ސަރުކާރަށް 52 ހަފުތާ ފުރުމާ ގުޅިގެން "ޤައުމިއްޔަތު ދަތުރު" ގެ ބައިވެރީން މާލޭގެ އާސާރީ ތަންތަނަށް ޒިޔާރަތްކޮށްފި.

ސަރުކާރަށް 52 ހަފުތާ ފުރުމުގެ މުނާސަބަތު ފާހަގަކުރުމުގެ ގޮތުން ދިވެހިބަހާއި ސަގާފަތާއި ތަރިކައާ ބެހޭ ވުޒާރާގެ ފަރާތުން ކުރިއަށް ގެންދާ ޙަރަކާތްތަކުގެ ތެރޭގައި ހިމެނޭ "ޤައުމިއްޔަތު ދަތުރު" މިއަދު ކުރިއަށް ގެންގޮސްފިއެވެ. މި ދަތުރަކީ ޢާއްމުކޮށް ބައިވެރިވެވޭގޮތަށް ހުޅުވާލައިގެން ކުރިއަށް ގެންދިޔަ ދަތުރެކެވެ.

މިއަދު ހެނދުނު 9:00 ގައި ފެށުނު މި ދަތުރުގައި ބައިވެރިން ވަނީ މާލޭގައި ހުރި އާސާރީ ތަންތަނަށް ޒިޔާރަތްކޮށް، އެތަންތަނާ ބެހޭ ތާރީޚީ މަޢުލޫމާތު އޮޅުންފިލުވާފައެވެ. ދަތުރުގެ ބައިވެރީން ފުރަތަމަ ޒިޔާރަތް ކުރީ ޝަހީދުންގެ ދަނާވައްޗަށެވެ. މީގެ އިތުރުން، ބިހުރޯޒް ކަމަނާ މިސްކިތް، ޢީދު މިސްކިތް، އަލިރަސްގެފާނު ޒިޔާރަތް، މެދު ޒިޔާރަތް، ހުކުރު މިސްކިތް، ގުޅަކުޅޭ ފަސްގަނޑު، އުސްގެކޮޅު، ކަޅުއޮށްފުންމި، ކަޅުވަކަރު މިސްކިތް އަދި ޤައުމީ ދާރުލްއާސާރަށްވެސް ވަނީ ޒިޔާރަތްކޮށްފައެވެ.

މި ދަތުރުގައި މާލޭގެ އާސާރީ ތަންތަނާ ބެހޭ ގޮތުން ދަތުރުގެ ބައިވެރީންނަށް މަޢުލޫމާތު ޙިއްސާކޮށްދެއްވީ ދިވެހިބަހާއި ސަގާފަތާއި ތަރިކައާ ބެހޭ ވުޒާރާގެ މުޝީރު އަޙްމަދު ޢަލާ ދީދީއެވެ. މި ދަތުރަކީ އެމްޓީސީސީއާއި ފުލުހުންނާއި ދިރާގުގެ އެހީތެރިކަމާ އެކު  އެކު ކުރިއަށް ގެންދިޔަ ދަތުރެކެވެ.

ސަރުކާރަށް 52 ހަފުތާ ފުރުމުގެ މުނާސަބަތު ފާހަގަކުރުމުގެ ގޮތުން ދިވެހިބަހާއި ސަގާފަތާއި ތަރިކައާ ބެހޭ ވުޒާރާގެ ފަރާތުން އިތުރު ޙަރަކާތްތަކެއް ކުރިއަށް ގެންދިއުމަށް ވަނީ ރާވާފައެވެ. އެގޮތުން މިއަދު މެންދުރު 14:00 އިން 18:00 އަށް ޤައުމީ ދާރުލްއާސާރުގައި "މައިދާނީ ޢާއިލީ ހަވީރު" ގެ ނަމުގައި ޚާއްޞަ ޙަރަކާތެއް ކުރިއަށް ދާނެކަމަށް އެ ވުޒާރާއިން މަޢުލޫމާތު ދީފައިވެއެވެ.