އޭދަފުށީގައި 1000 ހައުސިން ޔުނިޓް އިމާރާތްކުރުމަށް ޗައިނާގެ ކުންފުންޏަކާ ހަވާލުކޮށްފި

ބ. އޭދަފުށީގައި 1000 ހައުސިން ޔުނިޓް އިމާރާތްކުރުމުގެ މަސައްކަތް ޗައިނާގެ ސައިނޯ ހައިޑްރޯ ކޯޕަރޭޝަން ލިމިޓެޑާ ހަވާލުކޮށްފިއެވެ. މިކަމާ ގުޅޭ އެއްބަސްވުމުގައި ސޮއިކުރެވުނީ ރައީސުލްޖުމްހޫރިއްޔާގެ އޮފީހުގައި ބޭއްވުނު ރަސްމިއްޔާތެއްގައެވެ.

ސަރުކާރުގެ ފަރާތުން އެއްބަސްވުމުގައި ސޮއިކުރެއްވީ އިމާރާތްކުރުމާއި ބިނާވެށި ތަރައްޤީކުރުމާ ބެހޭ ވަޒީރު ޑރ. ޢަބްދުﷲ މުއްޠަލިބެވެ. ސައިނޯ ހައިޑްރޯ ކޯޕަރޭޝަންގެ ފަރާތުން ސޮއިކުރެއްވީ އެ ކުންފުނީގެ ކަންޓްރީ މެނޭޖަރ ޕެން ގުއާންޝޫއެވެ.

މި މަޝްރޫޢުގެ ދަށުން އޭދަފުށީގައި ޤާއިމްކުރުމަށް ހަމަ�ެހިފައިވަނީ 15 ބުރީގެ 12 ޓަވަރެވެ. މި ޓަވަރުތަކުގައި ހިމެނޭނީ 2 ކޮޓަރީގެ 772 ފްލެޓާއި 3 ކޮޓަރީގެ 336 ފްލެޓެވެ.

ވަޒީރު މުއްޠަލިބު ވިދާޅުވި ގޮތުގައި، މި އެއްބަސްވުމަކީ 2024 މެއި 8 ގައި ސޮއިކުރެވުނު އެމްއޯޔޫއެއްގެ ދަށުން ކައުންސިލާއި ގެދޮރުވެރިކަމާއި ބިމާއި އުމްރާނީ ތަރައްޤީއާ ބެހޭ ވުޒާރާއާއެކު ޓެކްނިކަލް މަސައްކަތްތަކެއް ކުރެވި، އޭދަފުށީގައި އިމާރާތްކުރުމަށް ކަނޑައެޅިފައިވާ ސަރަހައްދަށް ޑިޒައިންކުރުމަށްފަހު ޑީޓެއިލް ޕްރޮޕޯސަލް ހުށަހެޅުމާއެކު ސަރުކާރުން ކޮންޓްރެކްޓަރާ މަޝްވަރާކޮށް އެއްބަސްވެގެން ސޮއިކުރެވުނު އެއްބަސްވުމެކެވެ.

އޭދަފުއްޓަކީ ސަރުކާރުން ކަނޑައަޅާފައިވާ އަރބަން ސެންޓަރަކަށްވެފައި، އެ ރަށުގެ ބިން އެންމެ ހެޔޮގޮތުގައި ބޭނުންކުރުމަށްޓަކައި ވަރޓިކަލް ޑިވެލޮޕްމަންޓަކީ މުހިންމު ކަމެއްކަމަށް ގަބޫލުކުރެވިގެން 15 ބުރީގެ 12 ޓަވަރު އެޅުމަށް ނިންމާފައިވާ ކަމަށް ވަޒީރު މުއްޠަލިބު ވިދާޅުވިއެވެ.

ބޯހިޔާވަހިކަމަކީ މި ސަރުކާރުގެ އެންމެ މުހިންމު އެއް ވަޢުދު ކަމަށާއި، މި ދައުރުގައި ގެދޮރުވެރިކަމުގެ ރަންޒަމާނެއް ގެނެސްދެއްވާނެ ކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެފައިވާކަން ފާހަގަކޮށްލެވެއެވެ. މި ގޮތުން، ސަރުކާރުގެ ފުރަތަމަ ބަޖެޓުގައި 1.5 ބިލިއަން ރުފިޔާ ގެދޮރު އެޅުމުގެ ޢަމަލީ މަސައްކަތަށް ޚާއްޞަކޮށްފައިވާކަން ފާހަގަކުރެވެއެވެ.