އޭދަފުށި ވެގެންދާނީ އާބާދީއާއި ތަރައްޤީ އެއްފަސްކުރުމުގެ ނާރެހަކަށް: ވަޒީރު މުއްޠަލިބު

ބ. އޭދަފުށީގައި ތަރައްޤީކުރާ 1000 ހައުސިންގ ޔުނިޓުގެ މަޝްރޫޢާއެކު، އެ ރަށަކީ އާބާދީއާއި ތަރައްޤީ އެއްފަސްކުރުމުގެ ނާރެހަކަށް ވެގެންދާނެ ކަމަށް އިމާރާތްކުރުމާއި ބިނާވެށި ތަރައްޤީކުރުމާ ބެހޭ ވަޒީރު ޑރ. ޢަބްދުﷲ މުއްޠަލިބު ވިދާޅުވެއްޖެއެވެ.

އިއްޔެ ބޭއްވުނު ބ. އޭދަފުށީ 1000 ހައުސިންގ ޔުނިޓު ޢިމާރާތްކުރުމުގެ އެއްބަސްވުމުގައި ސޮއިކުރުމުގެ ރަސްމިއްޔާތުގައި ވާހަކަފުޅު ދައްކަވަމުން ވަޒީރު މުއްޠަލިބު ވިދާޅުވީ، މި މަޝްރޫޢާއެކު އާބާދީއާއި ވަޒީފާގެ ފުރުސަތުތައް އިތުރުވެގެން ދިއުމުގެ އިތުރުން އޭދަފުއްޓާ ކައިރި ރިޒޯޓުތަކުގައި މަސައްކަތްކުރާ ދިވެހިންގެ އަދަދުވެސް އިތުރުވެގެންދާނެ ކަމަށެވެ.

ވަޒީރު އިތުރަށް ވިދާޅުވީ، އޭދަފުށީގައި ހައުސިންގެ ބޮޑު މަޝްރޫޢެއް ޢިއުލާންކުރައްވަން ސަރުކާރުން ނިންމެވީ އެ ރަށަކީ އިތުރަށް ބިން ހިއްކެން ނެތް ރަށަކަށްވުމާއެކު، ރަށުގެ ބިމުގެ ބޭނުން އެންމެ ހެޔޮގޮތުގައި ހިފުމަށް ކަމަށެވެ. އެހެންކަމުން ވަރޓިކަލް ހައުސިންގ މޮޑެލްއަށް އެ ރަށުގައި ބޯހިޔާވަހިކަން ތަރައްޤީކުރުމުން އޭގެ ފައިދާ ދެމެހެއްޓެނިވި ގޮތެއްގައި ރަށަށް ލިބިގެންދާނެ ކަމަށްވެސް ވަޒީރު ފާހަގަކުރެއްވިއެވެ.

މި މަޝްރޫޢުގެ އެއްބަސްވުމުގައި ސޮއިކުރެވުމާއެކު، މަޝްރޫޢަށް ފައިނޭންސް ހޯދުމުގެ މަސައްކަތް ކޮންޓްރެކްޓަރ ފަށާނެ ކަމަށާއި، އެއާއެކު ސަރވޭއާއި އެހެން މަސައްކަތްތައްވެސް ކުރެވޭނެ ކަމަށް ވަޒީރު ވިދާޅުވިއެވެ. އަދި 2025 ވަނަ އަހަރު މި މަޝްރޫޢަށް ފައިސާ ހަމަޖެހި ޢަމަލީ މަސައްކަތް ފެށޭނެ ކަމަށް އުއްމީދުކުރައްވާ ކަމަށާއި، މި ދައުރުގެ ތެރޭގައި މި ފްލެޓްތަކުގައި ދިރިއުޅެވޭނެ ކަމަށް ޔަޤީންކުރައްވާ ކަމަށްވެސް ވަޒީރު މުއްޠަލިބު ވިދާޅުވިއެވެ.

އޭދަފުށްޓަކީ ތަޢުލީމީ ނިޒާމާއި ސިއްޙީ ޚިދުމަތްވެސް އެކަށީގެންވާ މިންވަރަށް ލިބޭ ރަށެއްކަމަށާއި، ކަނޑާއި ވައިގެ މަގުން މާލެ އައުން ފަސޭހަ ރަށެއްކަމުން، އަރބަން ސެންޓަރެއް ތަރައްޤީކޮށް އާބާދީއާއި ތަރައްޤީ އެއްފަސްކުރުމަށް މުހިންމު ރަށެއްގެ ގޮތުގައި އޭދަފުށި ވެގެންދާނެ ކަމަށްވެސް ވަޒީރު ފާހަގަކުރެއްވިއެވެ.