ޅެންވެރީންގެ ދުވަހުގެ ޙަރަކާތްތަކަށް ވަޒީރު އާދަމް ނަޞީރު އައްޑޫ ސިޓީ ހިތަދޫއަށް ވަޑައިގެންފި

2026 ވަނަ އަހަރުގެ ޅެންވެރީންގެ ދުވަސް ފާހަގަކުރުމަށް ބާއްވާ ރަސްމީ ޙަރަކާތްތަކުގައި ބައިވެރިވެވަޑައިގަތުމަށް، ދިވެހިބަހާއި ސަޤާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހީމް އައްޑޫ ސިޓީ ހިތަދޫއަށް ވަޑައިގެންފިއެވެ.

މި ދަތުރުފުޅުގައި ވަޒީރުގެ އަރިހުގައި ވުޒާރާގެ ޚާއްޞަ މުޝީރު ނިޝަން ދިޔަމިގިލީގެ ޝަރަފުގެ ޢިއްޒަތުގެ ވެރިޔާ އުތީމު އާދަމް ޢަބްދުއްރަޙުމާނާއި، އެ ވުޒާރާގެ ބައެއް އިސް މަސްޢޫލުވެރީން ބައިވެރިވެވަޑައިގެންނެވިއެވެ. ދިވެހި ބަހުގެ އެކަޑަމީން އިންތިޒާމުކުރާ މި ރަސްމިއްޔާތަށް ދިވެހިބަހުގެ އެކެޑަމީގެ ރައީސް ޙަސަން ޝާކިރު މުޙައްމަދާއި އެކަޑެމީގެ ނައިބު ރައީސާއި އެތައް ޅެންވެރީންނެއް ބައިވެރިވެވަޑައިގަންނަވާނެ އެވެ.

ދިވެހިބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހީމް، މި އަހަރުގެ ޅެންވެރީންގެ ދުވަހުގެ ޖަލްސާ އެ ބޭފުޅަކަށް ތަޚްޞީޞްކުރެވުނު އައްޑޫ ސިޓީ ހިތަދޫ ކެމީ، އަލްފާޟިލް ޙަސަން ލަބީބާއި، އޭނާގެ އަދަބީ ޖަމުޢިއްޔާ "ޝާއިރުންގެ ވާދީ"ގެ ބޭފުޅުންނާ މިއަދު… pic.twitter.com/7tq2yXy2YR

— Ministry of Dhivehi Language, Culture and Heritage (@MoDLCH) February 13, 2026

ޅެންވެރީންގެ ދުވަސް ކޮންމެ އަހަރަކުވެސް ޚާއްޞަވަނީ ދިވެހި އަދަބިއްޔާތުގެ ގަދަފަދަ ތަނބެއް ކަމަށްވާ އަލްމަރުޙޫމް އިބްރާހީމް ޝިހާބަށެވެ. މިއަހަރުގެ ޅެންވެރީންގެ ދުވަހުގެ ޙަރަކާތްތައް ހިތަދޫގައި ކުރިއަށްދާއިރު، ދުވަހުގެ ރަސްމީ ޖަލްސާ ތަޚްސީޞްކުރެވިފައި ވަނީ އައްޑޫ ސިޓީއަށް ނިސްބަތްވާ ކެމީ ޙަސަން ލަބީބަށެވެ. މީގެ އިތުރުން، މި ދުވަސް ފާހަގަކުރުމުގެ ގޮތުން ޅެންވެރިކަމުގެ ފަންނު ކުރިއެރުވުމަށާއި، ޅެންވެރީންގެ މެދުގައި މަޢުލޫމާތު ބަދަލުކުރުމަށް "ޅެންވެރީންގެ ގުންޒަރު"ގެ ނަމުގައި ޚާއްޞަ ހަރަކާތެއް ބޭއްވުމަށް ވަނީ ހަމަޖެހިފައެވެ.

ޅެންވެރީންގެ ދުވަހުގެ ރަސްމީ ޖަލްސާ އޮންނާނީ ފެބުރުއަރީ 14 ވާ ހޮނިހިރު ދުވަހުގެ ރޭ (މިރޭ) އައްޑޫ ސިޓީ ހިތަދޫގައެވެ.