4000 ފްލެޓުގެ ލިސްޓު އިޢްލާނުކުރަން އަދި ވަގުތު ބޭނުންވޭ: ގެދޮރުވެރިކަމާ ބެހޭ ވުޒާރާ

4000 ފްލެޓް ލިބޭ މީހުންގެ ލިސްޓު އިޢްލާނުކުރަން އަދި ވަގުތު ބޭނުންވާ ކަމަށް ގެދޮރުވެރިކަމާ ބިމާއި ޢުމްރާނީ ތަރައްޤީއާ ބެހޭ ވުޒާރާއިން ބުނެފިއެވެ. 

އެވުޒާރާއިން މިއަދު ނެރުނު ނޫސް ބަޔާނެއްގައި ބުނެފައިވަނީ މާލެ ސަރަހައްދުން ފްލެޓް ދޫކުރުމަށް 26 ޖޫންގައި ފަށާފައިވާ “ގެދޮރުވެރިޔާ ސްކީމް”ގެ ދަށުން 15 ނޮވެމްބަރު 2023 ގައި އިޢުލާނުކުރި ފްލެޓް ލިބޭ ފަރާތްތަކުގެ ދާއިމީ ލިސްޓް އެކުލަވާލުމުގައި ކޮރަޕްޝަނަށް މަގުފަހިވާ ކަންތައްތަކެއް ހުރި ކަމަށް ތުހުމަތުކޮށް އާންމު ފަރާތްތަކުން އޭސީސީއަށް ހުށަހަޅާފައިވާ މައްސަލައާ ގުޅިގެން އެ ކޮމިޝަނުން އެވުޒާރާއަށް އަންގާފައިވާ ކަންކަން ބެލުމަށް ރައީސްގެ ލަފާފުޅުގެ މަތިން އެކުލަވާލެވުނު ހައުސިން އެޑްވައިޒަރީ ކޮމިޓީއާއި ހައުސިން ކޮންސަލްޓޭޓިން ކޮމިޓީގެ ލަފާގެ މަތިން އެ ސްކީމްގެ ދަށުން ހުށަހަޅާފައިވާ ހުރިހާ އެޕްލިކޭޝަން ފޯމްތަކެެއް މުރާޖާކުރުމުގެ މަސައްކަތް ދަނީ ކުރިއަށް ކަމަށެވެ.

ކުރިން އާންމު ކުރެވިފައިވާ ގެދޮރުވެރިޔާ ސްކީމްގެ އުސޫލުގެ ދަށުން ހުށަހަޅާފައިވާ 20،687 އެޕްލިކޭޝަން ފޯމް ބެލިމުގައި ކަށަވަރުކުރަންޖެހޭ ގިނަ ކަންކަން ހުރުމާ ގުޅިގެން އެ މަސައްކަތް ނިންމުމަށް އިތުރު މުއްދަތު ބޭންވާ ކަމަށް ވެސް އެ ވުޒާރާގެ ބަޔާނުގައި ވަނީ ބުނެފައެވެ. 

"އެހެންކަމުން އެ ސްކީމްގެ ވަގުތީ ލިސްޓާއި ރީ-އިވެލުއޭޝަނާއި ގުޅިގެން ކުރިއަށް ގެންދެވުނު މަސައްކަތަކުގެ ތަފްސީލްތައް އެ މަސައްކަތްތައް ނިމުނުހާ އަވަހަކަށް އާންމުކުރާނެ." ގެދޮރުވެރިކަމާ ބެހޭ ވުޒާރާއިން ބުނެފައިވެއެވެ. 

އެ ވުޒާރާއިން ބުނީ މަސައްކަތްތަކަށް އިތުރު މުއްދަތު ދިޔަކަމުގައި ވިޔަސް ސަރުކާރުގެ މަޤްސަދަކީ އެ ސްކީމްގެ ފްލެޓް ހޯދުމަށް ހުށަހަޅާފައިވާ އެއްވެސް ފަރާތެއްގެ ހައްޤެއް ގެއްލިގެން ނުދާނެކަން ކަށަވަރުކުރުމާއެކު އެ ސްކީމްގެ ދަށުން ތަރައްޤީކުރާ ފްލެޓްތައް ދޫކުރެވޭނީ ހައްޤުވެރީންނަށް ކަން ޔަޤީންކުރުން ކަމަށެވެ.

މިދިޔަ ހަފްތާގައި ގެދޮރުވެރިކަމާ ބެހޭ ވަޒީރު ޑރ ޢަލީ ހައިދަރު ޢަލީ ވިދާޅުވީ މިއަދު ފްލެޓް ލިސްޓު އިޢުލާނު ކުރައްވާނެ ކަަމަށެވެ.