބަހައިފިނަމަ 10,000 ރުފިޔާއިން ޖޫރިމަނާކުރެވޭނެއެވެ.